گەلەك جاران من دەست ژ سترانگۆتنێ بەردایە
هەرهین محەمەد:
سترانبێژ (سەربەست زاخۆیی) ددیدارەكێ دا بۆ رۆژنامەیا ئەڤرۆ گۆت: گەلەك رێ هەنە كو مرۆڤ پێ بەرنیاس ببیت، نەكو بتنێ ب رێیا سترانگۆتنێ و سترانگۆتن بۆ من ئارمانجەكە بشێم خزمەتا سترانا كوردی بكەم و سترانان ژی دبێژم نەكو ژبەر بەرنیاسبوونێ، یان داهاتەكی ب دەستڤە بینم و من كارێ خوە یێ تایبەت هەیە بۆ من داهات ژێ دهێت و پتریا سترانێن ئەز دبێژم یێن دەواتانە و سترانێن هەموو هونەرمەندان دبێژم ب تایبەتی یێن هونەرمەند (عەبدولواحد زاخۆیی) و من ستایلەك هەیە ل سەر دچم.
هەروەسا گۆت: ل دەوات و شەهیانان هەتا یازدە دەمژمێران ژی من ستران گۆتینە و بێ كو سترانێن من دوبارە ببن، یان ب وەستیم و ئەو سترانبێژێن كلیپان چێدكەن و خوە بەرنیاس دكەن نوزانم ئەوا چو مەرەم پێ هەیە، بەلێ ب دیتنا من خزمەتەكە بۆ سترانا كوردی یا رەسەن بتنێ هەكە پەیڤ و ئاواز و كلیپا وی یا باش بیت، چونكو ئەو سترانە دمینت و ئەو نفشێ ددوڤدا دهێت ئەو ژی دێ گوهداریێ كەن.
