گوهۆڕینێن رۆژهەلاتا ناڤین مژارا گەرم یا كۆڕبەندێ (مێپس) بوون ل دهۆكێ

بۆ دەمێ دو رۆژان كۆڕبەندێ ئاسایش و ئاشتیێ ل زانكۆیا ئەمریكی ل باژێرێ دهۆكێ (مێپس 2024) ب بەرهەڤبوونا سەرۆك بارزانی و چەندین سیاسەتەمەدار و كەسایەتیێن هەرێمێ و ئیراقێ و جیهانی هەروەسا 124 كەسایەتیێن ئەكادیمی ژ 40 وەلاتێن هاتە گرێدان و تێدا هەژمارەكا پانێل و ووركشۆپان ل دۆر رەوشا نوكە یا جیهانێ و رۆژهەلاتا ناڤین هاتنە پێشكێشكرن.
هشیار زێباری: رەفتارێن هندەك گرۆپان نێزیكە ئیراقێ بكێشنە دناڤ شەڕ و ناكۆكیێن دەڤەرێ دا
هشیار زێباری، ئەندامێ مەكتەبا سیاسییا پارتی د پانێلەكیدا ل كۆڕبەندێ مێپس راگەهاند» ژ ئەگەرێ رەفتارا نە بەرپرسیارانەیا چەند گرۆپ و ئالییەكێن نە دەولەتی و نە حكومی، نێزیكە ئیراقێ بكێشنە شەڕ و ناكۆكیێن دەڤەرێ، ڤێ چەندێ ژی ئەنجامێن باش بۆ نابن» .
گۆت ژی» گەندەلی گەفەكا جدییە ل بۆ وەلاتی و ب دیجیتالكرنا دارایی، دێ فاكتەرەكێ گرنك بیت بۆ روو ب رووبوونا گەەندەلیێ، هەروەسا ل ئیراقێ مە هەموو مەرجێن سەركەفتنێ یێن هەین، بەلێ مە حوكمڕانییەكا رێكوپێك نینە».
حەیدەر عەبادی: رۆژهەلاتا ناڤین ل پێشبەری گوهۆڕینێن بنەرەتی دایە
حەیدەر عەبادی سەرۆك وەزیرێن ئیراقێ یێ پێشتر ل كۆڕبەندێ مێپس گۆت» ئەڤرۆ رۆژهەلاتا ناڤین یا ل پێشبەری گوهۆڕینێن بنەرەتی دا، ئەوژی ژ ئەگەرێ وی شەڕێ ل دەڤەرێ هەی و ئەنجامێ جیۆ – سیاسیێ هەی و ئیراق ژی پشكەكە ژێ».
گۆت ژی» ستراتیژییا نوو بۆ ئیدارەیا ئەمریكی دێ هێتە پێش كو دێ كاریگەری ل سەر مە ژی هەبیت، هەروەسا دزانین ژی ململانێ ل رۆژهەلاتا ناڤین و ئۆكرانیا و ئاسیا یا هەی كو كاریگەرییەكا تمام ل سەر هەموو جیهانێ هەبوو».
خەمیس خەنجەر: ئیراق بەردەوام دەڤەرا دروستبوونا قەیران و ئاستەنگ و كێشەیایە
خەمیس خەنجەر، سەرۆكێ هەڤپەیمانییا سیادە ل كۆڕبەندێ مێپس یێ پێنجی ل دهۆكێ راگەهاند، رەوشا تەناهیێ یا خراب یا رۆژهەلاتا ناڤین، ئاستەنگ و دیاربوونا داعشێ، ئەگەرن بۆ تێكچوونا سەقامگیرییا هەموو دەڤەرا رۆژهەلاتا ناڤین، ئەو بابەت گرنگترین بابەتن كو د ڤی كۆڕبەندیدا ئاخڤتن ل سەر هاتیە كرن.
خەمیس خەنجەر گۆت ژی» نابیت ئەم پێكڤە رەفتارێ ل گەل هەموو وان بابەتێن مە باس لێكری بكەین، بەلكو پێدڤییە روونین و ئێك ئێكە دانوستاندنێ ل سەر بكەین، هەروەسا دەولەت بەرپرسا ئێكێیە ژ بەلاڤكرنا سیاسەتا رۆژهەلاتا ناڤین، لەوما دەولەت نەشێت پێشڤەبرنێ دابین بكەت، هەكە سامانی و دەستهەلاتێ دابەش نەكەت، هەروەسا نابیت ب چاڤێ رەخنەگرانە بنێرینە رەوشا جیۆ- سیاسی».
