گەنجێن مە ب هەموو كارا رازی نابن
هەرهین محەمەد:
خودانێ كوزمەتیكان دلوڤان ل دهۆكێ دیار كر، ئەگەرێ سەرەكی یێ بێكاریا گەنجان دایك و بابن، چونكو ئەو مایێ خوە د ژیانا گەنجی دكەن و هەر دەمەكێ درەنگ بچیتە سەر كاری، یان زوو بچیتە كاری ل وی دەمی دێ گازندا ژ خودانكاری كەن و زوو پشتا زارۆیێن خوە دگرن، ل وی دەمی ژی گەنجێ مە ب هەموو كاران رازی نابیت و رێژەیا بێكاریێ ژی دێ زێدەبیت.
دلوڤان میكایل، بەرنیاس ب دلوڤان كوزماتیك د دیدارەكێ دا بۆ بەرپەرێ گەنجان گۆت: ل دەستپێكا خوە من كارێ سەرتراشیێ كریە و باپیرێ من و بابێ من و برایێ من یێ مەزن ژی و نوكە برایێ من یێ بچووك ژی سەرتراشە و من ژ هەموویان پتر بەردەوامی دایێ و كورێ من یێ بچووكە و دبیت ئەو ژی فێربیت و گۆت: ب ڤی كاری من گەلەك كەس نیاسینە و هەر كارەكێ مرۆڤ بەردەوامیێ بدەتێ و ل بەر كارێ خوە ب راوەستیت دێ هەر ب سەركەڤیت.
زێدەتر گۆت: د بەر كاری َسەرتراشیێ را من كارێ كوزماتیكێ ژی كر و د سەرتراشخانا خوە ڤە من دفرۆتن و ل وی دەمی پتریا ئەو تشتێ من دئینا گرێدای زەلامان بوو، ئەو كارە گرێدای سەر تراشیێ بوو، لەورا من دەست هاڤێتە كوزماتیكێ و دەمێ ئەم دچووینە چینێ، یان توركیا، مە ژ وێرێ تشت دئینان و مە ل ڤێرێ دزانی جوانكاری و سەرتراش پێدڤی چنە، مە ژ نوو دئینا د بازاری دا.
دلوڤان خویاژی كر، نوكە ژی هەمان تشت دكەم ل دووڤ پێدڤیا جوانكاری و سەرتراشان كوزماتیكێ دئینم و كێمترین داهات بۆ مە ژێ بهێت ئەم ل سەر كاردكەین و سوپاس بۆ خودێ مە سەركەفتن د هەردوو كاران دا ئینا و من باوەری ژی ب خوە هەبوو دێ سەركەفتنێ ئینم د فرۆتنا كوزماتیكێ دا، چونكو ئەڤە نیاز و مرادا من بوو و من هەمی بزاڤ بۆ ڤی كاری كرن و بوومە سەرتراشەكێ بەرنیاس ل دهۆكێ.
ئەو یەك ژی نە ڤەشارت، ل سالا 2010 من سەرتراشخانا خۆ ل رێكا شاخكێ خۆل ڤەكرن و ل هینگێ حەمام و تەوالێت من د ژۆرڤە چێكربوون، ئانكو هەموو پێدڤیاتی من د وێ سەرتراشخانێ ڤە چێكربوون ژ بۆ خزمەتا گەنجان و نوكە مە سێ چار تایێن كوزماتیكی هەنە و ل گەل سەر تراشخانێ و نێزیكی 37 گەنجان ل دەڤ من كاردكەن ژ كچ و كوران و من هەموو كرینە تایبەتمەند و هەموو ل دەڤ من فێربووینە.
دلوڤانی ئاشكرا ژی كر، ئەو چەندە راستە دەمێ خودان كار دبێژن كارمەندێ خۆمالی بكێر ناهێت، ژبەركو یێ ژ خوە رازی یە و هەموو كاران ناكەت و هەموو گاڤان بزاڤێ دكەت بگەهیتە وێ چەندێ یا كو خودانێ كاری گەهشتیێ و ئەو گەهشتنا ئەز گەهشتیمێ ب ساناهی نەبوویە و گەلەك یێ وەستیام هەتا گەهشتیمە ڤێ قوناغێ و ئەڤ سەرەدەریا نوكە ئەز ل گەل كارمەندێ خوە دكەم ئەو سەرەدەری ل گەل من نەهاتیە كرن و هەموو پێدڤیاتی من بۆ ئامادەكرینە.
دلوڤانی زێدەتر گۆت: گەنجێ مە حەزناكەت ژ بێكاریێ قورتال بیت و هەكە كارمەند هەبان دبیت من كربانە 10 كوزمەتیك ل دهۆكێ و دبیت من سەنتەرەكێ مەزن یێ سەرتراشیێ ل دهۆكێ ڤەكربایە، بەلێ ژ بێ خودانی ئەز دخۆرا نابینم و گەنجێ مە ب هەموو كاران رازی نابیت، بۆچی دێ كەسەكێ بیانی ئینم یێ رێنجەبەرە و ئەز هاریكاریا وی دكەم.
دلوڤان كۆزماتیك دا زانین ژی، گەنجێ مە فێری بێكاریێ بوویە و پتریا وێ چەندێ 100% دایك و باب ئەگەرن و گەلەك كارمەند هاتینە نك من كاركریە و هندەك جاران درەنگ چووینە مال و هندەك سپێدەهیان ژی زوزكا كاری و ل وی دەمی دایك و باب گازندەیان دكەن دبێژن تە كورێ مە كوشت ب كاری ڤە و ل وی دەمێ دبێژمێ كورێ تە نەهاتیە نك من بنڤیت، یێ هاتی ئەز مووچەكی ب دەمێ و بۆچی وەسا نازدار و تەمبەل كەی بێژێ هەرە كار بكە و پتر ژ دەمێ خوە وەرگرە و ئەو كەسێن نوكە ماینە ل گەل من هەموو بۆ خوە بووینە مال و مەزن و ب كێر خوە هاتینە، چونكو هەموو دەمان دایك و بابان پشتەڤانیا وان كریە كاربكەن.
