گولا من
خالد عەلی سلێڤانەیی
ئەڤ گولە گولا منە
ئێكە لێ هەروەكو باخ
كێم وێنە..ب سەد بێنە
ئەڤینا مە ژ دل و ناخ
::: ::: :::
هەست و هزر و هۆزانە
خەملا دەشت و زۆزانا
فریشتا سەر سۆزانە
حەژێدكن خۆ ئاڤ و ئاخ
::: ::: :::
دەمێ بەر چاڤا دكەڤیت
خەم ژ دەردۆرا دڕەڤیت
رۆژێ شەرمە دەركەڤیت
ل سەرێ وەرزان دواخ
::: ::: :::
نە پاییز د وەرینیت
نە زستان دهەژینیت
هاڤین چەند خۆ بكەلینیت
گەشتر دبیت چاخ ب چاخ
::: ::: :::
دو دلا بۆ ئێك لێدا
دو جانا خۆ گرێدا
من ژی سۆزەك بۆ وێ دا
بپارێزم هندی ساخ
