گه‌نجه‌كێ ده‌ڤه‌را بارزان خه‌لاتێ دویێ وه‌رگرت
بارزان، ره‌مه‌زان زه‌كه‌ریا:
ئاراز ئیبراهیم، به‌هره‌مه‌نده‌كێ ده‌ڤه‌را بارزانه، ل حه‌فتیا بۆری خه‌لاتێ دویێ ل ده‌زگه‌هێ ره‌وانگه وه‌رگرت، ناڤبری ددیداره‌كێ دا بۆ رۆژناما ئه‌ڤرۆ گۆت: پشتی من پشكا زانستێن كۆمپیۆته‌ری ل زانكۆیا سه‌لاحه‌دین ب دووماهی ئینای من گه‌له‌ك گرنگی دا به‌رنامێ پرۆگرامینگ، پاشی من پلانا خوه پێشكێشی ده‌زگه‌هێ ره‌وانگه كر ل سه‌ر چێكرنا یاریه‌كێ ب پرۆگرامسازیێ و ب خۆشحالی ڤه پلانا من بۆ جهێ رازیبوونا وان و ل سه‌ر ئاستێ ئیراقێ ل به‌رنامێ پرۆگرامسازی شیام رێزا دویێ ب ده‌ستڤه‌بینم.
گۆتژی: من یاریه‌ك چێكریه بۆ هه‌ردو سیسته‌مێن ئایفۆن و گالاكسی كو ژ چارده قوناغان پێك دهێت، پشكدارێ وێ گێمی دكه‌ت ل سه‌ر حه‌زا خوه دشێت ده‌ستكاریا كاره‌كته‌ر و كه‌ره‌ستێن ناڤ یاریێ بكه‌ت و بگوهۆریت هه‌تا كو دگه‌هیته قوناغا دووماهێی، پرۆژێ من پێشكێشكری زۆرێ ب هێز بوو، من بۆ پلا ئێكی خوه به‌رهه‌ڤكربوو به‌لێ بوومه یێ دویێ، د پلانا من دایه ئه‌و یاریا من چێكری به‌رفره‌هترلێ بكه‌م و بكه‌مه یاریه‌كا جیهانی نوكه ب زمانێ كرمانجی و ئنگلیزی ل به‌رده‌سته، بۆ زانین ژی هه‌تا نوكه كه‌سێ پشته‌ڤانیا من نه‌كریه و، ب تنێ ئه‌ز نینم به‌لكو گه‌له‌ك به‌هره‌مه‌ندێن دی هه‌نه پێدڤی ب پشته‌ڤانیێ نه به‌لێ كه‌س كه‌سێ ئاگه‌ه ژ وان نینه ، دخوازم كو ته‌كنه‌لۆژیا ل هه‌موو قوناغێن ئاماده‌یی بهێته خواندن كو گرنگه زۆر ژبه‌ركو جیهان به‌ر ب ته‌كنه‌لۆژیی بوونێ ڤه دچیت.
