گەنج گەنجینەیە
هۆشمەند جەوهەر
د زمانێ كوردی دا پەیڤا گەنجینە بۆ تشتێن ب بها و ب نرخ و سەرمایە دهێتە بكارئینان، هەروەسا پەیڤا گەنج د لایەنەكێ جەوهەری دا یا هەڤ ئاستە دگەل پەیڤا گەنجینەیێ چونكی تاكێ گەنج هێز و شیانێن ڤەشارتی یێن هەیین پێدڤیە د جڤای دا ئەڤ شیانە بهێنە بدەست ئێخستن.
ژیێ گەنجیەتیێ پڕ بهاترین قۆناغە د ژیانا مرۆڤی دا كو خودانێ شیان و هێزەكا ژ بن نەهاتیە هەر جڤاكەك بشێت ب شێوەیەكێ دروست مفایێن خۆ ژ گەنجان بستینیت، ئەڤ جڤاكە دێ یێ سەركەفتی بیت و پێشەڕۆژەكا ب هێز و خودان سەرمایە دێ هەبیت.
گەنج ژ ڕوویێ هزر و فكر و زانستی ڤە ب هێز و شیانا جڤاكێ دهێتە دانان، هیچ جڤكەك ب دروستاهی ناكەڤیتە د وارێ تازەگەری و داهێنانێ دا، ئەگەر گەنج ب شیانێن خۆ هەول بۆ نەدەت، لەوڕا گەنج هێز و پاڵپشتە بۆ هەر جڤاكەكێ ئەگەر ب دروستی مفای ژ شیانێن وانا بهێنە وەرگرتن.
بۆ دروستبوونا گەنجێ ژێهاتی و خودان شیان یا گرێداییە ب ڕابردوویا وی كەسی و پەروەردە و ژیان و سەربۆرا وی گەنجی ڤە، هەر گەنجەك ب ئاوایەكێ دروست یا پەروەردەی و هزری مەزن بۆ بیت كەسەكێ خودان شیان و ب بەرهەمە، بەس ئەڤ شیانە دڤەشارتینە و پێدڤیە هەر كەسەك بزانیت شیانێن وی د چ وارەكی دا هەنە و بشێت بۆ خۆ دەربێخت ب هێز و شیان و زانستا خۆ مفای بگەهینیتە جڤاكێ.
هەروەسا ل سەر هەر گەنجەكی پێدڤیە كو خۆ بنیاسیت و بزانیت شیانێن وی چنە و ئایدۆلۆژیا وی ب كیژ شێوازیە و پلانا وی بۆ پێشەڕۆژێ چییە، هەروەسا دەمێ خۆ ب بابەتێن زانستی و هزری دەرباز بكەت، هەولدان بۆ بدەستڤەئینانا وان هیڤیان یێن وانا هەیین كار بكەن و هەول بدەن بۆ پلانێن وان بۆ خۆی و جڤاكێ دانای، ئەو دەرفەتێن بۆ وان دروست دبن ژ دەستنەدەن، هەروەسا ئەو ب خۆ دەرفەتێن بهادار ژ بۆی خوە دروست بكەت، شیانێن بڕیاردانەكا درست هەبیت و بشێت ب سەر نەرەحەتیان سەربكەڤیت.
گەنج بۆ بدەستڤەئینانا خەونێن خۆ ل سەر هەمی بابەتان ڤە پێدڤیە ب شێوەیەكێ ڕیاڵیستی هزر بكەت و خۆ دگەل ژیوارێ ئەڤرۆ بگونجینیت، بزاڤێن دكەت ژی بۆ گوهۆرینان پێدڤیە ڕیالیستی بن، هەروەسا هەول بهێتەدان بۆ ئاوێتەكرنا هزرێن نفشێ كەڤن و نوی ب لێكتیگەهشتن و پشكداری پێكرنا گەنجان ل ناڤەندێن بلند و جهێن هەستیار دا.
گەنج ل كوردستانێ رێژەیەكا بلند یا ئاكنجیان پێكدئینت، هەروەسا گەنجێ كورد د دیرۆكێ دا هەیا نها كەسێن خودان شیان و هزرمەندن و بەرهەمهێنەرن، پێدڤییە كار بۆ ئەڤێ چەندێ بهێتەكرن كو گەنج بشێت ب ئاوایەكێ ئاسان شیانێن خۆ بۆ لایەنێن پاڵپشت و هاریكار دەربئێخیت و پشتەڤانی لێ بهێتەكرن ل كەرتێ گشتی یێ حوكمەتێ و كارئاسانی بۆ وانا بهێتەكرن د كەرتێن تایبەت دا بۆ هندێ بشێن هزرمەندی و ژیرمەندیا خۆ د ڤیێ جیهانا پێكشەفتی دا كار بكەن بۆ ئاڤاكرنا كوردستانەكا پێشكەفتی د هەمی لایەنێن ژیانێ دا.
