گەر تو هاتی
دلۆڤان هالۆ
(١)
گەر تو هاتی
دێ شەوقا تە
هەمی قولاچێن
ژیانا من یا تاری
ڕوون كەت !
(٢)
گەر تو هاتی
ژ بەر شەوقا دێمێ تە
دێ هەیڤ ژ شەرمان دا
خۆ ل پشت عەوران
ڤەشێریت!
و ستێر ژی
وەكی بەلگێن زەر و هشك
یێن داران
دێ ژ عەسمانی وەرن!
و گولێن باخچەیێن ڤی واری
دێ هەمی چرمسن
و سەرێن خۆ
بۆ بەژنا تە چەمینن!
(٣)
گەر تو هاتی
دێ ل من ڤەبن
هەمی دەرگەهـ!
باوەشا تە دێ بیتە
خۆشترین
و ئارامترین پەناگەهـ!
(٤)
گەر تو هاتی
دێ خەمێن من
وەكی باللندەیان
كۆچبەر بن!
و خۆشی
بەرەڤ دلێ من ڤە هێن!
(٥)
گەر تو هاتی
دێ ئەو داڤێن سپی
یێن كەڤتینە پرچا من
ڕەش بن!
و دێمێ من
یێ زەر و پێتی
ب دیتنا تە گەش بیت!
(٦)
گەر تو هاتی
دێ ب ئێكجاری
ژ تنێبوونێ جودا بم!
و ژ بارانا
دویری و خەریبییا تە
زوها بم!
(٧)
گەر تو هاتی
دێ پەرتووكا ڕابردوویێ خۆ
سۆژم!
و ئەو هیڤیێن من
د خواستن
دێ هەمییان سێدارە دەم!
(٨)
گەر تو هاتی
ئەز یێ كو ژ مێژە مریم
و ل گۆڕستانا عەشقا تە
هاتیمە ڤەشارتن!
دێ جارەكا دی ساخ بم
و ڕوح
ب سەر قالبێ من دا هێتە ڤە!
