گەنجێن مە دەمێ ل جهەكی كاردكەن ب دلسۆزانە ناكەن
هەرهین محەمەد:
خودانێ خوارنگەهەكا مللی ئەوێ گوتنا گەنج دبێژن دبێژیت كار نینە رەت دكەت، ژبەركو گەنجێن مە خوە ل سەر چ كاران ناگرن و ئەگەر دیت هندەك پارە كەفتنە د بەریكا وی دا دێ خوە بێ منەت كەت و ئەوی كاری هێلیت و گۆت: یێ ئامادەمە نوكە بۆ هەردوو تایێن خوە 50 كرێكارێن دی ژی بدەمە كاری و سێ تایێن دی ژی دێ ڤەكەم و دێ پێدڤی 150 كارمەندێن دی بم، لەورا ئەو جهێن كارمەندێن بیانی وەردگرن د مافدارن.
ئوسامە ئەسوەد جانگیر، خودانێ هەردو خانگەهێن شەعبو لەفەیە ل دهۆكێ بۆ رۆژناما ئەڤرۆ دبێژیت: یا ژ خەلكی ڤە ژیێ من هەموو ب ڤی كاری ڤە بوریە و ژ نوو ئەڤە چار سالە ڤی كاری دكەم، سوپاس بۆ خودێ و كەرەما وی ل گەل من كری، ل دەستپێكێ من دوكانەكا بچووك یا لەفا ڤەكر و نوكە من دو خارنگەه هەنە ل دهۆك و سێمێلێ و تایێ سیێ د رێزێ دایە كو دێ ل نزاركێ بیت و هەردو تایێن دی ژی دێ ل دومیز و زاخۆ بن و ئەڤ تایە ژی دێ ل دەمەكێ نێزیك دا هێنە ڤەكرن و ل هەر تایەكی نوكە نێزیكی 50 گەنج لێ كاردكەن و هەموو ژی گەنجێن مەنە.
ناڤبری زێدەتر گۆت: دبینم گەلەك خارنگەهان كارمەندێن بیانی ئیناینە و ب ڤێ چەندێ رێژا بێكاریێ وەكو خوەیە، بەلێ ئەو ژی بۆ تشتەكی د مافدارن، گەنجێن بیانی پپێگیری دەوامێ نە و كارێ خوە ب دلسوزانە دكەن، بەلێ گەنجێن مە یێن خومالی پێگری دەوامێ نینن و دەمێ خودان ل جهێ خوە نەبیت، ناهێنە كاری، یان ب كەیفا دلێ خوە كاری دكەن، یان ناكەن و گەلەك جاران گەنجێن من كارێ وان د خارنگەهێ دا یێ سەرەكی یە دەستووریێ ژ من ناخوازن و دێ تەلەفونا خوە گریت و ناهێتە كاری.
ئاماژە ب هندێ ژی دا، من كارمەند هەبوویە ژیێ وی گەلەكێ مەزنە و ل جهەكێ دی پارەكێ زێدەتر یێ دایێ خارنگەها من هێلایە و د سەر هندێ را بهایێ پانزینا وان دەمێ وەكو دیاری و گەلەك جارا بزانم كریكارەكێ من كرێدارە هاریكارم ل گەل وان و گەنجێن مە دەمێ د بێكار دێ هێن ب هەموو مەرجان رازی بن، ب تنێ خودانێ كاری وان بدەتە كاری، دەمێ ب پارە دكەڤیت و تەلەفونا خوە دگوهۆریت، خودانێ كاری نەشێت ل گەل باخڤیت، دێ بێژیت دێ بۆ خوە سەحكنە كارمەندەكێ دی و ئەز ناهێمە كاری، لەورا دبینم دەمێ جهەك كارمەندێن بیانی ددەنە كاری د مافدارن و بەری چەندەكێ من پێدڤی ب كەسەكی هەبوو بۆ پاقژیێ من ل بەر بوو كارمەندەكێ بیانی بینم.
ئەو چەندە ژی گۆت: گەنجێن مە هەموو دەمان گازندا وان ئەوە دبێژن كار نینە و من دڤێت بێژمە وان هەر كەسێ كار بڤێت بلا بهێتە دەڤ من بۆ كاری و نوكە بۆ هەردو تایان من 100 كارمەند هەنە و 50 كارمەندێن دی ژی بهێن دێ وەرگرم، چونكو قەرەبالغەكا مەزن ل خوارنگەها من دروست بیت و گەلەك جاران خەلك خوە ل هیڤیا جهی دگرن، چونكو جه نامینت و ئەڤ قەرەبالغە ژی بۆ ناڤێ خارنگەهێ و خوارنێنن من دزڤریت و هەڤالێن من ژی داخازدكەن خارنگەهێ بەرفرەهتر لێ بكەم، بیتە شەعبو پەلەس و ڤێ چەندێ ژی دەم پێ دڤێت.
خارنگەهێن خودان ستێر ئاستێ وان گەلەك هاتییە خوارێ و نوكە ب تنێ خوارنگەهێن مللی كاردكەن و ئەرزانترن و خوارنگەه گەلەك یا هەستیارە و دڤێت چاڤدێریكەكا باش ل سەر هەبیت، چونكو هەكە ژ شكەست جارەكا دی نارابیتە سەر پێت خوە ڤە و ژ بەر ڤێ چەندێ ئەز ب شەڤ نەنڤستیمە ژ ترسێن ناڤی دا و دەمژمێر 5 سپێدێ دچمە مال و دەمژمێر دەهی سپێدێ دزڤرمە كاری ڤە و چەند تشت گران بیت بهایێن خوارنگەها من هەر وەكو خوەنە، ژ بەر كو خەلك گەلەك قەستا مە دكەن بۆ خوارنێ.
