گۆتنێن بێدهنگ: مهههپه “ئین” و جهههپه “ئاوت”
بهلێ راسته تبلێنێن مه وهستیان ژ نڤیساندنا بێ حقوقیا توركیا. لێ پاراوڤانێن حوقوق و دهولهتێ نهوهستیان ژ بنپێكرنا مافێن مرۆڤان. ههر ئهو چقاس مافێن گهلان بنپێ بكن ئهم ژی ئهوقاس و زێدهتری وا ژی دێ تبلێن خوه وهستینین و بنڤیسن. مرۆڤ ب مافێن خوه ههنه، ژ بهر وێ گهل ژی ب مافێن خوه ههنه. یانی دهولهت نكارن مافێن گهلان بنپێبكن.
ههیئهتا پهرلامهنتهرێن جهههپێ هاتن باكوورێ كوردستان و لێكۆلین و ههڤدیتنا پێك ئانین. مخابن ل ههر دهرێ پهرلامهنتهرێن جهههپی ژی هاتن ئاستهنگكرن و دهستوور نهدان كو ئهو ژی تێكهڤن قادێن وێرانكری. بالكێشه كو بهریا ههیئهتا جهههپ 3-4 رۆژ بهرێ 3 پهرلامهنتهرێن مهههپێ هاتبوون ئامهدێ و چووبوون جیهێ قادا شهر و قهدهغه. یانی دهرباسێ سوورێ ببوون و ل بهر منارا چارلنگ ژ بازبهران ژی دهرباس ببوون. د وێ دهرباسبوونا وان دا تو ئاستهنگی تنه بوون و ههر وهها ل جهم وان رۆژنامهڤان ژی تنه بوون. پشتێ چهند رۆژان ل سهر ئینتهرنهت هاته خویاكرن كو پهرلامهنتهرێن مهههپێ هاتنه ئامهد و چوونه جیهێ قادا قهدهغه. ههیئهتا جهههپێ ل ئامهدێ ب شارهدار، والی و كۆمهلهیێن جڤاكی ره ههڤدیتنا پێك دانی. د بهرنامهیا وان دا سهردانا جیهێن قادا شهر ژی ههبوون لێ بهس ل بهر بازبهرێن پۆلێسان راوهستیان. یانی دهرباسێ جیهێن قهدهغه نهبوون. د شۆپاندنا ههیئهتا جهههپێ دا من ژ بهربرسێ ههیئهتێ د پرسیا و گوتێ; “هون چما دهرباسێ ئالیێ دن نهبوون? گهلۆ والی ئان ژی هێزێن ئهمنی دهستوور نهدا وه? ههگهر وهسان بت، چما ژ بۆ پهرلامهنتهرێن مهههپێ دهستوور ههیه ژ بۆ وه و ههدهپێ نینه?
ب راستی پهرلامهنتهرێ جهههپ ژی مات مایی ما و بهرسڤ نهدا. تهنێ گوت كو; “مه پێداگیری ژ دهرباسبوونا بازبهران نهكر” پشتێ كو ههڤدیتنێن ههیئهتا جهههپی ب داوی بوون ل ناڤهندا جهههپێ لقێ ئامهدێ داخویانیهك هاته داین. د وێ داخویانیێ دا ئهز ژ بۆ دووبارهكرنا پرسا خوه بهشدار بووم. پشتێ ئاخافتنێن وان من ل سهر رهوشا ئاستهنگكرن و گرتنا رۆژنامهڤانێن كورد پرس كر. ب تایبهت كو ل باكوورێ كوردستان رۆژنامهڤان تێن ئاستهنگكرن و گرتن. پشتێ كو بهرسڤ دان و داخویانیێ ب داوی بووی، بهرپرسێ ههیئهتێ و پهرلامهنتهرێ جهههپێ ب تایبهتی ژ من پرسیار كر. گوت كو; “ته بهحسا پهرلامهنتهرێن مهههپێ كر، ئهو كی بوون? كهنگێ دهرباس بوون? “ من ژی بهرسڤا وی دا و من گوت “ل سهر ئینتهرنهتێ هاتیه پارڤهكرن كو 3 پهرلامهنتهرێن مهههپێ هاتنه ئامهد و دهرباسێ قادا شهر بوونه. “ من دووباره پرسیار كر; “هون دهرباس نهبوون ئان ژی والی دهستوور نهدا ههوه?” بهرسڤ وهك كو وه ژی تهخمین كر، والیێ ئامهدێ دهستوور نهدا بوون. یانی ههیهتا جهههپێ ئانی زمان كو والیێ ئامهدێ و هێزێن ئهمنی دهستوور نهدانه وان كو بچنه بهر منارا 4 لنگ ژی و قهرنهفلێن خوه ژ بۆ بیرانینا تاهیر ئهلچی دهینن.
د دهما شۆپاندنا ههیئهتێ دا گهلهك رۆژنامهڤان ژی ل وێ دهرێ بوون كو ههیئهتا جهههپێ ل بهر بازبهرێن ئهمنی قهرنهفیلێن خوه دانین. یانی بفكرن كو دهولهتا ب ئاوهیهكی دهستوورێ نادهت هنهك پارتیان لێ ژ بۆ هنهك پارتیێن دن دهستوور ههیه. ههتا ئیرۆ ژ بۆ ههدهپێ دهستوور نهدهات داین لێ ڤێ جارێ ل باكوورێ كوردستان ئێدی جهههپ ژی تێ قهدهغهكرن. ب راستی ئهڤ تشتهك بالكێشه و دیاره كو ل سهر داخوازا حكومهتا ئاكهپێ یه. یانی مهههپ “ئین” و جهههپه “ئاوت”.
من وهك رۆژنامهڤانهك پرسێن خوه كرن و وهك نڤیسكارهك ژی دنڤیسم ژ بۆ ئاگاهداریێن زهلال و هشیارا رایا گشتی. مخابن وهك كو هون ژی دزانن ئێدی ئاگاهیێن زهلال ناگهیژن گهل. ژ بهر وێ ل باكوورێ كوردستان رۆژنامهڤان تێن قهدهغهكرن. لێ ههتا ئهم بكاربن ژ بۆ راستیێ ئهمێ ئاگاهیێن زهلال ب ههوه ره پارڤه بكن.
