گول و بارووت و عه‌ڤر
عارف حیتو
[بۆ: موئه‌ید ته‌یب]
د رۆژبوونا گوله‌كێ دا
بارووت د چاله‌كا نه‌دیتی دا ڤه‌شارتی بوو
عه‌ڤر.. ل نه‌ورۆزێ سه‌یرانی بوو.
بارووت ب ئاسنی ڤه شه‌رمكری و
ل به‌هه‌شته‌كا ده‌رڤه‌كری.. گول گرنژی
عه‌ڤر دچوونه هه‌مبێزێن هه‌ڤ.
عه‌ڤرێن خرش، قه‌یره دبن
بارووت خوه دخه‌ملینیت ل به‌ر خۆدیكێ و
گول د ناڤ ته‌قنێ دا دامایی!
د شه‌هیانا عه‌ڤره‌كی دا
بارووت.. ل بازارا ره‌ش دهێته كڕین و فرۆتن
ته‌ڤ گولێن گه‌ش، ژ به‌نده‌مانیێ سۆتن
بارووت د هه‌گبه‌یا خه‌ونه‌كێ دا
گول بریندار، د ناڤ په‌نجێن ته‌ڤنه‌كێ دا
عه‌ڤرێن ئاڤز ژ خوه سل كرن.
سۆرگوله‌كا د به‌ر به‌رچه‌ما كچكه‌كێ را
عه‌ڤره‌ك ره‌شێ نه‌گڕگڕی لێ عاشق بوو
قه‌ده‌مێن بارووتێ شكه‌ستن، چاڤ مالق بوو
گوله‌كێ بده من
دا بارووتێ د چاڤێن ته دا بنڤینم و
سترانه‌كێ، د گه‌وریا خوه دا بكه‌مه عه‌ڤر.
باره‌ك بارووتێ.. ل هێسترا من یا نه‌ساخ بكه‌ن
دێ ته‌ڤ گولێن چاڤه‌ڕێ پێ چرمسینم
چه‌ند خانه‌یێن په‌نجه‌شێرێ،
دێ د مه‌مكێن عه‌ڤری دا چینم..!
گومركه‌كێ.. زێده‌تر ژ پانیا ئاسمانی
بداننه سه‌ر، كورتان و هه‌ڤسارێ عه‌ڤری
بارووت دێ بیته له‌شفرۆش ل یانا شه‌ڤێ و
ب دزیكی ڤه، گول دێ ل بن به‌ران رازێن.
گول و بارووت..
د گرێبه‌سته‌ك دۆمدرێژ دا گه‌هشتنه ئێك
عه‌ڤر.. ل بیابانێ سه‌وداسه‌ر بوو!
عه‌ڤر و بارووت دو هه‌ڤڕكن..
هه‌می ده‌مان ب كین و ڕكن!
گولێ ئاخ دا ب پێكهاتنێ…
گول و عه‌ڤر دو عاشقن
نامه‌یان ل هه‌ڤ دگوهۆڕن و ب بای دتفقن
د ناڤبه‌را وان دا بارووت، یا بووی به‌كۆ…!
گول و بارووت و عه‌ڤر
د ره‌وشه‌ك ئاڤه‌رته‌یی دا بوونه چه‌تر
كو وێ هه‌ستا د هه‌گبه‌یه‌كێ دا نڤاندی و
د ناڤ ئاڤه‌كا گۆتنێن شه‌ڤێ دا نماندی
بكه‌ته شعر، شعره‌كا هه‌ر زێندی و نه‌مر
عاشقان پێ بهێت سه‌بر…
