گولستان باقی:پشتی په‌یاما سه‌رۆك بارزانی دێ گۆهۆڕین كه‌رتێ په‌روه‌ردێ هێنه‌كرن
هه‌ولێر، قائید میرۆ
بڕیاره گۆهۆڕینێن به‌رچاف د كه‌رتێ په‌روه‌ردێ دا بهێنه كرن و ئه‌ندامه‌كا لیژنا په‌روه‌ردێ و خواندنا بلندژی ئاشكراكر، پشتی گوتارا سه‌رۆك بارزانی بڕیاره گۆهۆڕین د كه‌رتێ په‌روه‌ردێ بهێنه‌كرن و دبێژیت، سیسته‌مێ نوكه‌یێ په‌روه‌ردێ دگه‌ل سه‌رده‌مێ نوكه ناگونجیت و پێدڤی ب گۆهۆڕینان هه‌یه هه‌روه‌سا ئاماژه‌كر، پڕۆژه قانوونه‌ك بۆ دامه‌زراندنا سیسته‌مه‌كێ نووی ێ په‌روه‌ردێ هاتیه به‌رهه‌ڤكرن و بڕیاره ژلایێ په‌رله‌مانێ كوردستانێ ڤه بهێته په‌سه‌ندكردن.
گولستان باقی، ئه‌نداما لیژنا په‌روه‌ردێ لپه‌رله‌مانێ كوردستانێ بۆ رۆژناما ئه‌ڤرۆ دیار كر” پارتی پرۆژه بۆ چاكسازیا كه‌رتێ په‌روه‌ردێ هه‌نه و د په‌یاما پارتی دا بۆ چوار سالێن داهاتی دێ كار كه‌ت بۆ گۆهۆڕینا سیسته‌مێ په‌روه‌ردێ لهه‌رێما كوردستانێ و به‌ری نوكه‌ژی ب رێیا تیمێ پارتی دناڤا حوكمه‌تێ دا چه‌ندین گۆهۆڕین هاتینه‌كرن و چاكسازی هاتینه ده‌ستپێكرن، هه‌روه‌كی سه‌رۆك بارزانی د گوتارا خۆیا رۆژا 11ی ئه‌یلوولێ ئاماژه ب گرنگیا كه‌رتێ په‌روه‌ردێ كری دێ پارتی ئه‌ڤان گۆتنێن سه‌رۆك بارزانی بكه‌ته كریار و ئیدی كه‌رتێ په‌روه‌ردێ دێ گۆهۆڕینێن به‌رچاف بخۆڤه بینیت، چونكه پارتی وه‌ك هێزا ئێكانه و خودان ده‌ستهه‌لات شیانێن گۆهۆڕینان هه‌نه د هه‌موو بیاڤاندا، ئێك ژوان كه‌رتێن د گرنگن بۆ هه‌ر جڤاكه‌كی كه‌رتێ په‌روه‌ردێ یه، پشتی سه‌رهه‌لدانێ تنێ ئێك زانكۆ لهه‌رێما كوردستانێ هه‌بو، نوكه مه زێده‌تری 40 زانكۆیان هه‌نه و هه‌موو گونده‌كی ژی قوتابخانه بۆ هاتیه ئاڤاكرن، بزاڤ دێ به‌رده‌وامبن بۆ ڤێ چه‌ندێ سیسته‌مه‌كێ په‌روه‌ردێ بهێته بجه ئینان دگه‌ل سه‌رده‌مێ نوكه گونجای بیت و پێشكه‌فتنا جیهانێ و سیسته‌مێ خواندنێ دێ بنه خالێن دسه‌تپێكی بۆ پێشڤه‌برنا كه‌رتێ په‌روه‌ردێ.
