گۆپالێ خەمان
سەگڤان ئیسماعیل محەمەد
ڕۆژانەیێن خوە هەمی ب ئاوایەکێ نە ئارام د بۆراندن، ئەڤ چەندە وەکی دل گرانییەکێ ل جەم ئەوی پەیدا دبوون و هەست ب لاوازییا ژیانا خوە دکر، هەر جار دا بەرێ خوە د دەت سەر ئەڤراز و دا چاڤێن خوە نقینت و دا ئێکسەر دەستێ خوە هاڤێتە ئالییێ چەپێ یێ سینگێ خوە و دا پەرخینت و دا بیژیت: “ئەڤە نە ژیانە ئەز تێدا، دبیت د ئەڤێ ژیانێدا ئەزێ زێدە بم”. ئەڤ چەند گەلەک جاران دوبارە د بوو، هەر وەکی گازییا زارۆکی لێهاتبوو دەمێ داخوازێ ژ دایکا خوە د کەت د دەمێ تنێبونێدا، ئەڤ چەندە د بوو ئەگەرێ لاوازییا هەبوونا ئەوی.
ڕۆژ بۆ ڕۆژێ ئەڤ گۆمانا د سینگێ ئەویدا سەرهەلدا و وەکی فۆلکانەکێ سەرێ خوە ڕادکر و هەمی ڕیێن ژیانێ لێ بەرزە دکرن، هەر وەکی سێویەکێ بێ هەبوون د ناڤا کۆلانێن باژێریدا بێ ژیان و د ژیانا خوەیا بەرزە د گەرییا. دوبارە بەرەڤ بەرزەبوونا خوە پێنگاڤ پێنگاڤ د هاڤێتن و بەرەڤ وەغەرا خوەییا ئاڤابووی د چوو، ئالۆزییێ ژیان داگیر کربوو هەر وەکی عەورن بێمرادا ل سەر ژیانا ئەوی د گەرییان.
دگەل چوونا خوەیا ئارام ب ئاوایەکێ سەر هۆش و بێ پیلان، ژ نیشکەکێڤە هەر دو پیێن ئەوی ل هەڤ ئالزین و دەنگێ عەورەکێ بهێز هات، دەنگی سەرانسەری جیهانا ئەوی ڕەنگڤەدانا خوە کر و ئالۆزی گەهاند ژیانا ئەوی یا بەلنگاز، فریشتەیێن داخوازییا ئێکسەر دگەل دەنگێ بریسییا هاتنە خوارێ و گۆتنێ: “بتنێ تو داخواز بکە، دێ ژیانێ بۆ تە ئاڤاکەین و دێ هەبوونا تەیا بۆری ئەوا ڕەنگ ڕەش دێ هەمیێ کەینە سپی ڕەنگ”. ئێکسەر ب دەنگەکێ پری خەمۆکی گۆت: “ئەرێ دێ هوون وەکەن، لێ من نەڤێت هوون وەبکەن، بهێلن بلا ژیان وەکی خوە بچیت ڕەنگێ … لمن بیتە خەون بتنێ، گەلەک جاران مرۆڤ بژیت دگەل خەیالا خوە خوەشترە بگەهیت ئارمانجدارییا خوە. ڕێکا گاڤانی هێدی هێدی بەرەڤ لاوازییان چوو…دەستێ خوە هاڤێتە گۆپالێ خەمێن خوە و بەرەڤ وەغەرا خوەیا ئالۆز دچوو… ئالۆزیێن ژیانا خوە هەمی دانان بەر بانگێ هیڤییا و دانانە بەر هەوایێ وەرزێ خوەلیسەرییێ و رێکا خەما دا بەر گۆپالێ بێشەنسییا خوە، لێدانا دلی هێدی هێدی بەرەڤ تاریییێ دچوو… و ئێکسەر گەهشتە ستێرا بلند بتنێ.
