گورانكاری و به‌رهنگاریێن دكه‌ڤنه به‌رووكا هه‌رێما كوردستانێ.
دوو ئیدیه‌مێن گرێدای هه‌ڤدوو هه‌نه ئه‌وژی ئاسایشا نه‌ته‌وه‌یی وخوَراكی و بتایبه‌ت ل ڤی سه‌رده‌می كو جیهان هه‌موو وبتایبه‌ت ده‌ڤه‌را رۆژهه‌لاتا ناڤه‌راست یا به‌ره‌ڤ ره‌وشه‌كا ترسناك یا ئابووری و نه‌ته‌ویی ڤه‌دچیت و قه‌یرانان سه‌رێ خوه هه‌لدایه و بهێزه‌كا مه‌زن و بشێوه‌كێ بله‌ز یێن دهێن و پتریا وه‌لاتان كه‌فتینه دمه‌تریسێ دا، ب بوَچوونا من ئه‌گه‌رێن سه‌رهلدانا ڤان ره‌وش و قه‌یرانان ژی ئه‌وه كو ملله‌تێن جیهانێ ژ چاندنێ به‌ره‌ڤ پێشه‌سازیێ چوون ئانكو ژ گونداتیێ به‌ره‌ڤ باژێربوونێ ڤه چوون و چاندن و به‌رهه‌مێن ناڤخوه‌یی بجه هێلان و ئه‌ڤێ دیاردا شاش كارتێكرن ل سه‌ر ره‌وشا ئاساییشا خوَراكی كرن و هه‌لبه‌ت كارتێكرنێ دكه‌ته سه‌ر ئاساییشا نه‌ته‌وه‌یی ژی. ب درێژاهیا دیروَكێ ملله‌تێ كورد كه‌فتیه به‌ر گه‌ف و هێرشێن دوژمنان و زور كارتێكرن ل ملله‌تێ كورد كری یه ژ ئالیێ سیاسی و دارای و جڤاكی و ئابووری و ره‌وشه‌نبیری و هتد. به‌ره‌ف مه‌ترسیێ ڤه‌بریه و تاكو ملله‌تێ كورد نه‌چاركری كو به‌ره‌ڤانیێ ژ خاك و ئالا و داهاتێ كوردستانێ بكه‌ن و ببنه پالده‌ره‌كێ بهێز ژ بۆ پێشڤه‌برنا ره‌وشا كوردستانێ و پێشمه‌رگه و شوَره‌ِشڤانێن خه‌باتكه‌ر شیان هنده‌ك سنووران بدانن و خاكا كوردستانێ بپارێزن. ئه‌گه‌ر لاپه‌رێن دیروَكێ ڤه‌ده‌ین و لێ نییرینه‌كێ ل ناڤه‌روَكا وێ بده‌ین دێ بینین كو وه‌لاتێن زلهێز و زه‌به‌لاح و هه‌رێمی و بیانی ئاراسته‌یا حه‌زێن خوه به‌ره‌ف كوردستانێ ڤه ئیناینه و دلێ خوه بریه داهاتێ كوردستانێ و كوردستان كریه ئارامانج و شیاینه ئابوورێ كوردستانێ لاواز بكه‌ن و ئه‌و ژێده‌رێن داهاتی و كه‌ره‌ستێن ل كوردستانێ هه‌ی بكه‌نه دبن ده‌ستێ خوه‌ڤه و ملله‌تێ كورد بێ به‌هر بكه‌ن و هه‌موو سه‌روه‌ت و سامانێ پڕ بهایێ كوردستانێ بوَ خوه بكاربینن و تا راده‌یه‌كێ زێده وان خێر و بێرێن كوردستانێ بۆ خوه ببه‌ن. له‌وما ل شوونا كوردستان به‌ره‌ف پێشڤه بچیت پاشكه‌فتن و ره‌وشا كوردستانێ ژ باشیێ رۆژ بۆ رۆژێ به‌ره‌ف خرابتر و ئالوَزتر ڤه چوویه و كوردستان داگیر كریه و ئه‌گه‌ر ژئالیێ له‌شكه‌ری ڤه نه‌لێ به‌لێ ژئالیێ ئابوری ڤه. دوژمنێن ملله‌تێ كورد باش دزانن كو كوردستان یا زه‌نگینه ب سه‌رچاوێن سروشتی مینا فوسفات، كبریت، گاز و غاز، كانزایان، باران و به‌فر، دارستان، ئه‌مباریێ ئاڤێ، گیاندارێن كویڤی، جهێ چاندنێ و كه‌ش و هه‌وایه‌كێ گونجاو بوَ هه‌ر جورێ چاندنێ و ئه‌گه‌ر كوردستان ژی دا هێته پشت گوه هاڤێتن مینا گه‌له‌ك وه‌لاتێن جیهانێ و له‌وما به‌رێز نێچیرڤان بارزانی ل كونفرانسه‌كی ل وه‌لاتێ ئه‌مریكا گوتی ل سالا (1975) ملله‌تێ كورد دگازا كه‌ركوكێ دا هاته سوَتن و نوكه ژی ئه‌م دترسین كورد د ئاڤا خوه بخو دا بهێته خه‌ندقین. لێ سیاسه‌تا ده‌رڤه‌یا كوردان و ره‌وشا جیهانێ یا سیاسی و جڤاكی و ئابووری هاتیه گوهوَڕین و ملله‌تێ كورد بوویه ژماره حساب بوَ دهێته كرن ل ناڤه‌ندێن جیهانێ دا.
لێ ئه‌و ره‌وشا نوكه په‌یدا بووی ل هه‌رێما كوردستانێ ژ برینا به‌هرا بوَدجێ هه‌رێمێ و ناكوَكیێن ل ناڤبه‌را هه‌ڤلێر و به‌غدا و په‌یدابوونا شه‌رێ تیروَرستێن داعش و ناكوَكیێن ل ناڤبه‌را سیاسه‌تڤان و لایه‌نێن سیاسیێن هه‌رێمێ و نزم بوونا بهایێ په‌تروَلێ ل بازارێن جیهانێ بوونه ئه‌گه‌رێن وێ چه‌ندێ كو مه‌ترسی بكه‌ڤیته سه‌ر ئاساییشا خوَراكی و یا نه‌ته‌وه‌یی و هزر ل وێ چه‌ندێ هاته كرن كو ئه‌م ملله‌ته‌كێ سه‌ردا چویی بووین و مه ملله‌ت و حوكمه‌ت چ شه‌نگسته یێن بهێز وخوَڕستی نه دانان دا كو نوكه شیاباینه مه خوه ل سه‌ر پێن خوه گرتبان و شیاباینه بتنێ موَچێن فه‌رمانبه‌ران دابین بكه‌ین و ئه‌ڤه هه‌موو وێ چه‌ندێ دیار دكه‌ت مه بوَ رۆژێ كار دكر نه بوَ سوباهی و خالێن ل خوارێ دیار چه‌ند بوَچوونه‌كێن منن ل دور گه‌شه‌كرنا ئابوورێ هه‌رێما كوردستانێ دا كو ژقه‌یران و ئاسته‌نگان ده‌رباز ببین و پشت به‌ستیا خوه بتنێ بده‌ینه سه‌ر داهات و به‌رهه‌مێن ناڤخوه و براستی ژی رژێمێن ده‌ستهه‌لاتێن عێراقێ یێن گوربگور ئه‌ڤ كارتێكرنه ل مه كریه و سیاسه‌ته‌كا دوژمنانه په‌یڕه‌و كریه به‌رامبه‌ر ملله‌تێ كورد كو ب هزر و پیلان د ماوێن چه‌ندین سالان دا هاتیه ڤه‌هاندن و ملله‌تێ كورد ژ ملله‌ته‌كێ به‌رهه‌مهێنه‌ر و خوَڕستی و بێ مننه‌ت كریه ملله‌ته‌كێ خاڤ و ته‌رلان وده‌ستێ وی یێ درێژه بوَ دوژمنان كو پاریه‌كێ نانی بده‌تێ دا ئه‌و خێزانا خوه ژبرسا نه‌مرن هه‌ر چه‌نده ئه‌ردێ كوردستانێ خێرو بێرو و زێرینه، ب دیتنا من ئه‌ڤ خالێن ل خوارێ دیار چه‌ند بوَچوونن ل دور بهێزكرنا ئابوورێ كوردستانێ و زڤڕاندنا ژێرخانه‌كا ئابووری یا كو بشێت كوردستانێ ژقه‌یرانان بینته ده‌رێ
1- فه‌ره حوومه‌ت و جهێن په‌یوه‌ندی دار كوَمپانی و كارگه‌هێن بیانی و نافخوه‌یی بهینن و خوَمالبكه‌ن و كارا بكه‌ن و وه‌لاتیێن كوردستانێ سه‌ر په‌رشتیێ ل سه‌ر بكه‌ن و مفایێ بگه‌هینن وه‌لاتێ مه.
