گولێن بەرزە ژ باغێ «موخلسی»
شیان مەهدی كانیساركی
هەتا نوكە مە گەلەك پەرتووك و ڤەكۆلین یێن دیتین و خواندین كو تایبەت لسەر بەرهەم و ژیارا هەلبەستڤانێ كلاسیكێ مەزنێ كورد « ئەحمەد ئەمین موحەمەد1890-1963ز « یان «ئەحمەدێ موخلس»، ڕۆژ بۆ ڕۆژێ تشتێن نوی و باشتر دهێتە ڤەدیتن و هەلبەستێن توزگرتی یێن دیاردبن كو هەتا نوكە ژی دبیت ژمارەیەكا مەزن مابن دبن تەخت و ستێڕكان ڤە ل بەیتۆن و سەرداڤێن مالان! د ڤێ ڤەكۆلینێ دا هێژایێ «هێڕش ڕێكانی» كۆمەكا هەلبەستێن موخلسی یێن نە بەلاڤبوویی بەلاڤكرینە و كۆمەكا مەزن ژی هەڤبەركرینە لگەل یێن ژمێژە بەلاڤبووین كو پتریا وان د «باغێ كوردان»دا ب شاشی یان كێماسی بەلاڤبووینە و نڤیسكاری ڕاستڤەكرینە و كۆمەكا دەستنڤیسێن نوی دیتی، بۆ خوە كرینە بنچینە، هەروەسان هەمی ئەو بابەت و ڤەكۆلین و پەرتووكێن دەربارەی هەلبەستڤانی و ژیانا وی هاتین نڤیسین ل بەشەكی ب ناڤێ «بیلۆگرافیا موخلسی» هاتینە دانان كو هەر ژ سالێن 1955ز هەتا دگەهیت سالا 2022ێ. بابەتەكێ د ڤێ پەرتووكێ دا سەرنجا من ڕاكێشا، ل لاپەڕ 46 دیاردبیت كو هەڤالێ هەلبەستڤانی «د.مەسعود كتانی 1933-2017ز» دبێژیت:(من ل سالا 1945ز من ئەحمەد ئەمین نیاسیە و من هەڤالینی لگەل كرییە و هەلبەست ژی مە پێكڤە ڤەهاندینە)، هەروەسان ل دوماهیێ دبێژیت:(من دیوانەكا هەلبەستێن وی ب دەستنڤیسێن وی بەرهەڤكرییە). یا دی نڤیسكار دبێژیت كو بەڕێز « ئەمینێ ئوسمان 1927-2003ز» ژی هژمارەكا هەلبەستێن موخلسی كۆمكربوون و وەك پەرتووك بەرهەڤكربوون، بەلێ نەهاتییە چاپكرن. تشتێ ئەز ئێشاندیم، ئەرێ ما چونكی ئەو جامێر»كەسێن دلسۆز» چوون بەردلۆڤانیا خودێ و نەمان، ئەرێ ما كەسێ جهێ وان نەگرتە؟ ئەرێ ما چ كەسەك لدویف خوە نەهێلایە بهێت و ڤی بەرهەمی چاپ بكەت یان هەر چ نەبیت بدەتە دەستێ ڤەكۆلەرەكی یان دەزگەهەكی چاپ بكەن، دێ ب سەدان قوتابی و مامۆستایێن مە ژێ مفادار بن، ما مفایێ وان هەلبەستان چییە د بن ستێڕك و تەختێن نڤستنێ و سەرداڤان ڤە د ڤەشارتی و توزێ بەرگێ وان بەرزەكری؟! هیڤیدارین وەبكەن ئەو دەستنڤیس و بەرهەم چاڤێ ڕۆژێ ببینن. هەژیە بێژم بۆ ڤێ ٭ڤەكۆلینێ كۆمەكا پەرتووكێن گەلەك باش ڤەكۆلەری بۆ خوە و ڤەكۆلینا خوە كرینە ژێدەر و بكارئیناینە. (سبحان الله) هەلبەستڤانێ مە ئەحمەدێ موخلس، كەسێ هندی وی بەرهەم نینە و نەبوویە، هەروەسان كەسێ هندی وی هەلبەست و بەرهەمێ بەرزە و ژدەستدایی ژی نینە، كەس وەكی وی یێ بێخودان ژی نینە! و بلا كەس شاش د پەیڤا «بێ خودان» نەگەهیت، مەرەما مە ئەوە كو ئەڤ خالێن مە ل سەری باسكرین، چ بنەمال چ ژی ڤەكۆلەر خوە لێبكەن خودان، چونكی مادەم بەرهەم و دیوان نڤیسینە، پرسیار ئەوە پا كیڤە بەرەزەبوون؟ ئەز باوەرم ئەڤ دیوانە یێن دژیانێ دا لێ ژبەر «تۆز و غوبارێ» نە دەنگێ وان نەژی ڕەنگێ وان دیارناكەت!
*پەرتووكا: ژ گولێن باغێ موخلصی. بەرهەڤكرن: هێرش كەمال ڕێكانی. بابەت: ڤەكولین. وەشان: پەرتووكخانا گازی. ژ.لاپەڕان: 410