گۆت ژی» ئیراق بەردەوام دەڤەرا دروستبوونا قەیران و ئاستەنگ و كێشەیان بوو، دبیت دیاركرنا كێشەیان یا ب ساناهی نابیت، كو بووینە ئەگەرێ ژ دەستدانا سەقامگیریێ، هیچ پێدڤی ناكەت ئەم روونین ئاخڤتنان دوبارە بكەین، پێدڤییە ئەم ب كریار پێنگاڤان ب هاڤێژین، ل ڤێ دەڤەرێ ژ دەستدانا دیموكراسییەتێ، مە گەندەلی هەبوو، نەبوونا سیستەمێ دادوەری هەبوو و مە لاوازییا دەزگەهێن دەولەتێ مە هەبوو».
خویاكر ژی» هەموو یێن مە باس كرین، دبیت كارڤەدانێن كێشەیەكا كوورتر بن، كو پێك دهێت ژ كێشەیا هەرێمایەتی، ب تایبەت پشتی شەڕێ جیهانیێ دویێ و ژناڤچوونا دەولەتا عوسمانی».
رێبەر ئەحمەد: ب كارئینانا ئاخا ئیراقێ ژ ئالیێ گرۆپێن چەكدار ڤە رەت دكەین
رێبەر ئەحمەد، وەزیرێ ناڤخوە ل هەرێما كوردستانێ د چارچۆڤەیێ پانێلەكێ كۆڕبەندێ مێپس ل دهۆكێ، راگەهاند ب كارئینانا ئاخا ئیراقێ ژ ئالیێ گرۆپێن چەكدار ڤە رەت دكەین، ب تایبەتی هند ژ وان دژی بەرژەوەندییا ئیراقێ كار دكەن.
رێبەر ئەحمەد گۆت» د دەمێ بۆریدا مە دو لیوایێن هەڤپشك ژ پێشمەرگەی و لەشكرێ ئیراقێ پێكئینان و هەروەسا مە كارێ باش یێ ئەنجامدای و ئۆپەراسیۆنێن هەڤپشك ژی مە ل وان دەڤەرێ ڤالاتییا ئەمنی تێدا هەی، یێن كرین».
دیاركر ژی» ل باشوورێ كەركووكێ ڤالاتییا ئەمنی یا مەزن د ناڤبەرا لەشكرێ ئیراقێ و پێشمەرگەی دا یا هەی، ئەو ئاماژە ژی دبێژنە مە، كو دڤێت هەماهەنگی د ناڤبەرا بەغدا و هەرێمێ و جڤاكێ نێڤدولەتیدا هەبیت. دبیت ژی جارەكا دی پەیوەندیێن خوە ل گەل جڤاكێ نێڤدەولەتی رێك بێخین، نەشێین ب تنێ روو ب روویێ تیرۆرێ ببین، چونكە تیرۆر تنێ ل ئیراقێ نینە، بەلكو ل سووریێ و ل هندەك وەلاتێن دی ژی یا هەی».
شیرەتكارێ ئاسایشا نیشتمانییا ئیراقێ: هەرێما كوردستانێ نموونەیا پێكڤەژیانێ و لێبۆرینێیە
قاسم ئەعرەجی، شیرەتكارێ ئاسایشا نیشتمانییا ئیراقێ د پانێلەكێ كۆڕبەندێ مێپس ل دهۆكێ راگەهاند» هەرێما كوردستانێ ل 1991 هاتە پێكئینان و بوو پەناگەها سەركردەیێن ئیراقێ، هەروەسا دشێم بێژم هەرێما كوردستانێ نموونەیا پێكڤەژیانێ و لێبۆرینێ بوو، ئەڤێ چەندێ ژی كاریگەرییا ئەرێنی ل سەر ئیراقێ هەبوو».
گۆت ژی» د رەوشا نوكە یا ئیراقێ دا جهێ گۆتارا تائیفی نابیت» ئاشكرا كر ژی» ژ سالا 2022 هەتا 2024 مەزنترین پڕۆسەیا زڤراندنا كەسوكارێن داعشێ ژ كەمپا هۆل ل سووریێ بۆ ئیراقێ هاتە ئەنجامدان».
سەرۆكێ جڤاتا نوونەرێن ئیراقێ: گوهۆڕین ب سەر نەخشەیێ رۆژهەلاتا ناڤین دا یێ هاتی
د. مەحمود مەشهەدانی، سەرۆكێ جڤاتا نوونەرێن ئیراقێ د چارچۆڤەیێ كۆڕبەندێ (مێپس) گۆت» گوهۆڕین ب سەر نەخشەیێ رۆژهەلاتا ناڤین دا یێن هاتین، گرێیا ئالۆزییان ل وان جهێن كو هەبوون بەر ب دەڤەرێن دی بەرفرەهبوویە، د هەمان دەمدا رێككەفتنێن كەڤن گرنگی پێ ناهێتە دان».
گۆت ژی» دۆنالد ترەمپ، ل نێزیك دێ دەمێ سەرۆكایەتییا وی دەستپێكەت و دڤێت بزاڤێن سیاسی هەبن، هەروەسا ئەم ژی خوە ژ وان كێشە و قەیرانان دوور بگرین».
