گوندێن ده‌ڤه‌را بارزان دێ ژ پرۆژه‌یه‌كێ ئاڤێ مفاداربن
ئه‌ڤرۆ، ره‌مه‌زان زه‌كه‌ریا:
پرۆژه‌یێ ستراتیژیێ ئاڤا ڤه‌خوارنێ ل ده‌ڤه‌را بارزان كو مه‌زنترین پرۆژێ ئاڤێ یه پشتی دوماهیك هاتنێ دێ هژماره‌كا گوندا لێ مفاداربن بریاره بۆ وه‌رزێ هاڤینا سالا 2024 پرۆژه ب دوماهیك بێت و ئاڤ بگه‌هیته گوندێن دیاركری.
ئه‌ندازیار زیاب مقداد، رێڤه‌به‌رێ ئاڤا بارزان و ده‌وروبه‌ران بۆ ئه‌ڤرۆ گۆت: پرۆژه‌یێ ستراتیژیێ ئاڤا بارزان كو 51 گوندێن ده‌ڤه‌رێ دێ لی مفاداربن كاركرن ل سه‌ر پرۆژه‌ی به‌رده‌وامه بریاره بۆ هاڤینا سالا 2024 بكه‌ڤیته كاری و ئاڤا پرۆژه‌ی بگه‌هیته گوندێن دیاركری و تۆرا ئاڤێ بۆ هاتیه كێشان .
ناڤهاتی گۆت ژی: پڕوژه‌یێ ئاڤا 51 گۆندێن ده‌ڤه‌را بارزان هه‌تا نوكه 76% ته‌مام بوویه، بریاره بۆ هاڤینا سالا 2024 بكه‌ڤیته كاری و ئاڤ بگه‌هیته وان گوندێن كار ل سه‌ر هاتیه كرن و تۆر بۆ هاتیه دانان، كوژمێ 138 ملیار دینارا ل پرۆژه‌ی هاتیه مه‌زاختن لسه‌ر بۆدجێ وه‌زاره‌تا باژێرڤانی گه‌شت و گوزارا حوكمه‌تا هه‌رێما كوردستانێ.
ئه‌ندازیار زیاب ئاشكراكر: پڕۆژه‌یێ ئاڤا بارزان پروژه‌كێ ستراتیژییه، دێ ئاڤێ بۆ 51 گوندێ ده‌ڤه‌رێ دابین كه‌ت ل سنوورێ هه‌ردوو ناوچه‌داریێن بارزان و گوره‌توه ل ده‌ڤه‌را بارزان دگه‌ل سێ گوندێن سه‌ر ب ناوچه‌داریا دینارته وه‌ك گوندێن (هه‌رن و بیراكه‌پرا وپرێسه).
ناڤبری خویاكر: پرۆژه پێكهاتیه ژ جهێ وه‌رگرتنا ئاڤێ ل سه‌ر ڕووباری روی شین ل گوندێ بالندا جهێ پالاوتنا ئاڤێ 200 كیلۆ مه‌تر بوری دكتایل ب تیرێت جۆدا ل 100 ملم هه‌تا كو 500 ملم ب كار هاتینه بۆ ڤه‌گوهاستنا ئاڤێ ل گه‌ڵ 350 كیلۆ مه‌تر بوری پولی ئه‌سلین ب تیرێت جۆدا ل 75 ملم هه‌تا كو 200 ملم ب كار هاتینه بۆ تورا نافخویا گوندا .
رێڤه‌به‌رێ ئاڤا بارزان زێده‌تر گۆت: د ناڤ پرۆژه‌ی دا ئومبارێن ئاڤێ ل 300 مه‌تر سێجاركی هه‌تا 8000 مه‌ترسێجاركی هه‌نه و ب ته‌مام بوونا پرۆژه‌ی دێ مفایه‌كێ مه‌زن گه‌هیته گوندێن ئاڤ بۆ دهێته راكێشان و ئاریشا كێم ئاڤیێ ب ئێكجارێ دێ چاره‌سه‌ر بیت.
