گەنجەك: ب رێیا خواندنا پەرتووكان ئەز دشێم بچمە دیوانا ئەفلاتۆنی
هەرهین محەمەد:
پەرتوك ژ وان هەڤالێن بێدەنگ و بێ زیانە و ئەو كەسێن هەڤالێنیا پەرتوكێ ژی دكەن گەلەك دكێمن و جودانە ژ كەسێن دی، چونكو هەڤالینیا پەرتوكێ هەموو كەس نەشێن بكەن و د بەردەوامبن ل سەر وێ هەڤالینیێ.
دلوڤان حەسەن گەنجەكێ ناحیا قەسرۆكێ یە د دیدارەكێ دا بۆ رۆژنامەیا ئەڤرۆ دبێژیت: هەر ژ زارۆكینیێ پەرتوك رێنیشاندەرێ ژیانا من بوویە، ل دەمێ هەر نەخوشیەكێ د ژیانێ دا پەرتوك وەكو هەڤالەكی ل گەل من بوویە و ل دەمێ نەخوشیان ژی هەڤكارا خەمێن من بوویە و ل دەمێ خوشیان ژی هەڤالێ رۆحا من بوویە، ئانكو ژیانەكا ب تنێ تێرا من ناكەت و پەرتوك دبیتە گەلەك ژیان بۆ من و ئەو پەرتوكێن ئەز دخوینم دهەمە جورن و من نێزیكی 800 پەرتوكان یێن هەین و و 150 و پێنجی پەرتوكان خواندینە، ژبلی سیستەمێ پەروەردێ و پتریا ڤان پەرتوكان ژی ئەز دكرم و هندەك پەرتوك ژی دیاری بۆ من دهێن ل دەڤ هەڤال و برادەران.
زێدەتر گۆت: ئەو پەرتوكێن ئەز ژ خواندنێ ب دووماهی دئینم دكەمە دپەرتوكخانا خوە یا مال دا، یان دەمێ بەحسێ وێ پەرتوكێ دكەم ل دەڤ هەڤالان ئەو ژ من دخوازن بدەمە ڤ وان ژی، ئانكو ئەو ژی حەزدكەن وێ پەرتوكێ بخوینن وان دڤێت ئەو خوشیا ئەز ژ پەرتوكێ دبینم ئەو ژی ببینن.
خویاژی كر، زانایەك دبێژیت: ئەگەر بوویە هەڤالێ پەرتوكێ دێ هەڤالان گەلەك كێم كەی و ل گەل هندێ ل دەستپێكێ من گەلەك هەڤال هەبوون و پشتی بوویمە هەڤالێ پەرتوكێ هێدی هێدی من هەڤال كێم كرن و بوومە هەڤالێ پەرتوكێ، چونكو ئەو خوشی و جوانیا د پەرتوكێ دا هەی ل چ جهان نابینم و مرۆڤ دشێت ب رێیا خواندنا پەرتوكێ بچیتە دیوانا ئەفلاتونی.
ناڤهاتی ئەو چەندە گۆتژی: هەڤالینیا پەرتوكێ ئەوە هەموو كەس دشێن هەڤالینیا پەرتوكێ بكەن، بەلێ هەموو ناكەن، چونكو وان ئەو ئیرادە نینە، یان ئەو حەزە نینە، یان ئەو شیان و خوراگرتنە نینە، چونكو خواندنا پەرتوكێ بهێن فرەهیەكا مەزن پێ دڤێت، لەورا هەموو كەس نەشێن بخوینن و د راستی ژی دا خواندنا پەرتوكێ تشتەكێ ب زەحمەتە و ئەو ژی كارەكە، بەلێ ئەڤە نەكارێ دەستی یە و نە كارێ پێیایە و ئەڤە كارێ مێشكی یە، چونكو مێشك خوە زەحمەت ددەت و باریتر قوتابی حەز ژ خواندنێ ناكەن، ژ بەر كو گێژ دبن و حەزناكەن مێشكێ خوە گەلەك بدەنە كاری ب گشتی جڤاكێ مە حەز ژ خواندنێ ناكەت و گەلەك مێشكی َخوە بدەنە كاری، لەورا ئەم نەشیاینە چ داهێنانان بكەین.
