گەنجەك پشتی 12 سالان ژ خواندنێ دووركەڤتی نوكە قوتابیێ ماستەرێ یە
هەرهین محەمەد
د ژیانێ هەر كارەكێ مرۆڤ بكەت ب پلان و ئارمانج قوناغ بۆ قوناغێ ب سەر كەفتییانە دێ بەرب وێ ئارمانجێ ڤی چیت یا كو مرۆڤی د سەری َخوە دا دانای و كوڤان گابێركی ژی ژ وان نموونایە یێن كو ل قوناغا ناڤنجی دەست ژ خواندنێ بەردای و پشتی دوازدە سالان ژ نوو دەست ب خواندنێ كری و نوكە قوتابیێ ماستەرێ یە.
كوڤان گابیركی، ئەو گەنجەیە یێ كو بۆ دەمێ 12 سالان ژ خواندن دووركەفتی ژ بەر كو بابێ وی یێ ب تەمەن بوو و پێدڤیێن ژیانێ گەلەك بوون و د دیدارەكێ دا بۆ رۆژناما ئەڤرۆ گۆت: ئەز ناچار بووم كاربكەم و دا كو مال ب خودان بكەم و خوشك و برایێن من بەردەوامیێ ب خواندنێ بدەن و د وان كاودانان دەرفەت نەدا من وەكو هەر گەنجەكی د دەمێ خوە دا خواندنا خوە ب دووماهی بینم و پشتی وان خواندنا خوە ب دووماهی ئینای ل سالا 2012 من قوناغا ناڤنجی و دەرەكی خواند و قوناغا ئامادەی ل دانێ ئێڤاریان خواند و پاشی ل زانكۆیا ئەمریكی هاتمە وەرگرتن و ل وێرێ فێری زمانی بووم و سوپاس بۆ خودێ نوكە قوتابیێ كولیژا كوردستان هەولێر بەشی دبلوماسی و یاسایێن نیڤدەولەتی و ماستەرێ دخوینم و بوونە 12 سال ژ خواندنێ دووركەفتیم و سالا دوازدێ ئەز ل خواندنێ زڤریم و گەلەك گوهورین چێببون.
زێدەتر دبێژیت: نە تشتەكێ ب ساناهی بوو بۆ من و ل وی دەمی گەلەك كەسان گۆتە مە دێ بۆچی خوینی و ژیێ تەیێ مەزن بووی و من ژی بەرسڤا وان دا من گۆتێ ئەگەر ئەز نەخوینم دێ تەمەن راوەستیت و من دەست ب خواندنێ كر و ل گەلەك قوناغان بۆ من ئاریشە و روودان چێبوون و ئێك ژ وان ئاریشان ل تاقیكرنێن ویزای دا بابێ من وەغەكر و هەر د وان رۆژان دا ئەز چوومە تاقیكرنان ژی و من پلەیێن هەڕە باش من بدەست خوە ڤە ئینان و ل خولا ئێكی دەرچووم و ل وێ سالێ ئێكەم قوتابی بووم ل خولا ئێكێ دەرچووی، چونكو هەر ل رۆژا من دەست ب خواندنێ كری من هیڤی هەبوون و من دڤیا كەسەكێ جودا بم ژ هەموو هەڤالێن خوە و یێ مفا دار بم بۆ مال و وەلاتێ خوە.
هێشتا ژی گۆت: بەری دەست ژ خواندنێ بەردەم من ئارمانج هەبوو و دیسان خێزانا من ژی پشتەڤانێن من بوون كو ئەز خواندنا خوە ب دووماهی بینم و گەلەك ژ وان ئەوێن رەخنە ل من گرتی پشتی من دەست ب خواندنا خوە كری بوونە پشتەڤانێن سەرەكی كو هەر یێ بەردەوام بم د خواندنێ دا و پشتی ئەز ل خواندنێ زڤریم و گەلەك هەڤالێن دی ژی خواندن هێلا بوون جارەكا دی ل خواندنێ زڤرین و نوكە ئەو ژی خودان باوەرنامە و كارن و ئەڤ چەندە ب تنێ بۆ مرۆڤی دبیتە دەستكەفت، هەكە مرۆڤ خودان ئارمانج بیت دێ گەهیتە هەموو ئارمانجێن خوە و ژ بۆ هەر پلانەكێ ژی ئارمانج یا گرنگە و ب زووترین دەم دێ سەركەفتنێ ب دەست خوە ڤە ئینیت و پلانا من یا دەستپێكێ من ژیێ خوە دابەشكر ل سەر هەموو قوناغێن خواندنێ و نوكە ل دووڤ پلانا من دانای ئەز یێ دچم ب سەر كەفتییانە و نوكە قوتابیێ ماستەرێ مە.