2- خوَدانێن سه‌ربوَر و شاره‌زا و دل سوز ژده‌رڤه بینن و ئه‌زموون و خوَل پێ بهێنه كرن و مفایی ژ شیان و شاره‌زایا وانان وه‌رگرن.
3- پشت به‌ستیێ بكه‌ینه سه‌ر چاندنێ و به‌رهه‌مێن ناڤخوه‌یێ و كه‌رتێ چاندنێ و دووڤچوونێ و پێداچوونه‌ك ل سه‌ر كار و پرۆژێن چاندنێ بهێنه‌كرن چنكو ئه‌رد و ئاڤ و كه‌ش و هه‌وا یه‌كێ گونجاو مه‌هه‌یه ل كوردستانێ.
4- كه‌رتێ په‌روه‌ردێ و زانستی بهێته كاراكرن و پشت به‌ستی بده‌ینه سه‌ر زانستی و په‌روه‌ردێ بوَ ته‌ڤایا كاران.
5- كه‌رتێ تایبه‌ت كارا بكه‌ن و كاركرنا وان كاركه‌ر و كارمه‌ندان ل كه‌رتێ تایبه‌ت ب هه‌ماهه‌نگی دگه‌ل حوكمه‌تێ خزمه‌تا وانان بهێته هژمارتن و یاسایه‌ك بۆ بهێته دروست كرن.
6- پشت به‌ستن ب یاسایێ و كار و پرۆژه و وه‌به‌رهێنان ل دووڤ یاسایێ بهێت داكو چ زه‌غه‌لی دكاری دا نه هێته كرن.
7- كه‌سانێن خودان شیان و دلسوَز ل جهێن شایسته بهێته دانان و ب بریارا كوَم بهێته دانان نه‌كو تاكڕه‌وی بكه‌ڤیته دكاری و بریارێ دا.
8- كه‌رتێ گوزاری و گه‌شت كرنێ بهێته كاراكرن و جهێن سروشتی و خوه‌زای و به‌رفره‌ه مه‌هه‌نه و پتر پشت به‌ستن ل سه‌ر كه‌رتێ گرنگێ گه‌شت و گوزارێ و مفایێن مه‌زن و داهاتێن مه‌زن دێ ژێ هێنه كرن.
9- وه‌به‌رهێنانا هه‌رێمێ بهێته كاراكرن و كه‌سانێن تایبه‌تمه‌ند و شاره‌زا و دلسوَز سه‌رپه‌رشتیێ ل سه‌ر بكه‌ن و كه‌سانێن گه‌نده‌ل بهێنه دوورخستن و ژ به‌رژه‌وه‌ندیێن تایبه‌ت بوَ به‌رژه‌وه‌ندا گشتی.
10- به‌رهه‌مێن چیایی و خوه‌زای یێن كورده‌واری بهێنه خوَمالیكرن و چاڤ لێكرن و بهێنه دانه‌نیاسین ل سه‌رانسه‌ری جیهانێ و ل ناڤخوه ژی و دێ پتر مفایێن ماددی ژێ هێنه كرن ژ بلی مفایێن ته‌ندروستی و كه‌لتوری.
