گۆشتێ ده‌ست و پێن خووشک و برایەکی ل ئاکرێ ژێڤەدبیت
نوش نيوز:
یوسف شەمسەدین مستەفا ژ دایکبوویێ ١-٨-١٩٩٠ و ساریا شەمسەدین مستەفا ژ دایکبوویا ٢٥-٢-١٩٩٧ێ یە دو خووشک و برانە و خەلکێ قەزا ئاکرێ نە پشتی ژیێ شەش سالیێ تووشی نەخۆشیەکا مەترسی و دەگمەن بووینە کو ئەو ژی گوشتێ دەست و پێن وان دکەڤیت و چەندین جاران ھاتینە برین.
حەجی زێرینگر خالێ ھەردو زارۆانە بۆ نوش نیوز ددەتە دیارکرن کو پشتی ژیێشەش سالیێ (یوسف و ساریا) تووشی ڤێ نەخۆشیێ بووینە ل دەست پێکێ پێن وان شەق شەق دبوون و عەداب دكه‌فتێ و کول دبوون، پشتی حەفت سالا کو چارەسەری بۆ نەھاتیە دیتن نەخوشیا وان زێدەتر لێ ھات پاشی دکتور نەچاربوون پێن وان ببڕن و کو ھەر ماوێ سێ ھەتا چوار سالا جارەکێ ھاتینە بڕین ل عيراق و دەرڤەیێ وەلاتی و ھەتا نھا ھەر ئێک ژ وان ھەتا چوار جاران دەست و پێن وان برینە.
زێدەتر گۆت کو ل ھەموو نەخۆشخانێن عيراقێ مە برینێ و مە پشکنینێن وان ھنارتینە چەندین وەلاتێن بیانی وان دگۆت ئەم دێ شێین نەخۆشیا وان راوەستینین، لێ پارەکێ زۆر پێ دڤێت و ئەو پارە دشیانێن مە دا نیە بۆ خەرج کەین.
حەجی زێرینگر گۆتژی: “دکتور دبێژن ئەڤە ل ڤێرە دبێ خودانن، ئەڤ نەخۆشە پێدڤی کەیف خوشکرنێ نە و ژ لایێ دەروونی ڤە بھێنە ئارامکرن و ئەو تشتێن وان بڤێت بۆ بھێتە دابینکرن، چونکو ئەڤ نەخۆشیە یا ب ئێشە پێدڤی وەستیانێ یە دا کو بارێ نەخۆشیا وان سڤک بیت”.
خالێ نەخۆشان ئاماژە دا وێ چەندێ کو ڤان نەخۆشا روژانە پێدڤی ب پاقژکرنێ یە، چونکی ٢٤ دەمژمێرا د بریندارن خوون ژێ دھێت و رۆژانە پێدڤی ب دەرمانا ھەیە و دەرمان و شرینقێن وان گەلەک د گرانن و دایک و بابێن وان ژی د شارەزا نینن ل سەر پاقژکرنا برینێن وان و زۆر زەحمەتی پێڤە دبەن.
ل دووماهیێ حەجی زێرینگر گۆت: “ئەڤ نەخۆشە نە یێن ھندێ نە د مال دا بمینن، پێدڤیە حوکمەت خۆ لێ بکەتە خودان و ھاريکاریێ لێ بکەت، وی دەمی حوکمەتێ ھاريکاری کر دەمێ مە برینە ئەنقەرە و ھەروەسا دکتور فەرھادی ژی گەلەک ھاريکاری کریە و پارێزگاری ژی دو عەرەبانە بۆ ھنارتینە، داخوازا مە ئەوە کو حوکمەت پتر ھاريکاربیت و ب تنێ ڤیزا بۆ مە دروست بکەت و ھەروەسا داخوازیا مە ئەوە ساخلەمیا دھۆک و ئاکرێ ل سەر نەخۆشیا وان بھێتە دەنگ و ھاريکاربن بۆ پاقژکرنێ و دابینکرنا دەرمانێن وان، چونکو دایک و بابێن وان گەلەک پێڤە ماندی دبن و دەرمانان ژی دکرن بارگرانیەکا مەزن ل سەر وان، دا کو بێ خودان نەمینن حوکمەت خۆ لێ بکەتە خودان”.
