گوهدار شێخۆ دێ پشته‌ڤانیا فوتسالا زاخۆ كه‌ت
زاخۆ، عەلی حاجی:
د داخویانیەکێ دا هشیار شەهباز سکرتێرێ یانه‌یا زاخۆ بۆ رۆژناما ئەڤرۆ دیار کر سه‌رپه‌رشتێ ئیدارا سه‌ربه‌خوه‌یا زاخۆ دێ پشتەڤانیێ ل تیما وان یا فوتسالا كچان كه‌ت و شیاینه دیرۆكێ تۆماربكه‌ن.
زێدەتر ناڤهاتی گۆت: پشتی تیما مه گه‌هشتیه یاریا دووماهیا خولا كوردستانێ بوویه جهێ شانازیا هه‌می وه‌رزشڤانێن زاخۆ و ژبه‌ر ڤێ چه‌ندێ گوهدار شێخۆ سەرپەرشتێ ئیدارەیا سەربەخویا زاخۆ بڕیاردایه پشتەڤانیا تیما مه بكه‌ت كو دێ کوژمه‌كێ پارەیی بشێوه‌یێ خه‌لات بۆ تیمێ كه‌ته دیاری وەکو دەست خوەشی و ئەڤ پشتەڤانیە بەری یاریا دووماهیا خولێ هێته پارڤه‌كرن، دیسان دەمەکێ نێزیک دا ژلایێ ئیدارەیا سەربەخویا زاخۆ دێ مووچە ب وێ تیمێ هێتە دان وه‌كو هه‌ر تیمه‌كا دی یا زاخۆ.
هه‌روه‌سان هشیار شه‌هبازی گۆت: ئاڤاکرنا ڤێ تیمێ ل سەر پێشنیارا من بوو ژبەرکو مه تیمێن کچان ل سەر ئاستێ پەروەردەیێن کوردستانێ ل زاخۆ هه‌بوون، له‌وما مە داخازکر ئەو تیم بهێتە کاراکرن و را‌زمه‌ندی ل سەر وێ داخازیێ هاتە کرن، ئه‌م د راهێنانێن خوه دا به‌رده‌وام بووین هەر چەندە ل دو یاریێن دەستپێکێ ئەنجام د باش نەبوون لێ ئه‌م نه راوه‌ستیاین و رژد بووین لسه‌ر هه‌ڤڕكیێ هەتا شیایین بگەهنە یاریا دووماهیێ، ئەو ئەنجامە ژی دل خوەشکەرە و دیرۆكی یە بۆ یانه‌یا زاخۆ و كچێن باژێرێ مه،سه‌رباری تیمێ هندەک گازندە هەبوون لێ نەبوو رێگر بەرامبەر کچێن زاخۆ و شیان ب د ماوەیێ حەفت هەیڤان دا قارەمانا خولێ خوسارەت بکەن.
