گول بهار هونه‌رمه‌ندا پڕ خزمه‌ت و نه‌مر
سه‌لاح جه‌میل سندی/ زاخۆ
ناڤێ وێ ( فاتما محه‌مه‌د ئه‌حمه‌د عه‌لی )یه ل سالا ( 1929)ێ، ل گونده‌كێ سه‌ر ب باژێرێ ( جوله‌مێرگێ) ل باكوورێ كوردستانێ هاتیه سه‌ر دونیایێ. هونه‌رمه‌ند ( ئه‌حمه‌د خه‌لیل) ناسناڤێ ( گول بهار) بۆ وێ دانابوو. هونه‌رمه‌ند گول بهارێ ل سالا (1963)ێ ده‌ست ب كارێ ستران گۆتنێ ل رادیویا به‌غدا به‌شێ كوردی كربوو، هه‌ر دهه‌مان سال دا ئێكه‌مین سترانا خۆ بناڤێ (كوڕێ گوندی به‌ژن دارێ حه‌یزه‌ران) بۆ رادیویا به‌غدا تۆماركریه. هه‌ر ل سالا ( 1963)ێ تاكو سالا ( 1987)ێ ( 285) ستران گۆتینه، به‌لێ هه‌می سترانێن خوه ل رادیۆیا به‌غدا تۆمارنه‌كربوون، پتریا وان ب شێوه‌یێ ڕاسته‌وخۆ به‌لاڤ كربوون.
گول بهار ل سالا ( 1973 )ێ دگه‌ل هونه‌رمه‌ند (محه‌مه‌د عارف جزیری و عیسا به‌رواری ) به‌شداری ڤیسته‌ڤالا به‌یدرا ل وه‌لاتێ لبنان دبه‌ت و ل سالا (1976)ێ دچیته وه‌لاتێ (نه‌مسا و فره‌نسا) و لوێرێ چه‌ند كۆنسێرتان سازدكه‌ت، هه‌روه‌سان ل سالا (1978)ێ ژی دچیته وه‌لاتێ (برێتانیا) و لوێرێ ژی چه‌ند كۆنسێرتان سازدكه‌ت و ل سالا (1981)ێ ژی دچیته وه‌لاتێ (ئه‌مریكا) و چه‌ند كۆنسێرتان سازدكه‌ت.
هونه‌رمه‌ند گول بهارێ چه‌ندین ستران ب دوقۆلی دگه‌ل هونه‌رمه‌ندێن كورد گۆتینه، وه‌ك هونه‌رمه‌ند ( عسیا به‌رواری، محه‌مه‌د عارف جزیری، عه‌بدولا زێرین، سه‌میر زاخۆیی، ته‌حسین ته‌ها،…
گول بهار ل سالا ( 1987)ێ خانه‌نشین دبیت و ل باژێرێ به‌غدا ئاكنجی دبیت و، پشتی پرۆسه‌یا ئازادكرنا عیراقێ ب هه‌ول و تێكۆشینا كۆمه‌كا ره‌وشه‌نبیرێن كورد و ب هه‌ڤكاریا حكۆمه‌تا هه‌رێما كوردستانێ ل رۆژا ( 18/3/2005)ێ مه‌ڕاسیمه‌كا رێزلێنانێ ل پارێزگه‌ها دهۆكێ بۆ دهێته سازكرن و هه‌ر ل پارێزگه‌ها دهۆكێ ئاكنجی دبیت و ل سالا ( 2007)ێ نه‌شته‌گه‌ریه‌كا چاڤی بۆ دهێته‌كرن به‌لێ ب ئه‌گه‌را هه‌له‌یا نه‌شته‌گه‌ریێ چاڤه‌كێ خوه ژ ده‌ست دده‌ت، پاشنێ ژی ل سالا ( 2008)ێ جه‌لته‌یه‌ك لێ دده‌ت و تووشی شه‌له‌لێ دبیت. هونه‌رمه‌ندا ده‌نگخۆش گول بهار ل سالا ( 2009)ێ دوماهی سترانا خوه بناڤێ ( چه‌لێ لبه‌ر چه‌لا ) ب هه‌ڤكاریا تیپا دهۆكێ یا مۆزیكێ به‌رهه‌م دئینت، به‌لێ ب مخابنیڤه ل رێككه‌فتی ( 23/2/2010)ێ ل باژێرێ به‌غدا كۆچا دوماهیێ دكه‌ت و لسه‌ر وه‌سیه‌تا خوه ل باژێرێ نه‌جه‌ف دهێته ڤه‌شارتن.
