گیاكێ بن حولیكا
دلدار محەمەد
خاندنگەهـ ڤەبوون، دڤیا پێدڤیان بۆ زاروكان بكڕی، ب تبلێن خۆ رۆژ هژمارتن بوونە دوازدە رۆژێن ب سەر سەرێ هەیڤێ دا بورین، هێشتا موچە ئاغای سلاڤی بەریكا وی نەكریە، دبن لێڤێن خۆڤە گۆت: هێشتا گەلەك یا مایی!
تێلەفونەك بۆ هات، بەرێ خۆدایێ لسەر نڤێسی بوو سەیدا گۆڕی ژ پەیڤێن وان دچوو، گەری ئاڤ بوو :
ـ سەیدا ببۆرە ژی بەلێ ئەز نەشێم باجا خەلەتیێن هەمیا بدەم، ئەگەر تە بڤێت هەما دێ دەست ژێ بەردەم.
زەنگلا مالێ هاتە لێدان و ئەوێ چانتەكا رەش ب قایشا خۆ ڤەكری، ستۆیێ خۆ خواركر، و پێنڤیس لڤاند پسۆلەكا هندی نیڤەكا موچەیێ وی كرە ددەستی دا .
ـ برا تۆ چ چارەیا بۆ خۆ نەبینی دێ بڕین، ڤێجا ب كەیفا تەیە!
خەم و ژانا بێ نڤستن شەڤا وی كرە سپێدە، رۆژ هەلات و هەمی رێك هێشتا د تاڕی نە، بەرەڤ بازاری ڤە بۆ سەركارێ ژ بارێ خەمێن وی گرانتر، ژ ژیێ وی مەزنتر، خودانێ تەكسییێ یێ ئەختیار دەرگەهێ كەلها بێدەنگیا سەرێ سحارێ شكاند:
ـ مامۆ ژ من عاجز نەبە بەلێ هین یێن ڤێگاڤێ گیاكێ بن حولیكانە !
