گۆلیزار ره‌شید سندی: د ڤان رۆژان دا پتر ژ ملیۆن لیترێن پانزینێ دێ گه‌هنه هه‌رێمێ
ئه‌ڤرۆ، زنار تۆڤی:
جێگرا سه‌رۆكێ لژنا وزێ و سامانێن سروشتی ل په‌رله‌مانێ كوردستانێ بۆ رۆژناما ئه‌ڤرۆ دیار كر، د نوكه دا بابه‌تێ گرانبوونا بهایێ پانزینێ بوویه بابه‌ته‌كێ جیهانی و ل هه‌موو جیهانێ پانزین یا گران بوو و دبێژیت: رۆژانه ل هه‌رێما كوردستانێ مه پێدڤی ب شه‌ش ملیۆن لیترێن پانزینێ یا هه‌ی و د هه‌مان ده‌م دا رۆژانه پارزینگه‌هێن هه‌رێمێ دو ملیۆن لیترێن پانزینێ به‌رهه‌م دئینن، ئه‌ڤ رێژه‌یه ژی تێرا هه‌رَیمێ ناكه‌ت، له‌وما بهایێ وێ یی َگران بوو.
گۆلیزار ره‌شید سندی، جێگرا سه‌رۆكێ لژنا وزێ و سامانێن سروشتی ل په‌رله‌مانێ كوردستانێ خویا ژی كر، به‌ری چه‌ند رۆژان وه‌زیرێ سامانێن سروشتی یێ هه‌ریما كوردستانێ ل گه‌ل وه‌زیرێ نه‌فتا ئیراقێ كۆمبوویه و د وێ كۆمبوونێ دا وه‌زیرێ نه‌فتا ئیراقێ ئاماده‌یا خوه ده‌ربڕییه، كو رۆژانه ملیۆنه‌ك و 80 هزار لیترێن پانزینێ بۆ هه‌رێما كوردستانێ بهێنه هنارتن و گۆت: “650 دینار بۆ بهایێ هه‌ر لیتره‌كا پانزینێ هاتینه دیاركرن، زێده‌باری كرێیا ڤه‌گۆهاستنێ، د ڤان دو رۆژان دا ئه‌و رێژا پانزینێ دێ ژ ئیراقێ گه‌هیته هه‌رێما كوردستانێ”.
گۆلیزارێ گۆتژی: “مه وه‌كو لژنا وزێ و سامانێن سروشتی ل په‌رله‌مانێ كوردستانێ كۆمبوونه‌ك ده‌رباره‌ی بابه‌تێ گرانبوونا بهایێ پانزینێ ئه‌نجامدایه، مه تێبینیێن خوه هه‌موو نڤێسینه و ل رۆژا سێشه‌مبی دێ د كۆمبوونا په‌رله‌مانێ كوردستانێ دا دیار كه‌ین، د هه‌مان ده‌م دا مه ل به‌ره ل گه‌ل وه‌زیرێ سامانێن سروشتی یێ هه‌رێمێ كۆم ببین و ئه‌و ئه‌گه‌رێن گرانبوونا بهایێ پانزینێ و رێیێن چاره‌سه‌ریێ بۆ مه دێ دیار كه‌ت، ژ پێخه‌مه‌ت ئاریشا گرانبوونا پانزینێ بهێته چاره‌سه‌ركرن”.
