گه‌نج یاخیێ ده‌ستهه‌لاتێ یه یان هێش؟!
شڤان سالم گولى
بابه‌تێ كۆچكرنا گه‌نجان د نها دا، ژ بلی كو ئێك ژ مژارێن گرنگ یێن جڤات و سۆشیال میدیایێ نه، ژ ئالییه‌ك دیڤه ژی مژار و پرس گرێكه‌كا سیاسیا هه‌رێمێ یه، و كێم و زێده دبیت فشاره‌ك بیت لسه‌ر حوكمه‌ت و سیاسه‌تا پارتێن هه‌رێمی ب گشتی ب تایبه‌ت پارتێن پێكهێنه‌رێن حكومه‌تێ، له‌و ژی هه‌ر ئالییه‌ك ل گۆره‌یی دیتن و گرنگیدانا وابه‌سته و بخوه ڤه پویته ب ڤی بابه‌تی ددت و شرۆڤه‌كاری و هه‌لسه‌نگاندنان بۆ دكت، دیاره د ڤێ ناڤبه‌رێ دا ژی پارتێن ژ ده‌رڤه‌یی ده‌ستهه‌لاتێ ژی ئه‌ڤێ ژارێ بۆ كه‌واندنا برینێن خوه بكاردئینن و مرۆڤ دشێت ب رۆنی هه‌ست پێ بكت، چ راسته‌وخوه یان ناراسته‌وخوه رۆلێ خوه دگێرن د خۆشكرنا ئاگرێ كۆچكی دا، هه‌تا كو دهێت دلێ گه‌نجان پتر و پتر پڕ دكن ل ژێر ناڤ و پرسێن جودا جودا، وه‌ك (نه‌بوونا خزمه‌تگوزاریان، نه‌بوونا ده‌لیڤێن كاری، نه‌بوونا دادیێ، نه‌بوونا دامه‌زراندنێ..هتد) هه‌لبه‌ت مرۆڤ نه‌شێت حاشاتیێ ژ ڤان بكت، دیاره حكومه‌تێ ژی ل ڤێرێ ئه‌گه‌ر و به‌رسڤێن خوه یان رۆنكرن هه‌نه،كو من نه‌ڤێت ببم زمانحالێ وێ چونكی به‌رده‌ڤكێن خوه یێن فه‌رمی هه‌نه، لێ ئه‌گه‌ر ژی ئه‌م بێژین هیچ نه‌هاتیه‌كرن ب راستی ئه‌و ژی بێ وژدانیه‌كه، یا من دڤێت ل ڤێرێ بێژم ئه‌وه گه‌لۆ ئه‌ڤ یاخیبوونا گه‌نجان ب تنێ ژ ده‌ستهه‌لاتێ یه، یان ئه‌گه‌رێن دی ژی هه‌نه، كو نه ئالیێن ئۆپۆزسیۆن، نه‌ژی گه‌نج بخوه ب روونی ڤێ نائێخن به‌رچاڤ، و هه‌موو فۆكسا خوه دئێخن سه‌ر ئه‌وا دبێژنێ یاخیبوونا سیاسی، و زۆر ب روونی ئه‌گه‌ر سه‌رنج بده‌ین پارتی ب ژمارا ئێك دكن ئارمانج، ب حوكمێ هندێ كو پێكهێنه‌را سه‌ره‌كی یا حوكمه‌تێ یه، ئه‌م ژی وی مافی دده‌ین خه‌لكی، و ئه‌ز باوه‌رم پارتی وه‌ك پێكهێنه‌را سه‌ره‌كی یا حوكمه‌تێ زۆرجار ب ئاشكرا ب زه‌لالی به‌حس ل ملدان ل به‌ر به‌رپرسیاره‌تیێ كریه و ئه‌و هێزه نه‌بوویه كو حاشاتێ ژ به‌رپرسیاره‌تیا خوه بكت، لێ پرسا من ئه‌وه گه‌لۆ ب راستی ژی كۆچبه‌ریا گه‌نجان ئه‌وه ب تنێ یه یا پارتێن ئۆپۆزسیۆن فۆكسا خوه دئێخن سه‌ر یان یاخیبوونه‌ك دی ژی ل پشت هه‌یه كو كه‌س باس لی ناكت؟
دبیت ئه‌و یێ ورد نه‌بم لێ ئه‌وا ئه‌ز دبینم و زۆرجار ژ گه‌نجان دبهیستم و هه‌ست پێ دكم بابه‌ته‌ك دی هه‌یه كو گرنگیا وێ هێچ كێمتر نینه ژ یاخیبوونا سیاسی ئه‌و ژی یاخیبوونا جڤاكی یه! كو ب مخابنی ڤه هیچ ئالیه‌كێ سیاسی یان ژی رێكخراو و بسپۆرێن كۆمه‌لناسی وه‌ك پێدڤی باس ل ڤێ مژارێ نه‌كریه، دیاره ئالیێن ئۆپۆزسیۆنێ مه‌ره‌مێن خوه ژ ڤێ ئێكێ هه‌نه، لێ جڤاكناس بۆچى دبێده‌نگن بۆ من ژی جهێ پرسێ یه!
