گەلەک خەلك باوەریێ ب كارێ من دئینن
بێوار حەمدی:
نازدار جاسم عەبدوللا، كچەكا خەلكا دهۆكێ یە، بۆ دەمێ چەند سالانە كارێ فرۆتنا بەرهەمێن سروشتی و تێكەلكرنا كریمان دكەت، د دیدارەكێ دا بۆ رۆژناما ئەڤرۆ دبێژیت: د ژیەكێ بچووكدا من حەزژڤی كاری دكر و پشتی دەلیڤە هاتی من دەستپێكر و سوپاس بۆ خودێ خەلكەكی باوەری ب كارێ من دهێت و رۆژ بۆ رۆژێ هژمارا ئەو كەسێن سەرەدانا من دكەن د زێدەبوونێ دانە، هەروەسا ب ئۆنلاین ژی ل گەل وان یا بەردەوامم.
نازدارێ گۆت: ئەڤ كارە هزرا من ب خوە بوو پشتی من بۆچوونا خێزانێ وەرگرتی ئەو ژی دڕازی بوون و پشتەڤان بوون، لەورا ئەز ژی یا دلخۆش و بەردەوامم، چنكو ژلایەكی ڤە دشێم خزمەتا خەلكی بكەم و ژلایەكێ دی ڤە داهاتەك بۆ من ژێ دهێت دشێم هاریكاریا مالا خوە ژی بكەم و ئەڤە چێترە ژوێ چەندێ كو مرۆڤ یا بێ كار بیت، بۆ پاشەرۆژێ ژی هەر ب پشتەڤانیا مالا خوە دێ من پرۆژەیێن باشتر و بەرفرەهتر هەبن و هەموویان دێ ئێخمە دخزمەتا باژێرێ خوە دا.
