گەلەک جاران کێشێن ژنێن مەھبیران دبەن چوینە دادگەھێ
ئه‌ڤرۆ نيوز:
شارەزایەکا جڤاکی وەسا ئاماژە دکەت کو گەلەک جاران کێشێن وان ژنێن ب دو گیان دکەڤن و مەھبیرانا دبەن دچنە دادگەھێ، چونکی دلێ وا ڕەش بویە ژ زەلامێ وان و ھەر تشتی لەورا تورە دبیت و خوە توشی رەفتارێن زڤر دکەت و زەلامی ژی نەزانیە و گەفێن بەردانێ لێ کرینە.
لورین نەوزاد کو ژنەکا ب دوو گیانە گۆت: ئەڤە حەفت ھەیڤە ئەزا ب دو گیان و ئەز ل ژورا ھەڤژینێ خوە نەنڤستیمە و دلێ من یێ ژ ھەڤژینێ من ڕەش بوی و حەز ناکەم وی بینم کەربین من ژێ ڤەدبن و ھەتا وی گەلەک جارا گەفێن لمن کرین و یا گۆتی تە ئێدی ئەز نەڤێم و ھندی دبێژمێ ئەزا نەخوشم نەشێم باوەریێ بو چیکەم دبێژیت دڤێت پتر حەز ژ من بکەی چونکی زارویێ من یێ دزکێ تەدا.
ش، س/ ژنەکە دبێژیت: ئەز ھاتبومە بەر دادگەھێ، چونکی من ھەر دگۆتە ھەڤژینێ خوە بھێلە ئەزا مەھبیرانا دبەم لێ ئەوی گۆت من باوەری ب وان تشتا نینە دیارە تو یا خیانەتێ ل من دکەی بو ناھێلی ئەز خوە نێزیکی تە بکەم و دگەل من یا کەیف خوش نینی ژبەرکو وەختێ من ئەو یان جلکیت وی دیتن دلێ من رەش دبو و نە بمن بۆ دختورا ژی دگۆت حالەتەکە دێ بوریت.
لدور بابەتی جڤاکناس چنار حەسەن دا زانین، ئەو کێشە گەلەک جاران ھاتینە دناڤ دادگەھێ دا و بوینە بەردان لێ ب رۆنشتنێن درێژ مە چارە کرینە و گۆت: پتریا زەلامان رەوشا مەھبیرانێن ژن دبەن نوزانن و ئەو بێزار دبن و دیسا ژن ب تورەیی ڤە بەرسڤێ دەن و زەلام ژی ھەست دکەت پەیوەندیا وان تێک چویە و بریارێن ترسناک ددەت.
چنارێ ئەو یەک ژی نەڤەشارت کو، حالەت ھەبوینە چوینە دچارچوڤێ بەردانێ ژی دا ھەموو ژ ئەگەرێ نە تێگەھشتنا وان و گۆت: لەورا مە بزاڤ کرینە چارە بکەین ژبەرکو ئەو زارویێ ژن ژبەر مەھبیرانا دبەت چ گۆنەھا خوە نینە بیتە قوربانی تورە بون و دل رەشیا ژنێ ژ ھەڤژینێ وێ.
ل داویێ تابیەتمەندا نەخۆشیێن دەروونی د. زیکرا ئەحمەد خویا کر کۆ، سرۆشتێ ژنێ وەسایە دەمێ دو گیانی و عادێ دا تورە دبیت و نەخوش دبیت و دلێ وێ ڕەش دبیت ژ ھەڤژینێ وێ و ھندەکا ژی دلێ وان ژ جورێن خوارنێ و مالێ ڕەش دبیت گەلەک ژی تورە دبن و خوە دئیشینن و یان توشی دل تەنگیێ دبن و ژ وێ دل تەنگیێ رەفتارێن توندو نە دروست دکەن و گۆت: لەورا پێدڤی یی زەلام رەوشا وێ بزانیت چونکی دو گیانی ئانکو دو کەس پێکڤە ھەر مرۆڤەک ژ وان سرۆشتەکێ ھەی و ئەوی زارویی کاریگەری ل سەر رەفتارێن دایکی ھەنە چونکی ھندەک گۆھرینێن فسیولوژی ل دەڤ ژنێ پەیدا دبن مینا گرانی د ھەموو لەشێ وێدا، ڤیجا ھەتا ژلایێ مێشکی ڤە ئەو ژنە جاران ماندی دبیت و حەز دکەت بتنێ بیت و ل جھێن خوەش و گەشت و گوزاری بیت، لەوا پێدڤی یە ژن بۆ زەلامی بێژیت کو رەوشا وێ ب ڤی رەنگی یە دا چ رەفتارین وەسا نەھێنە کرن کو پەشێمانی لدووڤ بھێت.
