گەنجینەیا تەمەنی
مێڤان چێی
هێشتا سپێدەیەكا زوی بوو دەمێ ژ خەو رابوی، گەهێن وی رەق ببوون، ناڤا دەستێن وی ببوونە پەق، ب زۆری ژ وێ چالا تێدا نڤستی هاتە دەرێ و بەرەف كۆچكی چوو، ژمێژە خۆلیا وی سار ببوو و چ تێهن تێدا نەمابوو، وی پلان نەبوو خارنەكێ ئامادەبكەت، بەلێ وی ئەڤرۆ هەست ب سەرمایەكێ دكر و حەزدكر پیچەكێ خۆ گەرم بكەت پاشی بچیتە سەر كارێ خۆ، هەر چەندە وی پێدڤیێن چایێ نەمابوون، ژبلی دو نانێن رەق و كەرەكێ پیڤازێ و چەنگەكێ مێویژا چ دی د چانتێ وی دا نەمابوو. وی ئەڤرۆ هیڤیەك هەبوو دێ تشتەكی بینیت و یێ گەشبین بوو، لەورا وی گرنگی ب خارنێ نەدا، پێلاڤێن خۆ یێن كەڤن وۆتوزگرتی كرنە پێ خۆ و قەیتانێن وان باش شداندن و بەرەف كارێ خۆ چوو. دەمێ ب وی ئەڤرازی ڤە ژۆردا سەحكریە خارێ، وی گوندێ خۆ وەكی كەڤالەكێ پاییزێ ددیت، دویكێل ژ بانێن هندەك ژ وان بلند دبو و، ئەو رێكا ب زۆری تێرا ب سەركەفتی یا تژی بوو ژ وێ ئاخا وی ژ چالێ ئینایە دەر و تا بنی چوبوو، وی تەڤرێ خۆ یێ گران هەلگرت و ب وێ وزا كێم یا دجەستەیێ وی دا مای دەست ب كۆلانێ كر و هندی دكۆلا ب مەركا دەستك كورت دهاڤێتە دەرێ، جار جار بێهنا خۆ ڤەددا و ب هچكێن قەمیسێ خۆ یێ قرێژی خوه ژ ئەنیا خۆ پاقژ دكر و فرەك ژ ئاڤێ ڤەدخوار و جارەكا دی بەردەوامی د دا كۆلانێ، دەمێ دیسا ئەو گەهشتیە بەرەكێ مەزن د بنێ چالێ دا وی نەفرەت دباراندن و و مۆرالا وی تێك چوو، دەمەكی هەست ب برسەكا سەیر كر كو چ جاران بەری نوكە هەست پێ نەكری، وی ئەو كەتێن مێویژێن دبنێ بەریكا شەلوالێ خو دا ئینانە دەرێ و خوارن، بەلێ هەر وەكی چ جه نەگرتی، ژ چالێ هاتە دەرێ، بەرەف وارگەهێ خۆ یێ دبن بەرێ مەزن ڤە چوو، نانەك دگەل كەرێ پیڤازێ ب هاریكاریا ئاڤێ خوارن، بەلێ هێشتا یێ برسی بوو، سەحكرە نانا دی، بەلێ ئەو هێلا ژبەركو ئەو نزانیت كا دێ هەتا كەنگی ل ڤی چیایی بیت، وی ژی باوەر ژ خۆ نەدكر كو ئەڤرۆ خارنا دو – سێ رۆژان د ئێك جار دا خواری. تەمەنێ وی ژ شێست سالان بۆری بوو، رەنگێ رەش دناڤ مویێن پرچا وی دا نەمابوو، پیستێ وی چڕ ببوو و ب زۆری ب رێڤە دچوو، وی گیان و تەمەنێ خۆ دڤی كاری دا خەرج كربوون و ل هیڤیا بەرهەمێ ماندیبوونا خۆ بوو، دیسا دەمێ هەست ب سەرمایێ كری، رابوو و گۆتە خۆ: ئەگەر كار بكەم دێ گەرماتیا جەستەیێ من زڤریتە ڤە. پشتی چەند لێدانێن مەهولی یێن بهێز ئەو شیا بەرێ بنێ چالێ بشكێنیت و پارچەیێن وی ب هاڤێژیتە دەرێ، دەمەكی تەڤرێ وی ب تشتەكێ كەفت و دەنگەكێ جیاواز ژێ چوو و هەروەكی تەڤرێ وی ڤالا چووی، وی ب دەستا ئاخ ڤەدا، جەرەكێ مەزن دیت، كو لێڤا وی ژبەر لێدانا تەڤری شكەستبوو و سەر دەرێ وی تژی ئاخ ببوو. ل تەنشت مزگەفتا گوندی زەلام كۆم بوون و بەحسێ وی دكرن، موختاری گۆتە جیرانێ وی یێ نێزیك: باشە هوین چ ژوی دزانن؟ ئەڤر‌و من دویكێلا كوچكێ وی نەدیتیە، دێ یا باش بیت ئەگەر چەند گەنجەك بچن سەحكەنێ. هەر دوی دەمی دا چەند گەنجەك بەرەف چیای ب رێ كەفتن، جهێ وی یێ دیاربوو، هەما دا لدیف ئاخا ژ سەری ژۆردا هاتی دچن، دەمێ ئەو نێزیك بووی وان دیت ئەو ب پێنگاڤێن گران یێ ژۆردا دهێت، هەروەكی ئەوێن وی هەلگرتی تشتەكێ گرانە، ب زۆری دبنڤە دهات و هند بوو دا كەڤیت، دەمێ چاڤێن وی ب كۆما گەنجا كەفتی، هەڤسەنگیا خۆ ژ دەست دا و كەفت و بارێ لسەر پشتا وی بژیا و كەل و پەلێن دناڤدا ژۆردا گرێل بوون، دەمێ گەنجا ئەو پارچەێن د برسقن دیتی، وان ئاگەه ژ پیرەمێری نەما، ب كۆمكرنا پارچەیێن زێری و گران بەها ڤە مژیل بوون. چاڤێن وی دوماهیك وێنە بەرەف مێشكێ وی دبرن، دیت كو گەنج یێ خزینا وی ل دوماهیا تەمەنێ خۆ ڤە دیتی كۆم دكەن، بێی كو ئاڤریەكێ ل رەوشا وی بدەن. دیسا هەست ب سەرمایێ كر و ڤێ جارێ د ناخێ خۆ دا وی سار دبوو، جەستە یێ وی هاری نەدكر رابیتە ڤە و شیان نەبوون ئەزمانێ خۆ ژی ب لڤینیت، گرنژینەكا سار هاتە سەر دێمێ وی و بۆ دوماهی جار چاڤێن وی كەفتنە سەر ئێك.
