گۆڤارا سڤۆرە رۆژا جیهانی یا زارۆیان ل دهۆكێ ساخكر
ب هەلكەفتا رۆژا جیهانی یا زارۆیان، گۆڤارا سڤۆرە یا زارۆیان، ب پشتەڤانیا ناڤەندا خانی یا رەوشەنبیری و راگەهاندنێ، دوهی بەری نیڤرۆ ئاهەنگەك بۆ زارۆیێن كارمەندێن سەر ب ناڤەندا خانی ڤە ل هولا ئێكەتیا نڤیسەرێن كورد/تایێ دهۆكێ گێڕا و هژمارەكا بڕگە و چالاكیێن هونەری هاتنە پێشكێشكرن، هەروەسا هژمارا نوو یا گۆڤارێ ل سەر زارۆیێن بەهەڤبووی هاتە بەلاڤكرن.
هەیفا عەلی دۆسكی، سەرنڤیسەرا گۆڤارا سڤۆرە د پەیڤەكێ دا گۆت: ئەڤە رۆژە ل هەموو زارۆیێن جیهانی ب تایبەت ژی یێن هەرێما كوردستانێ و پارێزگەها دهۆكێ پیرۆز بیت و ژبەر گرنگیا ڤێ رۆژێ بۆ زارۆیێن مە، مە وەك گۆڤارا سڤۆرە بفەر دیت ب ئەنجامدانا ڤێ چالاكیێ راببین و سوپاسیا ناڤەندا خانی ب هەموو سازیێن سەر ب وێ دكەین كو هەردەم پالپشت و پشتەڤانێن مە بووینە ژبۆ هندێ ئەم هەموو پێكڤە خزمەتا زارۆیێن پارێزگەها دهۆكێ بكەین و هیڤیا من ئەوە ئەم بشیێن ل پاشەرۆژێ باشتر خزمەتا وان بكەین ب تایبەت دوارێ ئەدەب و رەوشەنبیریا زارۆیان دا.
د ددووفدا (ئحسان ئامێدی) بەرپرسێ ناڤەندا خانی یا رەوشەنبیری و راگەهاندنێ، د پەیڤەكێ دا دەستخۆشی ل هەموو ستافێ گۆڤارا سڤۆرە كر بۆ رێكخستنا ڤێ چالاكیێ و دیاركر كو ئەو ناڤەندا دێ ل سەر هاریكاری و پشتەڤانیا خوە یا بەردەوام بۆ گۆڤارێ دبەردەوام بن و گۆت: ژبەركو زارۆك پاشەرۆژا مللەتێ مەنە، دڤێت ئەم هەموو حەزژ وان بكەین، هەروەسا پشتەڤان و هاریكارێن وان بین ژپێخەمەت ب دەستڤەئینانا هەموو مافێن وان یێن رەوا و دێ بەردەوام كاركەین ژبۆ هندێ ئەو د ژینگەهەكا تەنا و ئارامدا بژین، هەروەسا دێ بزاڤێن رژدتر كەین كو ل سەر بنگەهەكێ زانستی و ساخلەم بهێنە پەروەردەكرن، ل دووماهیێ چەند هەلبەست ژلایێ زارۆیێن بەهرەمەندڤە هاتنە خواندن، هەروەسا بڕگە و پەنەلێن هەمەرەنگ و بەریكانە هاتنە پێشكێشكرن و دووماهی هژمارا گۆڤارا سڤۆرە (289) و چەند دیاریێن دی ل سەر زارۆیان هاتە بەلاڤكرن.
