گوندێ كۆچۆ دێ بیتە مۆزەخانا جینۆسایدا شنگالێ
ئەڤرۆ
دهۆك، لەزگین جوقی:
دەڤەردارێ شنگالێ دیار كر، گوندی كۆچۆ دێ بیتە مۆزەخانا جینۆسایدا شنگالێ و ل شوونا وی گوندەكێ نوو دێ هێتە ئاڤاكرن و هەموو تاوانێن تیرۆرستێن داعشێ د ناڤ گوندی دا دێ وەكو خوە مینن، داكو هەر كەسێ قەستا شنگالێ بكەت بزانیت تیرۆرستێن داعشێ ل سالا 2014ێ چو ب سەرێ ئێزدیان ئینایە.
نایف سەیدۆ، دەڤەردارێ شنگالێ ب وەكالەت بۆ رۆژناما ئەڤرۆ گۆت: «دەمێ تیرۆرستێن داعشێ ل سالا 2014ێ هیرشی سەر شنگالێ كری، ل وی دەمی هەموو خەلكێ گوندێ كۆچۆ دەستەسەركرن و د ناڤ قوتابخانەیا گوندێ دا كۆمكرن و كۆمەلكوژ كرن، نوكە بڕیار هاتیەدان گوندێ كۆچۆ ببیتە مۆزەخانا جینۆسایدا شنگالێ، لەو ئەو گوندە ناهێتە ئاڤاكرن و ب رەخ گوندێ كەڤن ڤە گوندەكێ نوو بۆ خەلكێ گوندێ كۆچۆ دێ هێتە ئاڤاكرن».
ئاشكرا ژی كر، رێكخراوەك دێ گوندەكێ نوو ل شوونا گوندێ كەڤن یێ كۆچۆ ئاڤاكەت و پتر ژ 100 خانیان بۆ خەلكێ كۆچۆ دێ هێنە ئاڤاكرن.
