گەنجەكێ دهۆكێ حەز دكەت ناڤێ وی بچیتە د پەرتووكا گینس دا
بێوار حەمدی:
كوچەر گەنجەكێ باژێرێ دهوكێ یە ژ ساڵا 2012 وەرە یاریا كۆنگفویێ دكەت، هەر ژ زارۆكینیێ حەزا ڤێ یاریێ هەیە. كوچەری گۆت: ژبەركۆ ئەز گەلەك داران ب لەشێ خۆڤە دشكێنم، حەزدكەم وەكو هەر كەسەكێ خودان بەهرە ناڤێ من ژی بچیتە د پەڕتوكا گینس دا.
كوچەر حەمید گەنجەكێ باژێرێ دهوكێ یە، د دیدارەكێ دا بۆ رۆژناما ئەڤرۆ گۆت: هەر ژ زارۆكینیا خۆ من گەلەك حەز ژ یاریا كۆنگفویێ دكر، ل ساڵا 2012 وەرە ئەز ڤێ یاریێ دكەم، بەلێ پشتی ڤی دەمی ئەز تۆشی روودانەكێ بووم، بەلێ هەر من دەست نەداهێلان و من دەستپێكرە ڤە و گۆت: (من گەلەك حەز ل سەر هندێ هەیە دەمێ ئەز دارا ب لەشێ خۆەڤە دشكێنم، لێ ئەز ل دەمێ شكاندنا دارا ب لەشی ڤە، هەست ب ئێشانێ ناكەم).
د بەردەوامیا ئاخفتنا خۆدا گۆت: ژبەركۆ ئەڤ كارێ سەیر و جوان ل دەڤ من هەیە، لەوما ئەز ژی حەز دكەم وەكو هەر گەنجەكێ خودان بەهرە ناڤێ من بچیتە د پەرتۆوكا گێنس دا و گۆت: (من سوز دایە خەلكێ دهوكێ ریكۆردەكا دی بشكێنم ل پێش چاڤێن وان و ئەگەر جەنابێ شێخ بابوی ژی ل وێرێ ئامادەببیت ل شوینا 150 داران دێ 200 داران بخۆەڤە شكێنم).
ل دووماهیێ ژی كوچەری گۆت: (ئەز داخواز ژ حكۆمەتا هەرێما كوردستانێ دكەم هاریكاریا من و یا هەمی گەنجان بهێتە كرن، ژبەركۆ مە گەلەك گەنجێن خودان بەهرە هەنە و حەز دكەن خزمەتێ بكەن، داخوازێ ژێ دكەم د هاریكاربن دگەل من دا دا كۆ بشێم گەشتا خۆ بۆ دوبەی ئەنجام بدەم و ناڤێ كوردان و ئالایێ كوردستانێ بلند بكەم).
