گوهۆڕین د سیسته‌مێ په‌روه‌ردێ دا دێ هێنه كرن
هه‌ولێر، قائید میرۆ:
ل گوره‌ی قانوونا په‌روه‌ردێ یا كو نوكه ل په‌رله‌مانێ كوردستانێ، گوهۆڕین د كه‌رتێ په‌روه‌ردێ دا دێ هێنه كرن و بڕیارده‌را لژنا په‌روه‌ردێ ژی ل په‌رله‌مانێ كوردستانێ دبێژیت: سیسته‌مێ وه‌رگرتنا قوتابیان ژی ل زانكۆ و په‌یمانگه‌هان دێ هێته گوهۆڕین.
دكتۆر گه‌لاوێژ عوبێد، بڕیارده‌را لژنا په‌روه‌ردێ بۆ رۆژناما ئه‌ڤرۆ دیار كر، په‌رله‌مان نوكه مژوولی قانوونا په‌روه‌ردێیه و قانوونه‌كا نوو بۆ كه‌رتێ په‌روه‌ردێ ل هه‌رێما كوردستانێ هاتیه به‌رهه‌ڤكرن و گۆت: “بڕیاره د ڤێ خۆلا په‌رله‌مانی دا بهێته په‌سه‌ندكرن، ل گوره‌ی قانوونا په‌روه‌ردێ گوهۆڕینێن مه‌زن د كه‌رتێ په‌روه‌ردێ دا دێ هێنه كرن، چونكی سیسته‌مێ نوكه یێ په‌روه‌ردێ گه‌له‌كێ لاوازه و كاریگه‌ری ل سه‌ر لاوازیا شیانێن قوتابیان ژی كریه، به‌لێ ئه‌م د وێ باوه‌ریێ داینه پشتی په‌سه‌ندكرنێ دێ كه‌رتێ په‌روه‌ردێ گه‌شه‌یه‌كا زۆر بخوه‌ڤه بینیت”.
دكتۆر گه‌لاوێژ عوبێد ئاماژه ب وێ چه‌ندێ ژی كر، گوهۆڕینێن كه‌رتێ په‌روه‌ردێ د هه‌موو بیاڤان دا دێ هێنه كرن، هه‌تا دێ گوهۆڕین كه‌ڤیته سیسته‌مێ وه‌رگرتنا قوتابیان ژی ل زانكۆ و په‌یمانگه‌هان و گۆت: “نوكه ئه‌ز نه‌شێم به‌حسێ هووركاریان بكه‌م، چونكی هه‌تا ده‌نگدان ل په‌رله‌مانی ل سه‌ر نه‌هێته كرن و پڕۆژه نه‌بیته قانوون ئه‌گه‌ر هه‌نه گوهۆڕین تێدا بهێنه كرن”.