قۆنسلێ ئەمریكا ل هەولێرێ: پلانا حوكمەتا هەرێمێ بۆ بەرهنگاربوونا گەندەلیێ یا گرنگە بۆ پێشڤەبرنا ئابووری
ستیف بیتنەر، قۆنسلێ گشتیێ ئەمریكا ل هەولێرێ، ل كۆڕبەندێ (مێپس) گۆت» د دەمێ 20 سالێن بۆریدا پەیوەندیێن ئەمریكا و ئیراقێ زێدەتر پشتبەستن ب رەوشا ئەمنی ڤە كریە، بەلێ ل گەل هاتنا ئەلینا رۆمانووسكی وەكو بالیۆزا ئەمریكا ل بەغدا، دو سال و نیڤان بەری نوكە بزاڤكر سەرنجا وێ ل سەر ئالیێ ئابووری ژی بیت».
گۆت ژی» مە چار رەشنڤیسێن تێكگەهشتنێ ل گەل ئیراقێ هەبوون سەبارەت پشتبەستنێ ب وزەیا وەلاتێن دەوروبەر».
دیاركر « دخوازین وەبەرئێنانا ئابوورییا ئەمریكی ل ئیراقێ یا سەركەفتی بیت و مفا بۆ سەقامگیریێ هەبیت، سەركەفتنا ڤێ پڕۆسەیێ پێدڤی ب سەقامگیریێ یا هەی، بەلێ بۆ وێ سەركەفتنێ پێدڤییە ئیراق ژینگەها وەبەرئێنانێ پەیدا بكەت، ژ وان ژی پێشڤەبرنا زەلالیێ و بەرهنگاربوونا گەندەلیێ و حوكمێ قانوونێ».
ئاماژەكر ژی» دزانم حوكمەتا هەرێما كوردستانێ پلان بۆ بەرهنگاربوونا گەندەلیێ یا هەی، ئەڤە گەلەك یا گرنگە بۆ دوبارە ئاڤاكرنا باوەریێ، هەروەسا پێشڤەبرنا ئابووری».
پیتەر گالبرێت: حوكمەتا هەرێمێ د پرسا ئێزدییاندا گەلەك یا هاریكار بوو ل گەل مە
پیتەر گالبرێت، دبلۆماتكارێ ئەمریكی یێ بەرێ د كڤانیچ پانێلەكێ كۆڕبەندی دا گۆت» سوپاس بۆ هاریكاری و پشتەڤانییا مەسرور بارزانی، سەرۆكێ حوكمەتا هەرێما كوردستانێ، پرسا ئێزدییان، بابەتەكێ مرۆڤایەتییە، حوكمەتا هەرێمێ گۆتە مە دێ هاریكارییا هەوە كەین، وان ترۆمبێل وئێمناهی دابینكر و مۆلەتدا، لەوما دشێم بێژم نێزیكی 20 دایكێن ئێزدی ل گەل نێزیكی 30 زارۆیان ب دیدارا هەڤدو شاد بوون».
گۆت ژی» مخابن ئەڤە تراژیدییەكا راستەقینەیە چونكە دڤێت بزڤرن بۆ ناڤ جڤاكێ خوە، ئەو شاشییا وان نینە كو هاتینە رەڤاندن، ئەو شاشییا وان نینە كو دەستدرێژی ل سەر هاتیە كرن».
فەرهاد ئەترووشی: فیدرالی ل ئیراقێ تنێ درووشمە
فەرهاد ئەترووشی، ئەندامێ بەرێ یێ جڤاتا نوونەرێن ئیراقێ ژ فراكسیۆنا پارتی و پارێزگەرێ دهۆكێ یێ بەری د چارچۆڤەیێ پانێلەكیدا ل كۆڕبەندێ مێپس گۆت» حوكمەتا ئیراقێ بۆ بجهئینانا مادەیێ 140 یێ دستووری، یا خەمسارە، چونكە كاری ب دستووری ناكەت».
رۆهنكر ژی» دیاركرنا سنووران بابەتەكێ دستوورییە و ب رێكا مادەیا 140 ئەو بابەتە دێ هێتە رێكخستن و ئێكلاكرن».
ئەترووشی ئاماژەكر» دروستكرنا گرۆپێن چەكدار ل ئیراقێ كو گەفێ ل ئاسایشا وەلاتی دكەت، بەرۆڤاژی دستوور و قانوونێن كارپێكریە».
دوپاتكر ژی» ئیراق رۆژ ب رۆژ و ب شێوازێن جودا جودا دخوازیت هەرێما كوردستانێ وەكو تاكە هەرێما فیدرالی ل ئیراقێ لاواز بكەت».

کۆمێنتا تە