گوهۆڕینێن مەزن دێ د ناڤ ئاکپارتیێ دا هێنە کرن
پەرلەمانتارەکێ بەرێ یێ ئاکپارتیێ راگەهاند، پشتی سەرکەفتنا ئاکپارتیێ د هەلبژارتنێن پەرلەمانی دا ئەڤسالە دێ ئاکپارتی کۆنگرێ خوە ساز کەت و هەر ژ نها ڤە ئەردۆغان و هەڤالێن وی کار بۆ گوهۆڕینێن مەزن د ناڤ ئاکپارتیێ دا دکەن و دخوازن گرنگیەکا مەزن بدەنە گەنجان و ژنان.
محەمەد مەتینەر ئەندامێ بەرێ یێ پەرلەمانێ تورکیا سەر ب ئاکپارتیێ د بابەتەکا خوە ل رۆژناما یێنی شەفەق دا راگەهاند، کو پشتی ئاکپارتی د هەلبژارتنێن پەرلەمانی دا سەرکەفت و جارەکا دی ئەردۆغان وەکو سەرۆک کۆمارێ تورکیا هاتە هەلبژارتن، ئەردۆغانی هەر زوو گوهۆڕینێن مەزن د ناڤ کابینا حوکمەتێ دا کرن و نها ژی ئەردۆغان و هەڤالێن وی بەرهەڤیان بۆ هندێ دکەن د کۆنگرێ ئەڤسالە یێ ئاکپارتیێ دا گوهۆڕینێن مەزن بکەن، ب تایبەتی ژی ئەردۆغانی دڤێت گرنگیەکا گەلەک مەزن بدەتە ژنان و گەنجان و ژ بۆ هندێ ژی ڤێجارێ دێ گەلەک گەنج و کەسێن ئەکادیمی بنە ئەندامێ سەرکردایەتیا ئاکپارتیێ، بێگومان هندەک ژ سەرکردێن نها یێن ئاکپارتیێ ئێدی ل سەر دەستهەلاتێ نامینن.
ناڤهاتی ئەو یەک ژی دیار کریە، ئەردۆغانی دڤێت ل گۆر پرۆژێ خوە یێ بۆ تورکیا نوو گوهۆڕینێن بنگەهین د ناڤ ئاکپارتیێ دا بکەت، بێگومان ئەو گوهۆڕینێن ئەردۆغانی د ناڤ کابینا حوکمەتێ دا کری بوونە جهێ دلخوەشیا گەلێ تورکیا، نها ئالیگرێن ئاکپارتیێ چاڤەرێی هندێ نە گوهۆڕینێن مەزن د ناڤ ئاکپارتیێ دا ژی بهێنە کرن، هەرچەندە بەری نها گەلەک کەسان بەحسێ هندێ کربوون رەنگە د کۆنگرەی دا کەسەکێ دی ب جهێ ئەردۆغانی ببیتە سەرۆکێ ئاکپارتیێ، لێ هەتا نها چو تشتەک وەسا نینە و ئەردۆغان دێ جارەکا دی بیتە سەرۆک ئاکپارتیێ، لێ دبیت هندەک کەسێن گەنج و هەروەسا کەسێن ئەکادیمی ببنە ئەندامێن سەرکردایەتیێ، چونکی ئەردۆغانی دڤێت ئاکپارتی ببیتە پارتەکا گەنج، ژ بەر هندێ ژی هەر ژ نها ڤە دەست ب بەرهەڤیان هاتیە کرن و وەسا دیارە دێ ئەنجامێن خوە یێن باش ژی هەبن.
ئەو یەک د دەمەکێ دایە کو بەری دو حەفتیان هژمارەک ژ نڤیسەرێن تورکیا ئاماژە ب هندێ کربوون، نها د ناڤ ئاکپارتیێ دا بەحسێ قۆناغا پشتی ئەردۆغانی دهێتە کرن، چونکی رەوشا ساخلەمیا ئەردۆغانی یا باش نینە و هەروەسا ئەردۆغان ئێدی نەشێت ببیتە سەرۆک کۆمارێ تورکیا ژی، ژ بەر هندێ نها گەنگەشە ل سەر هندێ دهێنە کرن کو هاکان فیدان وەزیرێ دەرڤە یێ تورکیا جهێ ئەردۆغانی بگریت، چونکی باوەریا ئەردۆغانی گەلەک ب هاکان فیدان هەیە و فیدان دشێت پشتی ئەردۆغانی هەم ئاکپارتیێ برێڤە ببەت و هەم ژی وەکو سەرۆک کۆمار دشێت کەسەکێ سەرکەفتی بیت، لێ هەتا نها سەبارەت ب هندێ بەرپرسێن ئاکپارتیێ چو داخۆیانی نەداینە.
