گەنجەكێ دهۆكێ دێ پشكداریێ د كۆنفرانسێ گوهۆڕینێن سناپچاتێ دا كەت
بێوار حەمدی:
كاوە هەرنی، بۆ ماوێ دووسالان ل بەشێ لێنزا سناپی كاردكر و پڕوژەیێن خۆ ب ڕێكا تویتەری بەڵاڤ دكرن، كاوە دبێژیت: پشتی من بزاڤێن بەردەوام كرین و پتر ژ سێ هەیڤان مایمە چاڤەڕێ، نوكە بوویمە ئەندامێ فەرمی یێ كۆمپانیا سناپ چاتی.
كاوە هەرنی گەنجەكە د ژیێ 22 سالیێ دایە د دیدارەكێ دا بۆ رۆژناما ئەڤرۆ گۆت: پتر ژ دوو سالان من ل بەشێ لێنزا كاردكر ل سناپ چاتی و ئەڤ ساڵە ب شێوەیەكێ فەرمی بوومە ئەندامێ كۆمپانیێ، ل دەسپێكێ من ل بەشێ AR ل سناپی كاردكر و من لێنز (فلتەر) چێدكرن.
زێدەتر گۆت: (من پڕوژەیێن خۆ ب ڕێكا تویتەری بەڵاڤ دكرن و هەر جهەكێ ڵایڤەك هەبا كۆمپانیێ من پشكداری تێدا دكر، هەتا من خۆ ئەكتیڤ كری و پاشی من داخازكر ببمە ئەندامێ وان، پشتی بۆ ماوێ پتر ژ سێ هەیڤان وان چاڤدێریا كارێن من كری ئەز بۆ مە ئەندام دگەل وان و سناپێ من ژی ژلایێ وان ڤە هاتە ڤێرڤای كرن.
كاوەی گۆت ژی: ژ بەر كۆ سناپ چاتی چ كۆمپانی ل ئیراقێ نینن، لەوما چ موچە و داهاتەكی نادەنە من، بەلێ ئەو كارێن ئەز دكەم بۆ نموونە ئەگەر ئەز بۆ بەشێ لێنزا بۆ كومپانیەكێ یان كەسایەتیەكی كاربكەم ئەو دبیتە داهات بۆ من و گۆت (ئەڤ ساڵە ژی ئەز وەك ئەندامێ كۆمپانیێ هاتمە داخازكرن بۆ لێنزفێسا سناپ چاتی ل وەڵاتێ ئیماراتێ سەبارەت گوهوڕینێن سناپی).
د بەردەوامیا ئاخفتنا خۆدا كاوەی ئەو چەندە ژی دا زانین، ل بەشێ AR ل سناپی مە گرێدان پێڤە هەیە، لەوما ژی هەر كەسەكێ ئاریشەیەك یان داخوازیەك هەبیت ل دووڤ وان دەستهەڵاتێن من هەین ئەز هاریكاریا وان دكەم و گۆت: (ئەز پێزانین و فێركاریان ل سوشیالێ بەڵاڤ دكەم، و ئەز داخوازێ ژ گەنجان دكەم بەردەوام ل سەرخۆ كاربكەن و خۆ بەرەڤ پێشڤە ببەن د هەمی واران دا و ئەو وارێ بزانیت دگەل وی پتر دگۆنجیت بلا بكەتە كارێ خۆ یێ سەرەكی).
