گۆتنێن بێدهنگ كورد و رۆژنامهڤانییا توركی
رهوشا باكوورێ كوردستان هون ژی وهك مه دشۆپینن. ب راستی مه نه ب تهنێ شۆپاندنا، ئهم ههر دهم دناڤدا نه. ئا ههری داوی 3-4 رۆژ بهرێ ژ بۆ لێكۆلینا ئهز و چهند ههڤالێن خوه یێن رۆژنامهڤان ژ بۆ چووینا جزیرێ ئهم دهركهتن رێ. مخابن هێزێن ئهمنی ل ههر دهرێ رێ گرتنه و دهستوور نادن كو تو كهس بچه نسێبینێ. ههر چقاس ب كهسێن بهرپرس ره ئهم بكهڤن تێكلاتیێن ژی بێچاره ئهم ڤهگهریان. بالكێشه كو د وێ رێیا قهدهخه دا رۆژنامهڤانێ تورك ل بهر مه دهرباس بوو و چوون نسێبینێ. دهما من پرسی، بهرسڤ ژی بالكێش بوو. د گۆت كو پۆلیسێن سڤیل; ئهو رۆژنامهڤان فهرماندارێن لهشكهری ناس دكهن، ژ بهر وێ ئهو دهرباس بوون. یانی دبێ كو ژ بۆ هون ژی دهرباس ببن پێوسته كو فهرماندارێن لهشكهری ناس بكن. مه سهردانا قهیماقامێ جزیرێ كر لێ مخابن گۆتن ئهمێ نها چارهسهر بكن لێ ئهم بێ بهرسڤ هشتن. پۆلیسێن كو رێ گرتبوون گۆتن كو د رێیا مدیاد و خهزهخێ دا بچن وێ دهمێ هون دكارن بچن جزیرێ. بێچارهیی یه مه ژی وهسان كر و ئهم كهتن رێ. ل خهزهخێ ئهم ژ كۆنترۆلا دهرباس بووین و بهر ب جزیرێ ڤه چووین. ئێدی ب بوو ئێڤار و د تێكهتنا جزیرێ دا هێزێن ئهمنی كنترۆلێن خوه پرتر كربوون. د كۆنترۆلا ناسنامهیێن مه دا تو ئاستهنگیهك دهرنهكهت. لێ مخابن ژ بهر كو ئهم رۆژنامهڤان بوون ب قاسێ سهعهتهكێ ئهم ل وێ دهرێ دان راوهستاندن.
یا بالكێش نه تهنێ ئهڤه بوو. پۆلیسێن سڤیل گۆتن كو هون نكارن تێكهڤن جزیرێ. من ژی گۆت ما چوونا ناڤ جزیرێ ژی قهدهخه یه? پۆلیسان گۆتن كو; چوونا ناڤ جزیرێ نه قهدهخه یه لێ ژ بۆ رۆژنامهڤانا قهدهخه یه. ل بهرپرسێ ئهنفۆرماسیۆنا رۆژنامهڤانا گهرهاین لێ وی بهرپرسی ژی گۆتبوو نههێلن رۆژنامهڤان داكهڤن جزیرێ! ئهز ب خوه ل بهرپرسێ ئهنفۆرماسیۆنێ گهرهام و من گۆتێ: ئهڤه چ هاله? گۆت: دڤێت هون بچن ئامهد و ل وێ دهرێ سهردان بكن. من تهلهفۆنا خوه دا پۆلیس و ئهو ب بهرپرسێ ئهنفۆرماسیۆنێ ره ئاخفی و پشتێ كو ئاخافتن ب داوی بوو پۆلیس گۆت: وێ نها ل مه بگهرههت و وێ بهرسڤ ب دهت. وهك كو پۆلیسی گۆتی، پشتی چهندهكێ بهرپرسێ ئهنفۆرماسیۆنێ گهریا لێ نه ل تهلهفۆنا پۆلیس ل یا من گهریا. گهلهك بالكێش بوو وی دگۆت قهی ئهز ژی پۆلیسم و وسان ئاخفی; “كهكێ مهئموور، ئهڤانا رۆژنامهڤانن و ئهم نزانن كو وێ ل جزیرێ چ بكن. ژ بهر وێ هون دهستوور نهدن وان رۆژنامهڤانا و وان نهكن جزیرێ” پشتێ ڤێ ئاخافتنا بهرپرسێ ئهنفۆرماسیۆنێ من ژێره گۆت كو; “ما چ زهرارا مه ژ وه ره ههیه?” ههری بالكێش ئهو بوو كو تێنهگهشت كو ئهز رۆژنامهڤانم و بهردهوام كر; “یا باشتر هون ڤان رۆژنامهڤانا ئاستهنگ بكن و نههێلن، بلا نهچن جزیرێ”
ب راستی ژی ئهو دیالۆگ گهلهكی بالكێش بوو و من دیت كو دهستوور ژ بۆ رۆژنامهڤانێ كورد نایێ داین. ئهم ڤهگهریان مدیاد و وێ شهڤێ ل مدیادێ ماین. رۆژا دن دووباره مه جهرباند و دیسا سهناریۆیێ وان وهك ههڤ بوو. ئهم ژی چوون خهزهخێ و مه ل وێ دهرێ لێكۆلینێن خوه كر. ب راستی ژی خهزهخ ژی وهك جزیرێ هاتبوو تالانكرن و وێرانكرن. دهما مه لێكۆلینا دكر پۆلیسێن سڤیل و فهرمی ب ماشینهیێن زرخی ل پهی مه بوون و دیاره كو ژ مه ئاجز ببوون. دخواستن كو باندۆرا مهترسیێ ل مه بكن.
ئهز دخوازم بێژم كو; ل باكوورێ كوردستان مخابن رۆژنامهڤانی كهتیه بن كۆنترۆلا حوكمهتێ. ئهو كهسێن كو د بن كۆنترۆلا حوكمهتێ دا نهبن مافێن وان ئێ شۆپاندنا ههقیقهتێ نینه. یانی رۆژنامهڤانی ل گۆر حوكمهت و دهولهتێ دمهشت. ل گۆر وان ئهم نه رۆژنامهڤانن. گهلۆ رۆژنامهڤانی كارهكه كو ناسنامهیا وێ حوكمهت ددهت مرۆڤی? ل گۆر ئاگههیێن مه رۆژنامهڤانی كارهك ئازاده و ل بن كۆنترۆلا تو كهسێ دا نینه.
