گەنجەک: پشتی ئەز ل خوە عاشق کریم ژ نوو من زانی یا بەردایی یە
ئه‌ڤرۆ نيوز:
گەنجەکێ 28 سالی ئاریشا خوە ددەتە رۆژناما ئەڤرۆ و داوا رێیە چارەیکێ دکەت و دبێژیت: من و ژنەکێ ب رێیا فەیسبوکی ئێکدو نیاسیە و ئەو ل دەرڤەی وەلاتی دژیت، بۆ ماوەیەکێ مە وەک ھەڤال سەرەدەری ل گەل ئێکدو کر، وێ ڤیانا خوە بۆ من دیار کر و ئەز ژی پێڤە ھاتمە گرێدان و من حەز ژێ کر، لێ پشتی کو ئەز ل خوە عاشق کریم ژنوو گۆتە من ئەز 5 سالا ژ تە مەزنترم و یا ھاتیمە بەردان و دو زارۆ ژی من ھەنە! ئەڤ ئاخفتنێن وێ وەک کارەساتەکێ بوون بۆ من و گەلەک کارتێکرن لمن کر حەتا بۆ ئەگەر من دو جارا ھەول دا خوە بکوژم.
(کەمال) گەنجەکێ 28 سالیە بەحس ل سەرھاتیا خوە و ھەڤالا خوە دکەت کا چاوا و ب چ رێ نیاسیە و بوویە ئەڤیندارێ وێ و بۆ ئەڤرۆ دبێژیت: رۆژەکێ ب رێیا فەیسبووکی کەسەکا نەنیاس داخوازا ھەڤالینیێ بۆ من فرێکر من ژی زانی کچە، لەوا من ھەڤالینیا وێ وەرگرت پاشان ھەڤنیاسین ل گەل ئێکدو دا کر و مە بۆ دەمێ ھەیڤەکێ ب رێیا ناما ل گەل ئێکدو د ئاخفت.
کەمال گۆتژی: وێ پسیار ژ من کر و گۆتە من، تە ھەڤالا خوە یا تایبەت ھەیە؟ من گۆتێ نەخێر، پاشان وێ گۆتە من دێ ئەڤینیێ ل گەل من کەی، چونکی من گەلەک یا حەز ژ تە کری من گۆتێ بلا، لێ من دڤێت ئەز تە ببینم وێ گۆتە من تو نەشێی من ببینی، چونکی ئەز نە ل کوردستانێ مە و ئەز یا ل ئەوروپا، بەلێ تو دشێی من ب رێیا وێنا ببینی، پشتی بورینا چەند رۆژەکا وێ وێنێن خوە بۆ من ھنارتن، راستی من گەلەک حەز ژێ کر.
ئەڤی گەنجی ئەو چەندە ژی گۆت: پشتی من و وێ کچێ حەز ژ ئێکدو کری من پسیارا تەمەنێ وێ کر، وێ گۆت، ئەز پێنچ سالا ژ تە مەزنترم، ھەروەسا من دو زارۆ ژی ھەنە و ئەز یا ھاتیمە بەردان و ئەز گۆندیا تە مە، پشتی وێ وەگۆتیە من دلێ من پارچە پارچە بوو ژ قەھران دا،چونکی بەری ھینگێ وێ ئەڤ چەندە نە گۆتبۆ من ھەکە وێ ل دەستپێکێ ئەڤ راستیە بۆ من گوتبان رەنگە لێ عاشق نە ببام، ژبەرھندێ من دو جاران ھەول دا خوە بکوژم و مالا مە نەدزانی کا ژبەر چ ئەز دێ خوە کوژم. من ھەر ھزرا وێ دکر و حەزژێکرنا وێ ھەر د دلێ من دا بۆ، لەورا من بزاڤ کر جارەکا دی وەکو بەرێ باخڤین، چونکی مە گەلەک حەز ژئێکدو دکر، بۆ ماوێ سێ سالا ئەم ل گەل ئێکدو د ئاخفتین
ھەروەسا کەما دبێژیت: ژبەرکو مە گەلەک ئێکدو دڤیا لەوا من داخواز ژ بابێ خوە کر کو بۆ من ڤێ ژنێ ب خوازیت پشتی بابێ من زانی ئەو کچە گۆندیا مەیە و یا ھاتیە بەردان و دو زارۆ ھەنە بابێ من ژ قەھرادا جەلتا دلی بۆ چێبو، و گۆتە من بتنێ ئەڤە نە بیت تە چ کچا دی د دونیایێ دا بڤێت دێ بۆ تە ئینم، لێ ئاریشا من ئەوە ئەز نەشێم ڤێ ژنێ بھێلم و من سوز دایە وێ یان بۆ ئێک بین، یان بۆ ئاخێ، و ھەکە ئەم گەھشتینە ئێکدو من لبەرە بابینیێ بۆ زارۆیێن وێ ژی بکەم، ئەڤجا ھوون بۆ ڤێ ئاریشا من چ دبێژن و ئەز چ بکەم رێیە چارەیەکێ ژ وە دخوزام.
چارەسەری:
پشتی مە ئەڤ ئاریشە دانایە بەر دەستێ ڤەکولەرەکێ جڤاکی وەھا دیار کر کو، حەزژێکرنا ب رێیا فیسبوکی ئاریشەیە، ژبەرکو مرۆڤ ئێکدو نابینیت و سروشتێ ئێکدو نزانیت, چونکی ئەڤ ژنا تو بەحس دکەی ئێک ژ تە مەزنترە, یادوێ بێژنە و ھاتیە بەردان و ئەڤە جودایە ژ ھندێ ھەکە زەلامێ وێ مربا و رەنگە ژ ئەگەرێ ھندەک ئاریشەیان ھاتبیتە بەردان.
عەبدولجەبار عەبدولرەحمان ئەو ڤەکولەرێ جڤاکی یە ژلایەکێ دیڤە دبێژیت: کێشا دی وێ دو زارۆ ھەنە ئەڤە ژی دێ بنە ئاریشە بۆ تە , ئاریشا ژ ھەموویا مەزنتر ئەوە نە ب دلێ مالباتا تەیە , ژبەرکو لایەنێ جڤاکی و ئایینی پتر پشتەڤانە مرۆڤ کچەکێ بۆ خوە بینیت، ژ لایەنێ سوزداریڤە دێ ھێیە ئێشاندن، ئەڤجا دڤێت تو زال بی ل سەر ھەستێن خوە، ھەکە تو ڤان خالا ھەموویا بەرچاڤ وەرگری و بو تە ئاریشە نەبیت , پێدڤیە تو دایک و بابێن خوە رازی کەی پاشی ئەڤێ ژنێ بخوازی، ھەکە مالا تە رازی نەبیت و تە بخوە ئینا دەما د کەڤیە ئاریشا مالا تە پشتەڤانیا تە ناکەت.