گەلەك جاران بەرهەمێن مە د سۆشیالێ دا بووینە ترێند
سندس سالح سلێڤانەیی
شڤان ناسر، گەنجەكێ خەلكێ دهۆكێ یە، نێزیكی (11) سالانە وەك (دۆبلێر) كاردكەت و نوكە خودانێ كۆمپانیەكا تایبەتە د بۆارێ دوبلاژێ دا و دەلیڤەیا كاری بۆ هژمارەكا گەنجان د وی بۆاری دا رەخساندیە و بۆ پاشەرۆژێ پرۆژەیێن مەزنتر د هزرا وی دا هەنە.
شڤانی بۆ رۆژنامەیا ئەڤرۆ گۆت: ل سالا 2016 ژ هندەك كارێن بچووك من دەست ب كارێ دۆبلاژێ كریە و ل دەستپێكێ من هندەك رۆلێن بچووك هەبوون، لێ ب بۆرینا دەمی من رۆلێ كەسێن مەزن ژی وەرگرتە و هەتا نوكە وەكو دەنگ پشكداری د هژمارەكا زۆرا بەرهەمێن هونەری دا، وەك (فلم و دراما و فلمێن دكیومنتاری) دا كریە و دێ یێ بەردەوامبم، چنكو گەلەك حەزژ ڤی كاری دكەم، هەروەسا هەتا رادەیەكێ باش خەلكەك من بڤی كاری دنیاسن.
هەروەسا گۆت: پشتی دەلیڤە هاتی من كۆمپانیەكا دۆبلاژكرنێ بۆ خوە ڤەكر و هەتا نوكە پتری (100) كەسان كو پتریا وان گەنجن و ژ هەردو ڕەگەزانە دەلیڤەیا كارنێ ل دەف من دیتیتە و هاتینە حەزێن خۆ لێ بجه ئیناینە وگەلەك جاران بەرهەمێن مە د سۆشیالێ دا دەنگڤەدانەكا باش هەبوویە و بووینە (ترێند) و پتریا رۆلێن من دەنگێ وان ئینای رۆلێن ئەڤینی بووینە.
