گەنگەشە ل سەر خورتكرنا بزاڤا بازرگانی و گەشتیاری د ناڤبەرا دهۆك و وانێ دا هاتە كرن
د. عەلی تەتەر، پارێزگارێ دهۆكێ ب ئامادەبوونا حەمید عەلی، رێڤەبەرێ كۆمەلگەها ئیبراهیم خەلیل دوهی 25/6/2024 پێشوازی ل شاندەكێ ژوورا بازرگانی و پیشەسازی یا باژێرێ وانێ ب سەرۆكاتیا نەجدەت تەقوا كر و د هەڤدیتنەكێ دا گەنگەشە ل سەر چاوانیا خورتكرنا بزاڤا بازرگانی د ناڤبەرا پارێزگەهێن دهۆكێ و وانێ دا كر.
د كۆومبونەكێ دا ب ئامادەبوونا شكری جەمیل، سەرۆكێ ژوورا بازرگانیا دهۆكێ و ئەندامێن ژوورێ بەحسێ پەیوەندیێن بازرگانی و پیشەسازی یێن دێرین د ناڤبەرا هەرێما كوردستانێ و وەلاتێ توركیا دا و چاوانیا خورتكرنا وان پەیوەندیان د ناڤبەرا هەردو لایان، نەخاسمە ژوورا بازرگانی و پیشەسازیا پارێزگەها دهۆكێ دا هاتە كرن.
پارێزگارێ دهۆكێ تەكەز كر كو پارێزگەها دهۆكێ پەیوەندیێن دێرین و كلتۆری یێن هەڤپشك ل گەل خەلكێ وانێ و دەوروبەران و بازرگانێن وێ دەڤەرێ هەنە و پشتەڤانیا پارێزگەهێ بۆ هەر هاریكاری و هەڤكاریەكێ دیار كر، كو بزاڤا بازرگانی و گەشتیاری د ناڤبەرا پارێزگەها دهۆكێ و پارێزگەها وانێ دا پتر پێشڤە بچیت.
د. عەلی تەتەر، پارێزگارێ دهۆكێ دیار كر كو گەلەك گرنگە حكومەتا هەرێما كوردستانێ و حكومەتا توركیا بیرێ ل ڤەكرنا پتر خالێن سنووری بكەن بۆ وێ یەكێ ئاستێ بزاڤا بازرگانی و گەشتیاری پتر بهێتە پێشئێخستن.
دیسا هەر دوهی 25/6/2024 د. عەلی تەتەر، پارێزگارێ دهۆكێ ل سەرۆكاتیا باژێرڤانیا دهۆكێ كۆمبوونەك ل گەل جڤاتا باژێرڤانیا دهۆكێ ئەنجام دا و د كۆمبوونێ دا بەحسێ پڕۆژەیێن حكومەتا هەرێما كوردستانێ ئەوێن ل پارێزگەهێ دهێنە ئەنجامدان، ب تایبەتی ئەو پڕۆژەیێن ل سەنتەرێ سەرۆكاتیا باژێرڤانیا دهۆكێ دهێنە ئەنجامدان و پێدڤیێن خەلكێ سەنتەرێ باژێری ب پتر پڕۆژەیێن خزمەتگوزاری هاتە كرن.
د تەوەرەكێ دی دا بەحسێ چاوانیا رێكخستنا جاددەیا و جهێن گشتی و گەشتوگوزاری و جوانكرن و پاقژراگرتنا وان جهان ب رەنگەكێ شارستانی د ناڤ سەنتەرێ باژێری دا و نەهێلا زێدەگاڤیان و گەهاندنا خزمەتگوزاریان ب یەكسانی بۆ هەموو تاخ و جهان هاتە كرن.
پارێزگارێ دهۆكێ تەكەزی ل سەر جوانی و پاقژراگرتنا هەموو جه و تاخێن باژێری و جهێن گەشتیاری و پاراستنا كەسكاتی و ژینگەهێ كر، هەروەسا تەكەز كر كو ئاسانكاری ل دووڤ یاسا و رێنمایێن حكومەتا هەرێمێ بۆ ب رێڤەبرنا مامەلەیێن وەلاتیان بهێنە كرن و پشتەڤانیا پارێزگەهێ بۆ هەر هاریكاریەكێ دیار كر.
