گۆڕستانا هزران
جۆتیار بانی
دلێ من ب ژانە
ژانەكا بێخودانە
یارەك دڤێت
لێ یارەكا بێوژدانە،
گاڤا نێز دبم
كارێ وێ پێڤەدانە
گاڤا دوور دبم
بۆ ژانا من تەك دەرمانە.
دلێ من ب ژانە
ژانەكا پڕ ب ڤیانە
ڤیانەكا بێ داوییە
ڕێیا وێ هەر بەرخوەدانە،
گاڤا ژێ بێئاگەه دبم
ب تیران من هشیار دكەت
كو ژ دەربا وێ بریندار دبم
ب نازێن خوە من سارێژ دكەت.
دلێ من ب ژانە
ژانەكا پڕ ژ هزرانە
هزرێن بێداوی
بالوولەكا ڕازانە
ل ناڤ هەر ڕازەكێ
شەڕێ پەیامبەرانە
ئەزێ بێ چەك و مەرتال
ل سەر سینگێ من
گۆڕستانا هزرانە.