11- دروست كرنا كارگه‌هێن رێچال و سپیاتی یا ل ده‌ڤه‌رێن كوردستانێ و ب تایبه‌ت ل ده‌ڤه‌را دهوكێ و دێ ئه‌ڤ كارگه‌هه بنه ئه‌گه‌رێ زێده‌كرن و بلندكرنا بهایێن چاندنێ و به‌رهه‌مێن گیانه‌وه‌ران و دێ پتر وه‌لاتیێن كوردستانێ ژی كه‌ڤنه كاری و خوَدان به‌رهه‌م دێ هه‌ولا زێده‌كرنا به‌رهه‌مێن خوه كه‌ن.
12- كاراكرنا كارێن ده‌ستی و به‌رهه‌مێن خوه ب خوه‌یی مینا چانتك و كوَلاڤ و گوبال و كه‌ل و په‌لێن كورده‌واری و چل به‌رگێن ناڤخوه‌یی و دانه نیاسینا وان بوَ ناڤه‌ندێن جیهانێ.
13- دروست كرنا ئوتێل و موتێل و پارك و پر و رێگه و بانا و مفا وه‌رگرتن ژ ڤان پرۆژان مینا ئوتوبانی كو رۆژانه پاره‌كێ مه‌زن و داهاته‌كێ باش ژێ دهێت.
14- گرتنا رێكێ ل گه‌ل و په‌لێن بیانی و ب تایبه‌ت یا وه‌لاتێن هه‌رێمی ژبۆ كاراكرنا به‌رهه‌مێن ناڤخوه‌یی و دروستكرنا باوه‌ریێ ل جه‌م وه‌لاتیێ كورد كو پشت به‌ستیێ بده‌ته سه‌ر كه‌ل و په‌ل وكه‌ره‌ستێن نافخوه‌یی.
15 – مفا وه‌رگرتن ژ ژێده‌رێن ئاڤێ و چێكرنا به‌نداڤ و گوَما ژبۆ عومباركرنا ئاڤێ و چێكرنا كاره‌بێ و فروَتنا ئاڤێ بۆ وه‌لاتێن دی ب بهایێن باش. ئه‌ڤ خاله هه‌موو و پتر ماینه كو وه‌لاتێ مه كوردستان ببیته وه‌لاته‌كێ پێشه‌نگ ب ناڤ و ده‌نگ ڤه‌ده‌ت و ملله‌تێ كورد ب ئارامی و شانازی و خوه‌شی بژیت چنكو خه‌لكێ مه گه‌له‌ك نه خوه‌شی و نه‌هامه‌تی دیتینه ل سه‌ر ده‌ستێن رژێمێن كه‌ڤنه‌په‌رست و دكتاتوَر و بلا نوكه وه‌لاتێ خوه بپارێزین و بلا هه‌موو لایه‌ن و كه‌سایه‌تی و گه‌لێن كوردستانێ ده‌ستێن خوه بكه‌نه ئێك ده‌ست و خاكا خوه بپارێزین مینا بیبیكا چاڤێ خوه چنكو ئه‌م ب ئیكگرتنێ دجوانین و ب ئێكگرتنێ دێ سه‌ركه‌ڤین و ڤان قه‌یرانان ده‌رباز كه‌ین و بلا كه‌س خوه ب وه‌لاتپارێز و خۆشمێر نه‌زانیت و ئه‌م هه‌موو یێن دئێك پاپوَر دا و ل نیڤا ده‌ریایه‌كا مه‌زنین هه‌رده‌مێ نقوم بوو ب هه‌ڤرا دێ نقوم بین و چاره‌نڤێسێ مه ئێكه و پێكڤه به‌ره‌ڤ ئابووره‌كێ بهێز و ئاساییشه‌كا ئارام و ژیانه‌كا به‌خته‌وه‌ر و كوردستانه‌كا سه‌ربه‌رز و سه‌ربه‌خوَ.