ئاخر حاشاتی ل وێ ناهێته‌كرن گه‌نجه‌كێ بێكار یان خودان مووچه‌كێ كێم ب زه‌حمه‌ته بشێت پرۆسا زه‌واجێ پێكبینیت، گه‌لۆ ما خواستنا رێژه‌كا زۆر یا زێری ژ ڤی گه‌نجی بارێ لسه‌ر بارا نینه؟!
ئه‌رێ چاڤگێرانا كچێ ل دۆر گه‌نجێ خودان شیانێن ئابۆری و ب ترومبێل و ڤلله و پاره..هتد. كێشه‌كا دی نینه ل هه‌مبه‌ری گه‌نجی؟
ئه‌رێ ئه‌ڤ پێناسه‌یا جڤاكیا (هه‌یی به كوڕێ كه‌ڕی به) مالا چه‌ند گه‌نجان دایه ئالیه‌كێ ژ لایێ جڤاكی ڤه پاشگوخستنه!
ئاخر گه‌نجه‌كی ب گڤاشتنه‌كا سه‌ر شاشا مۆبایلا خوه یه‌ك دنیا ده‌ربازبوونا ژ گڤاشتنێ جڤاكی د جیهانا پێشكه‌فتی دا دبینت دێ چاوا شێت خوه دگه‌ل جڤاكه‌كێ وه‌ك یێ مه‌گونجینت!
ئاخر چه‌ند ژ گه‌نجان ئه‌و ده‌لیڤه هه‌بوویه یا نیڤا دلێ خوه بۆ مه بێژن كا چه‌ند گرفتێن جڤاكی ل هه‌مبه‌ر وان هه‌نه؟ لێ بۆ پنیكرنا وان گرفتێن سیاسی دئێخن پێش. ئاخر گه‌نجه‌كێ 15/16 سالی كه‌نگی هنده پێگه‌هشتی بوویه هه‌تا بزانیت گرفتێن سیاسی ل پێشیا وان هه‌نه؟
ئاخر كی ژ وان پارت یان به‌رپرسێن پارتێن ئۆپۆزسیۆنی هه‌نه كو رازی بیت كچا خوه ب زێره‌كێ كێم بده‌ت ئێك ژ وان گه‌نجێن بێ كاروكێم داهات؟ بێ دودلی كه‌س كه واته ل ڤی ولاتی گه‌نجان یاخیبوونه‌كا دی یا ل پشت یاخیبوونا سیاسی هه‌ی كو دبێژێن یاخیبوونا جڤاكی، كو ب من رۆلێ وێ هێچ كێمتر نینه ژ یا سیاسی و ب ئه‌گه‌رێ سه‌ره‌كی یێ كۆچكرنێ دهێت پێناسه‌كرن ل هه‌رێمێ، لێ ب من جڤاك ئه‌گه‌رێ پێشینه لێ كه‌سێ هێشتا دلێ خوه ل ڤێ كێشێ زه‌لال نه‌كریه و كه‌یسه‌كێ باش نینه و وه‌رگرتنا وان وه‌ك په‌نابه‌ر، ئه‌ڤه وێ ناگه‌هینت كو ده‌ستهه‌لات بێ كێماسییه لێ جڤاك دلۆڤانتر ژ ده‌ستهه‌لاتێ نینه.
