(گۆڕستانا وه‌غه‌رێ )
زهێر كوره‌ماركی
ئه‌ز به‌ند و مریدێ عه‌شقه‌كێ مه
مینا سیڤاندۆكا و ریچ و ریچا منه
هێلامه بێ په‌ر!
شه‌ڤ تا سه‌حه‌ر هه‌ڤالێ ستێرا مه
ڕۆندكێن خه‌ریبیا دبنه گه‌ڕ
ب فیغان و بێ فه‌ریادم
بێ خه‌و و خارن و زادم
هادێ چه‌په‌كێ …
بۆ ناڤ گۆڕستانا وه‌غه‌رێ باده‌م
ژبه‌ر كه‌توارێ بێ هش و كه‌ڕ
ب ڕۆژێ ژی دبمه كه‌تواره‌كێ ژه‌نگی گرتی
ل هیڤیا هیڤیه‌كا خۆناڤ گرتی
ل په‌رێن سیبه‌را عه‌شقێ دگه‌ڕم
خه‌ریبی و خه‌م چار وه‌رزێن منن
گه‌له‌ك سه‌نگین و چه‌ند منن؟
لێ عه‌شقێ په‌رێن هیڤیا نه‌وه‌راندن
ل سه‌رێ دۆریانا چاڤه‌رێنه دچكلینه
گوهێ وان یێ ب كه‌له‌كێ ڤه!
كه‌ڤاله‌كێ گۆڤه‌ندا هاتنا ته دئافرینن
دا عه‌شق نه بیته چه‌ند كه‌ر؟
هه‌رێ ب تازیمه ره‌شپۆشم
خوین و ڕۆندكا بۆ هاتنا ئه‌لندا ته دنۆشم
ل ناڤ خیزه‌لاكێن كۆلانێن عه‌شقێ ل ته دگه‌رم
ده‌روێشه‌كێ جه‌زبه‌گرتی و بێ هۆشم
به‌لكی ل ناڤ تیرۆژكێن كه‌نیا عه‌شقێ ..
هه‌ستێن هه‌مبێزاته تێر بگۆشم
من گۆتی ڤێجارێ …
خودان به‌خت و گه‌شه چه‌رخم
ته‌ڤ زیوان و هستری بۆقا ..
دێ ژناڤ زه‌ڤیا خۆ ده‌رخم
بۆ ئارمانجێ هێز و سیمه‌رخم
من نه‌زانی دیسا!
شڤان گورگ و وه‌ریس به‌رخم
ئه‌رێ وه‌ریس به‌رخم ؟
….
