گەنجەكێ ئاكرێ پرۆژەكێ گەشتیاری ددانیت و ب دەهان گەنجان ددەتە كاری
ئەڤرۆ
رەمەزان زەكەریا
گەنجەكێ دەڤەرا بارزان دەمێ چەندین سالایە پرۆژەكێ گەشتیاری ل سەر ئەركێ خۆ دانایە، سال بۆ سالێ پرۆژێ خۆ بەرفرەهتر دكەت و هەموو مەزاختنا پرۆژەی وەك گەنجەك پشت بەستن ل سەر خۆ كریە و دڤێت ب رێكا پرۆژێ خۆیێ گەشتیاری هاریكاریا گەنجان ژی بكەت.
شەهوان یوسف، گەنجەكێ خودان پرۆژەكێ گەشتیاریە ل بارزان بۆ ئەڤرۆ گۆت: بەری چەند سالا چو پرۆژەكێ گەشتیاری نەبوو ل دەڤەرا بارزان، تایبەت بەرۆژێ بارزان كۆ سالانە گەشتیارەكێ ئێكجار زۆر سەرەدانا بارزان دكەن، لەورا وەك گەنجەك من هزر ل دانانا پرۆژەكێ گەشتیاری كر ل سەر رووبەرێ 5000 مەتران و هەموو پرۆژە كریە كەسكاتی و ئێكەمین پرۆژەیێ گەشتیاریە ل دەڤەرێ ئەڤ رێژا زۆرا كەسكاتی د ناڤ دا هەی.
ناڤبری گۆتژی: دناڤ پرۆژێ خۆیێ گەشتیاری دا من شیایە پتر ژ 5000 هزار شتلا بچینم، رۆژ بۆ رۆژێ پرۆژێ خۆ مەزن دكەم، هەلبەت هەموو پرۆژە من ل سەر ئەركێ خۆ دروستكریە، ل دەستپێكێ من ئاڤ ژ كانیەكێ راكێشا بۆ پرۆژێ خۆ یێ گەشتیاری ب دووریا 2 كیلۆمەتران، جهێ پرۆژێ من یێ گەشتیاری گەلەك یێ ئاسێ بوو، بەلێ دەمێ چەند سالا بێ راوەستان من تێدا كاركر، لەوما نوكە بۆیە جهەكێ گەشتیاری ژبلی گەشتیاریا وەلاتیێن دەڤەرێ، ئاهەنگێن بووك و زاڤا دئیننە دناڤ باخچێن پرۆژێ من یێ گەشتیاری، ژبلی چەندین چالاكیێن مەزن یێن رێكخراوێن دەڤەرێ ل سەر ئاستێ كوردستانێ ژی لێ هاتینە سازكرن، ژبەر بەرفرەهیا جهی و پاكژی و رێژا كەسكاتی.
ناڤهاتی خۆیاكر: دروستكرنا جادەیا پرۆژەی و راكێشانا تۆرا ئاڤێ و كارەبێ هەموو ل سەر ئەركێ خۆ من دروستكرینە، نوكە ژی ب دووریا دوو كیلۆمەتران من ئاڤ راكێشایە ب بۆریا بەردەوام ژی كار ل سەر دكەم و مەزن دكەم، من دڤێت پرۆژێ خۆ هێشتا مەزن بكەم، نوكە دەمێ وەرزێ گەشت و سەیرانا چەندین كەس ل دەف من كار دكەن و بووینە خودان كار ل سەر پرۆژەیێ من.
شەهوان خۆیا كر: پرۆژێ من یێ گەشتیاری پێكدهێت ژ حەفت باخچە و دوو شەلال و ریستۆرانت و كافیتریا و یاریێن زارۆكان و دوو مۆتێل و هەتا نوكە بۆك ڤەگوهاستن هەبووینە، بەلێ من بەرنامە هەیە جهەكێ تایبەت بۆ ئاهەنگێن بووك و زاڤا دروست بكەم، من پلان هەیە بۆ دوو سالێن بهێت پرۆژێ خۆ مەزنتر بكەم.
ناڤبری گۆت: ژبلی پرۆژێ گەشتیاری وەك گەنجەك من گرنگیەكا مەزن دایە بوارێ ژینگەهێ و رێكخراوەك دانایە ب ناڤێ رێكخراوا هەناسە پلاس یا نێڤدەولەتی بۆ پاراستنا ژینگەهێ شیایمە، هەتا 20 هزار دارا بچینن ل هەموو دەڤەرێن كوردستانێ و سەرپەرشتیا وان داران دكەین ئەوێن دچینن هەتا گەشە دكەن و مەزن دبن، من پلان بۆ وارێ ژینگەهێ ژی هەیە ل سەر ئاستێ كوردستانێ من بەرنامە دانایە بۆ پرۆژەكی بۆ زێدەتر ناساندنا كەلتۆرێ ژینگەهـ پارێزیا دەڤەرا بارزان و ب رێكا گەشتیاری نیشا خەلكی و گەشتیارا بدەم، نوكە دەرفەتا كاری بۆ چەند گەنجا من دروستكریە و ئەگەر هاریكاریا من بهێتە كرن دێ شێم دەرفەتا كاری بۆ دەهان گەنجێن دی ژی دروست بكەم، دخوازم جهێن شولەژێ پتر گرنگیێ ب پرۆژێن گەنجان و كەرتێ گەشتوگوزارێ بدەن.
