گەنجێن مە دەمێ خوە یێ ڤاڵا ب هەڕوە دبۆرینن
بێوار حەمدی
دەم پیرۆزترین تشتە د ژیانێ دا و یێ بوویە رێخوشكەرەك مرۆڤ پلانا بۆ ژیانا خوە بدانیت، چاڵاكڤانەك ژی دبێژیت: ب مخابنی ڤە جڤاكێ مە ژ بۆ تەرخانكرنا دەمی و مفا وەرگرتنێ گەلەكێ پاشكەفتیە و ئەڤە جهێ مەترسیێ یە ل سەر جڤاكێ مە یێ كوردی.
چاڵاكڤان چیمەن رەشید دیار كر، ژیان هەموو گرێدای دەمی یە، چونكو هەر وەختەكێ مرۆڤ تەرخان بكەت بۆ هەر تشتەكی یا پێدڤیە هەموو ب پلان بیت، دا كو دەمێ مە ب هەروە نەچیت و ئەم بهایێ دەمی بزانین، هەتا ل دەمێ بهێنڤەدانان ژی و مرۆڤی دەمێ ڤالا هەبیت دڤێت مفای ژ دەمێ خوە ببەت ب هەر شێوەیەكێ بیت، چونكو ل وەڵاتێن بیانی ژی دەمێ وان هەموو یێ تەرخانكریە و هەتا بۆ زارۆیێن خوە ژی پلانا ددانن.
چیمەنێ هێشتا گوتژی: ب مخابنی ڤە جڤاكێ مە یێ كوردی ژلایێ تەرخانكرنا دەمی و پلاندانانێ ڤە گەلەكێ پاشكەفتیە، جهێ داخێ یە گەنج و زارۆیێن مە و هەتا مەزنێن مە ژی ئەو دەمێ وان یێ ڤالا هەموویێ ب یاریا و نڤستنێ و كافێا ڤە دبورینن، ئەڤە جهێ مەترسیێ یە بۆ سەر جڤاكێ مە، و گۆت: (دەولەتێن بیانی هەموو پێكوڵا دكەن گەنجێ خوە مژوول بكەن و چ دەمێ وان ب هەروە نەچیت و د پاراستی بن و دوور بن ژ گەلەك تشتان، وەكو بكارئینانا مادێن بێهوشكەر یان هەر كارەكێ دی یێ ب مەترسی).
بیرهات هارون، یاساناس و چاڵاكڤانە دیاركر، دەم پیرۆزترین تشتە د ژیانێ دا و دەم یێ بوویە رێخوشكەر مرۆڤ پلانا ژ بۆ ژیانا خۆ بدانیت، هەردەم وەل مرۆڤی دكەت پێنگاڤا ژ بۆ پاشەروژێ ب هاڤێژیت و مروڤی سەرفەرازدكەت و گوهۆرینێ و پێشڤەچوونێ دئێخیتە د كەسایەتی و دەروونێ مروڤی دا.
چیمەن حسێن، دەرچوویا زانكویێ یە دەربارەی بابەتی گۆت: گەلەك جاران دبێژن كچێ پتر دەم یێ هەی ژ كوڕی و دشێت بۆ خۆ ب دەلیڤە بینیت، ئەڤ گوتنە تا راددەكی یا راستە، چونكو ب گشتی د ناڤ جڤاكێ مە دا رەگەزێ نێر زێدەتر دەلیڤەیا هەی بۆ دەركەڤتنێ و كاركرنێ و دەمێ وی یێ ڤالا كێمترە ژیێ كچێ، بەلێ ژبیرنەكەین مە ژی كچێن ژیڕ و تێگەهشتی و خودان كار هەنە و مفای ژ دەمێ خۆ دبینن، بەلێ د بەرامبەر كوری دا كچێ كێمتر دەلیڤا كاركرنێ و دەرێخستنا شیانان هەنە، ژ بەر هندێ كچێ دەمێ ڤالا یێ زێدەتر هەیە.
چیمەنێ دیاركر ژی، سوشیال میدیا بوویە ئەگەرەكێ سەرەكی دەمێ مە یێ ڤالا ب هەروەیی بچیت، ب مخابنی ڤە ل شوونا ئەم بچین پەرتوكەكێ بخوینین یان هندەك پێزانینا وەربگرین، ئەم سوشیالێ بكاردئینین و بەرێ مە هەموویان مایە لێ، مخابن پتریا گەنجان سوشیالێ ژ بۆ كارێن خەلەت و بێ مفا بكاردئینن.