ئه‌ڤێ ئه‌نداما لیژنا په‌روه‌ردێ گۆتژی” مه وه‌كی تیمێ پارتی و لیژنا په‌روه‌ردێ لپه‌رله‌مانێ كوردستانێ چه‌ندین قانوون و بڕیار بۆ به‌رژه‌وه‌ندیا كه‌رتێ په‌روه‌ردێ و خواندنا بلند ده‌ركرینه و پلانا مه ئه‌ڤه هێشتا به‌رده‌وامبین بۆ نموونه پڕۆژه قانوونا په‌روه‌ردێ نوكه ل سه‌رۆكایه‌تیا جڤاتا وه‌زیرانه و بشێوه‌یه‌كێ پێشكه‌فتی هاتیه به‌رهه‌ڤكرن، بڕیاره پڕۆژه قانوون بهێته په‌رله‌مانی و پشتی پێداچوونێ بكه‌ڤیته ناڤا كارناما كۆمبۆنێن په‌رله‌مانی، چونكه مه بڤێت و نه‌ڤێت كه‌رتێ په‌روه‌ردێ سستیه‌ك پێڤه دیاره و خالێن لاواز یێن ناڤا كه‌رتێ په‌روه‌ردێ كاریگه‌ری لسه‌ر ئاستێ خواندنێ و زانینێ كریه لهه‌رێما كوردستانێ، به‌لێ ئومێد هه‌یه بۆ بجه ئینانا سیسته‌مه‌كێ نوویێ په‌روه‌ردێ، كو ئه‌م باوه‌رین دێ كاریگه‌ریێن زۆر باش هه‌بن لسه‌ر ئاستێ قوتابیان و مینا وه‌لاتێن پێشكه‌فتی دێ قوتابیێن هه‌رێما كوردستانێ ژی مفاداربن ل خزمه‌ت گوزاریێن په‌روه‌رده‌یی، كو ئه‌ڤه هیڤیا مه هه‌موو خه‌لكێ كوردستانێ یه، نه‌خاسمه كابینا نه‌هێ گرنگیه‌كا تایبه‌ت ب كه‌رتێ په‌روه‌ردێ دده‌ت.
گولستان باقی ئاماژه‌كر” ئه‌م دلگرانین ل داخویانیا وه‌زیرێ خواندنا بلند، كو به‌ری چه‌ند رۆژان گوتی، زانكۆیێن حوكمه‌تێ بووینه بارگرانی لسه‌ر حوكمه‌تێ، به‌رۆڤاژی كه‌سێن نمره‌یێن بلند بده‌ستڤه د ئینن زێده‌تر ل قوتابخانێن سه‌ر ب حوكمه‌تێ ڤه‌نه و كچ و كوڕێن خێزانێن هه‌ژارن، هه‌روه‌سا بسه‌د ده‌ردو به‌لا قوتابی هه‌تا پۆلا شه‌شێ ئاماده‌یی دوماهی د ئینیت و دچیته زانكۆیێ بۆچی بارگرانینه لسه‌ر حوكمه‌تێ، ئه‌ركێ حوكمه‌تا هه‌رێما كوردستانێ گرنگیا زێده‌تر ب زانكۆیێن حوكمه‌تێ بده‌ت و ده‌لیڤێن زێده‌تر یێن خواندنێ بۆ قوتابیان دابین بكه‌ن، چونكه دێ بیته ئه‌گه‌رێ پێشكه‌فتنا ئاستێ مه‌عریفی و زانستی ل هه‌رێما كوردستانێ، قوتابیێن زانكۆیان هه‌ر ئه‌ڤن یێن دناڤا جڤاكێ مه‌دا چووینه زانكۆیێن حوكمه‌تێ و فه‌ره گرنگی بهێته‌دان ب ئه‌ڤان زانكۆیان و پشتی ده‌رچوونێ ده‌لیڤێن كاری بۆ بهینه دابین كرن.
گولستان باقی دبێژیت” ئه‌م دێ هه‌موو بزاڤه‌كێ كه‌ین بۆ وه‌رگرتنا قوتابیان ل زانكۆ په‌یمانگه‌هان و ئه‌ڤساله‌ژی هه‌گه‌ر پێدڤی كر دێ بڕیارێ لدۆر داشكاندنا بهایێ خواندنێ بده‌ین، چونكه سالانه هژماره‌كا زۆرا قوتابیێن ده‌رچوویێن شه‌شی ئاماده‌یی ب پاره درێژیێ ب خواندنێ دده‌ن و ژبه‌ر نمره‌یێن كێم یان ب سیسته‌مێ پاڕالێل تێنه وه‌رگرتن ل زانكۆیێن سه‌ر ب حوكمه‌تێ یانژی دچنه زانكۆ په‌یمانگه‌هێن ئه‌هلی، هه‌ردو سالێن بۆری ئه‌م شیاینه هه‌تا راده‌یه‌كی هاریكاربین بۆ كێمكرنا كریا خواندنێ و ئه‌ڤساله دڤێت ره‌وشا ئابورا قوتابیان به‌رچاف بهێته وه‌رگرتن بۆڤێ چه‌ندێ كریه‌كا زۆر نه‌ده‌ن بۆ درێژیدان ب خواندنێ و وه‌ك هاریكاریه‌ك بۆ قوتابی و خێزانێن وان.