گوهدار شێخۆ: 81% یا جاددەیێن زاخۆ هاتینە قێركرن
زاخۆ، عەلی حاجی:
سەرپەرشتێ ئیدارەیا سەربخوە یا زاخۆ دیار كر، ب تنێ 19% ژ جاددەیێن زاخۆ ماینە نەقێركری و سەرۆكێ حوكمەتا هەرێمێ دوپاتی ل سەر هندێ كریە، پێدڤیە هەمی جاددەیێن زاخۆ بهێنە قێركرن.
گوهدار شێخۆ، سەرپەرشتێ ئیدارەیا سەربخوە یا زاخۆ بۆ رۆژنامەیا ئەڤرۆ گۆت: «ل سەر ڕاسپاردەیا سەرۆكێ حوكمەتا هەرێما كوردستانێ پێدڤیە هەمی جاددەیێن زاخۆ بهێنە قێركرن، بەری نوكە نێزیكی 70% یا جاددەیێن زاخۆ د قێرنەكری بوون، لێ د نوكە دا بتنێ 19% مایە قێرنەكری و دێ كار ل سەر وان جاددەیان ژی كەن یێن هەتا نوكە نەهاتینە قێركرن، لێ یا گرنگ ئەوە، كو هەمی جاددەیێن زاخۆ بهێنە قێركرن».
ناڤبری گۆتژی: «پشتی ئاڤرێژ د هندەك جاددەیان دا هاتینە دروستكرن، پشكەك ژ وان جاددەیان تێك چووبوون، لەوما د نوكە دا كار د پڕۆژەیێن وەكهەڤكرنا شوستەیێن زاخۆ دا دهێتە كرن، هەر دەما كارێ وەكهڤەكرنا شوستەیان ب دوماهی هات، كار د دروستكرنا وان جاددەیان دا دێ هێتە كرن، دیسا هندەك جاددەیێن دیتر ژی تێكچوو بوون د نوكە دا سەر ژ نوو ئەو جاددەیە هاتینە ڕاكرن و دوبارە دێ هێنە دروستكرن و قێركرن و كێشەیێن ترافیكی ژی دێ لێ هێنە چارەسەر كرن».
گوهدار زێدەتر گۆت: «سیستەمەكێ سەردەم و شێوازەكێ نوو د ناڤ جاددەیێن سەنتەرێ بازارێ زاخۆ دا دێ هێنە دانان، كو سیمایەكێ جوانتر بدەتە باژێرێ زاخۆ».
