گەنجەكی سیستەمێ رۆناهیا منارا مزگەفتا ئامێدیێ ل سەر شێوازێ توركی چێكر
ئەڤرۆ
هەرهین محەمەد
كارێ خێرخوازی ژ وان كارا یە مرۆڤ ژ بۆ خودێ و وەلاتێ خۆ دكەت، ئامات ئامێدی گەنجەكێ باژێرێ دهۆكێ یە و چەندین سالە ب كارێن خێرخوازی رادبیت، ل ڤێ دوووماهیێ ژی رابوویە ب دانانا سیستەمێ رۆناهیێ ل سەر شێوازەكێ توركی بۆ منارا مزگەفتا ئامێدیێ و ل دووڤ گۆتنێن وی ژی چو جاران وی نەڤیایە خوە دیاركەت، بەلێ گەنجێن دەڤەرێ خوشحالیا خۆ بۆ دیاردكەن و وێنێ وی بەلاڤ دكەن ل سەر هەر كارەكێ بكەت.
ئامات عەلی عەبدولرەحمان ئامێدی، گەنجەكێ باژێرێ دهۆكێ یە و بۆ دەمێ چەندین سالایە كارێ خێرخوازیێ دكەت بۆ رۆژناما ئەڤرۆ گۆت: كارێ خێرخوازی مەسەلەكا خودایی یە و نشتیمانیە و دەمێ مللەتێ خوە دبینم و یێ پێدڤیە و ئەو پێدڤیاتی دێ ب مرۆڤی قەتیت و مرۆڤ نەكەت هینگێ دبیتە نە مەرداتی، من دەڤەرا ئامێدیێ دیت گەلەك یا بێ خودانە و مزگەفتنا كەڤنا ئامێدیێ كو دهێتە هژمارتن ئێك ژ شوونوارێن كەڤنێن دەڤەرا ئامێدیێ یە، لەو من هزر كر خزمەتەكا بچووك پێشكێش بكەم.
زێدەتر دبێژیت: ل دەستپێكێ رابووم ب بویاغكرنا مزگەفتێ هەموویێ و دیسان گوهورینا بلندگویێن دەنگی یێن ژناڤدا و ژ دەرڤەی مزگەفتێ، د راستی دا گەلەك د بێ سەر و بەربوون و دەنگ نەبوو، هەروەسان منارا مزگەفتا ئامێدیێ هەموو مە پاقژكر، ئەو ژی ب هاریكاریا گەنجێن دەڤەرێ و پاشان مە هزر د وێ چەندێ كر روناهیەكێ بدەینە منارا مزگەفتێ كا چەوان منارێن مزگەفتێن مێردینێ و دیاربەكرێ دروهنن من ڤیا یا مزگەفتا ئامێدیێ ژی وەكو یا وان بیت و دیزاینا رۆناهیا وێ مە دناڤبەرا مێردینێ و دیاربەكرێ ئینایە وەكو منارێن مزگەفتێن وانە.
ئامات خویاژی كر، بۆ ڤی كاری ژی بۆ دەمێ دو هەیڤا پتر مە ل سەر كاركر ب دو قوناغا دیزاینا وێ چەوا ب دانین ل سەر شێوازێ ئەندازیاری و دەستەیا كاركرنێ هەر یا ناڤخویی بوو كومپانیا سەرگەلێ ب ڤی كاری رابووینە و ب راستی وان ژی كارەكێ جوان كر، دیسان ل گەل گەنجێن ئامێدیێ ژی ب راستی وان چ ل سەر خو نەهێلا ژلایێ پاقژكرنێ ڤە و هەروەسان دەستێ وان ل گەل كرێكارێن كارەبێ بوو، چونكو د منارێ دا 104 دەرەجە نە و هەر تشتەكێ كارمەندێن كارەبێ پێدڤی بان هاریكاریا وان دكر ژ بنێ منارێ بۆ سەری.
ناڤهاتی گۆتژی: دبیت رێڤەبەریا ئەوقافێ خوە ل مزگەفتێ كربیتە خودان، بەلێ بۆ گوهورینا سیستەمێ دەنگی و رۆناهیێ خۆ نەكریە خودان، چونكو هەتا نوكە مەلا و بانگدەرێ مزگەفتێ خوبەخشن، ب تنێ ئەو كەسێ خزمەتا مزگەفتێ دكەت دزانم موچەكی وەردگریت، بۆ هەر كارەكێ خێرخوازی حەزناكەم مەزاختی دیاركەم، یان خوە دیاربكەم، بەلێ ئەگەرێ دیاركرنا من ژی بۆ وێ چەندێ دزڤریت بۆ كەیفخوشیا گەنجێن دەڤەرا ئامێدیێ و هەر كارەكێ بكەم د پەیچان دا بەلاڤ دكەن و سوپاسیا وان دكەم بۆ هەر كەسەكێ پشتەڤان، بەلێ یا من دڤێت بێژم ئەوە مە گەلەك گەنجێن ژێهاتی هەنە و هێزەكا مەزن هەیە و دخەمخورن.
ئاماتی دا زانین ژی، ئەو دەرچوویێ زانكۆیەكا وەلاتێ رۆسیایە و تایبەتمەندێ ئەندازیاریا نەفتێ یە و نوكە ل كومپانیەكا نەفتێ كاردكەت ل شێخان و دبێژیت: هەر ل دەستپێكا من ل سالا 2009دەمێ من ل وەلاتێ رۆسیا دخاند من كارێ خێرخازی دكر ل گەل وان كوردان یێن كو دهاتنە رۆسیا، چ ژلایێ مادی با و چ لایێ مە عنەوی با و من كارێ وەرگێرانێ كر و ل گەل نەخوشابووم ل نەخوشخانا و نشتەگەریا و ب ڤێ چەندێ من هەست ببهێن فرەهیێ كر. دەمێ هاتیمە كوردستانێ ب شێوەكێ فەرمی من حەزكر ل سەر ڤی كاری یێ بەردەوام بم هەتا بوویە شەرێ داعەش ژی من هاریكاری بۆ پێشمەرگەی و ئاواران برینە و دیسان هاریكاری ل گەل پەروەردێ ژی كرینە و دیسان چاپا پەرتوكێن هندەك نڤیسەران ژی من ب ستویێ خۆ ڤە گرتبوو.
