گۆڤارا (پەیڤ) ناسنامەیا ئێكەتیا نڤیسەرێن كوردە
سندس سالح سلێڤانەیی:
ب هەلكەفتا دەركەفتنا هژمارە (100) ژ گۆڤارا پەیڤ، ل ئێڤاریا رۆژا 3/7/2025چالاكیەكا رەوشەنبیری یا مەزن ل هولا ئێكەتیا نڤیسەرێن كورد/دهۆك هاتەكرن وچەندین بڕگە هاتنە پێشكێشرن و هژمارا نوو ژی یا وێ گۆڤارێ ب دیاری ل سەر بەرهەڤبوویان هاتە بەلاڤكرن.
ل بەراهیێ بەرێز(حەكیم عەبدوللا) سكرتێرێ نڤیسینێ یێ گۆڤارا (پەیڤ) د پەیڤەكێ دا پیرۆزی و دەست خۆشی ل وان هەموو نڤیسەران كر یێن كو هەر هژمارە (1) یا گۆڤارێ كو ل سالا (1993) بەلاڤ بوو، ب بەرهەم و نڤیسینێن خوە پشكدار بووین هەتا یێن هژمارە (100) و گۆت ئەم هەموو پێكڤە ب خامێ خوە دێ ژ بۆ خزمەتكرنا (پەیڤ) د بەردەوام بین.
د دووڤدا بەرێز(حەسەن سلێڤانەیی) سەرۆكێ ئێكەتیا نڤیسەرێن كورد/دهۆك و خودان ئمتیازێ گۆڤارا پەیڤ د پەیڤەكێ دا دیاركر كو كاروانێ پەیڤێ دێ یێ بەردەوام بیت ژ بۆ خزمەتكرنا ئەدەب و تویژا كوردی، چنكو گۆڤارا پەیڤ ناسنامەیا ئێكەتیا نڤیسەرێن كوردە و سوپاسیا بارەگایێ بارزانی و نڤیسینگەها سەرۆكێ هەرێما كوردستانێ و لقێ ئێك و پارێزگەرێ دهۆك و دەزگەهێ پالۆ كر ژبۆ پشتەڤانیا وانا بەردەم بۆ دەرخستنا گۆڤارێ.
پاشان دو سمینار هاتنە پێشكێشكرن، یا ئێكێ بۆ (نعمەت اللە نهێلی) كو سمینارا وی ل ژێر ناڤێ (رۆلێ گۆڤارا پەیڤ دوەرارا رەخنەیا ئەدەبی دا ل دەڤەرا بەهدینان) سمینارا دویێ ژی بۆ ماموستا (رەبیع زێباری) كو نامەیا وی یا ماستەرێ ل دۆر گۆڤارا پەیڤ بوو، سمینارا وی ژی ل ژێر ناڤێ (كارتێكرنا گۆڤارا پەیڤ دبۆارێ ئەدەبی دا) بوو.
ل دووماهیێ هەر شەش سەرنڤیسەرێن گۆڤارا پەیڤ هاتە خەلاتكرن، ئەو ژی نڤیسەرێ دێرین (ئەحمەد عەبدوللا زەرۆ) كو ئەو سەرنڤیسەرێ ئێكێ یێ گۆڤارێ بوو، و (د. عارف حیتۆ، ناجی تاها بەرواری، شوكری شەهباز) بوون و ڤان هەرچار سەرنڤیسەران ب كورتی بەحسێ سەربۆرا خوە كرن ل سەردەمێ خوە ل گەل گۆڤارا پەیڤ و دو سەرنڤیسەر ژی نەشیان بەرهەڤ ببن، یێ ئێكێ (د. فازل عومەر) كو د گەشتەكێ دا بوو ژ دەرڤەی وەلاتی و (محسن قۆچان) كو ژبەر رەوشا خوە یا ساخلەمیێ نەشیا پشكدار ببیت.
