گەنجێن دەڤەرێ داخوازا ڤەكرنا رێیا ئاڤا مارك دكەن
ئامێدیێ، مەحمود نهێلی
بۆ هەیاما پتر ژ سالەكێ یە رێیا ئاڤا مارك ل گەلیێ رێكان ل سنورێ ناوچەداریا شێلادزێ هاتیە گرتن و هاتن و چوون لێ هاتیە قەدغەكرن كو ب دەڤەرەكا گەشتیاری دهێتە نیاسین و ئەڤە ژی بوویە ئەگەرێ هندێ وەلاتی دلگران ببن و رێژا بێ كاریێ ژی پتر ببیت و دخوازن ئەڤ رێیە بهێتە ڤەكرن.
ئێك ژ وەلاتیێن وێ دەڤەرێ ب ناڤێ قاسم بۆ رۆژناما ئەڤرۆ دیار كر، ئەڤە چەندین سالە رێیا گەلیێ رێكان هاتیە گرتن و هاتن و چوون تێدا نینە و گۆت: داخوازێ دكەین ئەڤ رێبە بهێتە ڤەكرن، چونكە ژیارا بەشەكێ زۆرێ خەلكێ دەڤەرێ ل سەر ڤی گەلی بوو، ئەڤە زێدەباری جهێن گەشتیاری یێن زۆر تێدا هەنە و جهێن چاندنێ و گوندێن خەلكی ل وێ دەڤەرێ هەنە.
وەلاتیەكێ یێ دەڤەرێ ب ناڤێ ئەڤراز ئەیوب دیار كر، گرتنا ڤێ رێكێ زیانێن زۆر گەهاندینە خەلكێ دەڤەرێ، ب تایبەتی ژی خەلكێ سیریێ و شێلادزێ و دێرەلۆكێ و گۆت: نوكە خەلك دهێتە سەر ڤێ ئاڤێ ژ بۆ بوراندنا دەمێن خوە، ب تایبەتی ژی ل وەرزێ هاڤینێ و گەرمێ، لێ مخابن نوكە نەشێن پێهەلتر بچن، چونكە ئەو دەڤەر نوكە یێ هاتیە داگیر كرن ژلایێ وەلاتێ توركیا ڤە و ئەو جهێن تورك ژی لێ نەبن جهەكێ ب مەترسیە ل سەر وەلاتیان، چونكە رۆژانە دهێتە توپ بارانكرن.
بەختیار ئەحمەد ئاكنجیێ سەنتەرێ پارێزگەها دهوكێ یە بو رۆژناما ئەڤرۆ دیاركر، ئەو ئەڤرۆ هاتینە ڤی جهی ژ بۆ مەرەما گەشت و گوزاری و گۆت: ئەڤە جهەكی گەلەك خوەش و دلڤەكەرن و ئاڤەكا زەلال و شین جهەكی گۆزاری، لێ مخابن وەك پێدڤی خزمەت بۆ نەهاتیە كرن وەك پێدڤی و دیار كر، ئەو رێكا دچیتە گەلی ژی هاتبا ڤەكرن دا گەلەك باشتر بیت و دەلیڤێن كاری دا پتر ڤەبن بۆ هاولاتیان و دا كەرتێ گەشت و گۆزاری ژی پتر پێشكەڤیت.
