گۆران سالح: ئه‌ز دزانم خه‌لكێ دهۆكێ حه‌ز ژ سترانێن من دكه‌ن
دهۆك، شاكر ئه‌تروشی:
سترانبێژێ به‌رنیاس (گۆران سالح) د دیداره‌كێ بۆ رۆژناما ئه‌ڤرۆ گۆت: دووماهی كارێ من یێ هونه‌ری ئه‌وه ل چه‌ند رۆژێن بۆری من كوكتێله‌ك چێكریه كو ژ چار سترانان پێك دهێت، سورانی و كرمانجی نه، مۆزیك ل ستودیۆیا عیماد عه‌لی ل دهۆكێ هاتیه چێكرن، ل چه‌ند رۆژێن بهێن وه‌ك ده‌نگ دێ به‌لاڤكه‌م، دووڤدا من ل به‌ره كلیپ ژی بكه‌م و دێ بزاڤێ كه‌م دیمه‌نێن كلیپێ ل هه‌موو باژێرێن كوردستانێ بهێنه وێنه‌كرن، بۆ زانین ئه‌ز گه‌له‌ك حه‌زژ خه‌لكێ ده‌ڤه‌را به‌هدینان دكه‌م و ئه‌ز دزانم خه‌لكه‌ك ل وێرێ گوهداریا سترانێن من دكه‌ن، بۆ زانین ل 2015 و 2016 من دو كونسێرت ل دهۆكێ گێرَاینه، هه‌كه نوكه ژی سازیه‌كا ره‌وشه‌نبیری ل دهۆكێ ب ئه‌ركێ رێكخستنا كونسێرته‌كێ ل دهۆكێ بۆمه رابیت ئه‌ز یێ به‌رهه‌ڤم بهێم.
هه‌روه‌سا گۆت: ژبلی مۆزیك و سترانان من كارێ ده‌رهێنانێ بۆ گه‌له‌ك كلیپان كریه، چنكو ئه‌و تایبمه‌تمه‌ندیا منه چنكو ئه‌ز ده‌رچوویێ تایێ ده‌رهێنانێ مه ل پشكا شانۆیێ ل په‌یمانگه‌ها هونه‌رێن جوان ل هه‌ولێرێ و نوكه ئه‌ز ماموستامه ل وێ په‌یمانگه‌هێ.
ده‌رباری چێكرنا ریكلامان كو ل ڤێ دووماهیێ هنده‌ك ریكلامێن بازرگانی چێكرینه، گۆت: ل هه‌موو جیهانێ كۆمپانی كه‌سێن به‌رنیاس داخواز دكه‌ن بۆ چێكرنا ریكلامان و براندێن خوه پێ دده‌نه نیاسین و ئه‌ڤه تشته‌كێ سروشتی و ئه‌و پارێ ئه‌ز ب ریكلامان وه‌ردگرم دێ ل به‌رهه‌مێن خوه یێن هونه‌ری مه‌زێخم و ستران و كلیپێن نوو پێ چێكه‌م و ئه‌ز دبێژم ئه‌ڤه باشتره ژوێ چه‌ندێ بچم داخوازا هاریكاریێ بۆ به‌رهه‌مێن خوه ژ هنده‌ك لایه‌ن و ده‌زگه‌هان بكه‌م.
