گەشتیارێن بیانی ب دیتنا هاڤینگەهێن كوردستانێ د مەندەهۆشن
سندس سالح سلێڤانەیی:
سالانە د وەرزێ هاڤینێ دا هژمارا گەشتیاران ژ هەموو پارێزگەهێن ئیراقێ بۆ هاڤینگەهێن هەرێما كوردستانێ، ب تایبەت ژی ئەوێن دكەڤنە سنۆرێ پارێزگەها دهۆكێ زێدەتر لێ دهێن و پتریا گەشتیاران دلخۆشیا خوە ب دیتنا وان هاڤینگەه و جهێن گەشتیاری دەردبڕن و هندەك ژی دبێژن، ل وان جه خوارن و ڤەخوارن دگرانن و دخوازێ ژ رێڤەبەریا گەشتوگۆزارێ دكەن پتر چاڤدێریا وان جهان بكەن و بهایەكێ گونجای بۆ هەر تشتەكی ب دانن.
حەمید خزەیر، گەشتیارەكێ خەلكێ (بەغدا) یە، ب خێزان ڤە هاتبوو هاڤینگەها سیلاڤێ بۆ رۆژنامەیا ئەڤرۆ گۆت: سالانە د ڤی وەرزێ گەرمێ دا ب رێیا گرۆپان ئەم دهێینە پارێزگەها دهۆكێ و مە سەرەدانا پتریا هاڤینگەهێن وێ كریە، ب راستی ژی هەموو بۆ مە دخۆش بوون، ب تایبەت ل ڤێرە ل هاڤینگەها سیلاڤێ، چونكو سەقایێ وێ گەلەكێ خۆشە و ل ڤێرە ئەم هەست پێ ناكەین كو وەرزێ هاڤینێ یە و سوپاسیا برایێن خوە یێن كورد دكەین كو ب راستی د مێهڤان دوستن و گەلەك رێزێ ل مە دگرن.
ناجی سوهەیب، گەشتیارەكێ دی یێ خەلكێ (سەماوە) یە، ئەو ژی ب خێزانڤە هاتبوو هاڤینگەها ناڤبری، بۆ ئەڤرۆ گۆت: ئەو خۆشیا ئەم ل ڤێرە دبینین چو جاران مە ل باژێرێ خو نەدیتیە، چونكو ل دەف مە دونیا گەلەك یا گەرمە و ئامیرێن تەزیكرنێ ژی فایدێ مە ناكەن، لەورا مە ب فەر دیت بهێینە پارێزگەها دهۆكێ و مە شۆقەیەكا رایخستی بۆ هەیڤەكێ ب كرێ گرتیە و ل ڤێرە ئەم ب زارۆكڤە گەلەك د دلخۆشین و زارۆكێن من دبێژنە من (باب بۆمە خانیەكی ل ڤێرە بكڕە و ئەم چو جاران ناچینە باژێرێ خوە) و تشتێ گەلەك سەرنجا من ل ڤێرە راكێشای جوانیا دیمەنێن وێ یە، ب تایبەت ل دەمێ شەڤێ كو بایەكێ تەزی دهێت و دگەل دیمەنێن جوان تێكەل دبیت، ل وی دەمی هەست ب خۆشیەكا مەزن دكەین.
عوبەید حەمید، كو ب (بابێ موسا) ی دهێتە نیاسین، ئەو ژی خەلكێ (مووسل) بوو، ب خێزانڤە ل هاڤینگەها سیلاڤێ بوو، گۆت: د ڤێ هەیڤێ دا ئەڤە دو جاران ئەم هاتینە پارێزگەها دهۆكێ، جارا ئێكێ ئەم چوبووینە هاڤینگەهێن قەزایا ئاكرێ و ئەڤ جارە ئەم هاتینە سیلاڤێ، بەری دو رۆژان ئەم ل دەڤەرا بەرواریان بووین و مە جهێن جوان و دلڤەكەر دیتن و هندی سوپاسیا خەلكێ دهۆكێ بكەم بۆ وێ پێشوازی و رێزگرتنا ل مە هاتینە گرتن هەر كێمە.
