گەنجەكێ ئاكرێ نێزیكی 20 ئەپلیكەیشنا دروستكرینە
بێوار حەمدی:
سەلمان گەنجەكێ ئاكنجی قەزا ئاكرێ یە د وارێ ئەپلیكەیشنێن مبایلێ و ویندوزی دا كاردكەت دیار كر، وارێن تەكنولوژیایێ ژیانا تاكە كەسی یا رۆژانە ب ساناهی دكەن، هندەك ژ وان ئەپلیكەیشنا من دروستكرینە بۆ كارێن بازرگانی و هندەك ژی بۆ تاكە كەسی.
سەلمان ئیبراهیم، ل ئاكرێ دژیت د دیدارەكێ دا بۆ رۆژناما ئەڤرۆ گۆت: سالا 2013 دەسپێكا من بوو د وارێ كومپیوتەریدا بخوینم و بەری هینگێ ژی من گەلەك حەز ل سەر ڤی كاری هەبوو، ژ بۆ حەزا من یا زێدە مالباتا من ب گشتی ژی یا هاریكاربوو دگەل من و گۆت: (هەتا نوكە من پتر ژ 20 ئەپلیكەیشن و سیستەمان دروستكرینە، هندەك ژ وان بۆ كارێن بازرگانی نە و هندەك ژی بۆ تاكە كەسی، ئێك ژ وان ئەپلیكەیشنێن من دروست كرین ل نێزیكی 20 وەلاتێن جیهانێ دهێتە بكارئینان).
سەلمانی گۆت ژی: كارێ من ب تنێ پروگرامسازی و گەشەپێدانە، ئەز د وارێ ئەپلیكەیشنێن موبایلێ و ویندوزی دا كاردكەم و گۆت: (ژیان ژ چەندین لایان ڤە گەلەك ب زەحمەت كەفتیە، لەوما پروگرامسازی ئێكە ژ وان وارێن تەكنولوژیایێ كو ژیانا تاكە كەسی و جڤاكی ب ساناهی دكەت د هەر وارەكیدا، ژبەر هندێ ژی من بەشێ پروگرامسازیێ هەلبژارت).
د بەردەوامیا ئاخفتنا خۆ دا سەلمانی دیار كر، داهاتێ من ل سەر كارێ من یێ پروگرامسازیێ یە و ب تایبەت ئەو ئەپلیكەیشنێن بۆ كارێن بازرگانی دهێنە بكارئینان، لێ هندەك ژ وان ژی گشتی نە و ئەم بێ بەرامبەر كار تێدا دكەین و گۆت: (تشتێ ژ هەموویان خۆشتر بۆ من ئەوە ئەڤ ئەپلیكەیشنێن من دروست كرین ل سەرانسەری جیهانێ بەڵاڤبووینە، لەوما دێ بێژم ئەم گەنج بنیاتێ وەلاتێ خۆینە و دڤێت ئەم هەموو كاربكەین ژ پێخەمەت پێشكەفتنا وەلاتێ خۆ و ناڤێ كوردان د ناڤ تەكنولوژیایێ دا بهێلین).
