گەڕەكا ئاگرین بەرانبەر یانەیێن پارێزگەهێ
چاڤەڕێ دهێتە كرن سوبەهی ئەینی چار یانەیێن پارێزگەهێ یاریێن خوە ژ چارچووڤەیێ هەڤڕكیێن گەڕا 11ێ ژ خولا پلا ئێكا كوردستانێ یا فوتبۆلێ دەربازبوون بۆ نایاب ئەنجامبدەت و ئارمانجێن جودا هەنە دناڤبەرا پاراستنا مانا خوە و هەڤڕكی بۆ ڕێزبەندیێن پێشیێ دا هەنە ئەوا بڕیارە هەموو یاری ل دەمژمێر 2:30 پشتی نیڤرۆ بهێنە كرن.
دهۆك و هەولێر دێربیەكێ كوردستانی دا
بڕیارە یانەیا هەولێر ل یاریگەها خوە مێڤاندارییا یانەیا دهۆكێ ل یاریگەها شەهید فرانسۆ حەریری یا نێڤدەولەتی بكەت كو دهێتە هژمارتن ئێك ژ یاریێن ئاگرین بۆ هەردو یانەیان و دێربییەكێ چاڤەڕێكری ژلایێ جەماوەر و دەزگەهێن ڕاگەهاندنێ ڤە، ئەلهۆیێن چیا ژ نەهـ یارییان شیایە 16 خالان كۆمبكەت ل ڕێزا چارێ بهێت ژ چار سەركەڤتن، چار وەكهەڤی و ئێك خوسارەتی هەیە، یانەیا هەولێر خودانا 14 خالایە ل ڕێزا حەفت.
سێمێل دێ بازیان مێڤان كەت
ژلایێ خوە تیما یانەیا سێمێل دێ ل یاریگەها خوە یانەیا بازیان د یارییەكا بهێز دا مێڤان كەت، كوڕێن دەشتا دوبانێ ل ڕێزا هەشتێ دهێن ب كۆمكرنا 14 خالان ژ سێ سەركەڤتن، پێنچ وەكهەڤی و دو خوسارەتی، ژلایێ خوەڤە بازیان ب15خالان ل ڕێزا پێنجێ دهێت.
شەڕێ خوە قۆرتالكرنێ
تیما یانەیا تەناهی دێ ل باژێرێ سلێمانیێ بیتە مێڤانا یانەیا خاك د یارییەكا بهێز و خوە قورتالكرنێ ژ ڕێزبەندیێن دووماهیێ، نوونەرا دهۆكێ نەهـ خال ژ نەهـ یارییان كۆمكرینە ل ڕێزا 13ێ دهێت ژ دو سەركەڤتن، سێ وەكهەڤی و چار خوسارەتی، ژلایێ خوەڤە ب هەشت خالان یانەیا خام ڕێزا 14ێ دهێت.
شێخان یا دمەترسیێ دا
ژلایێ خوە یانەیا شێخان دێ ل یاریگەها خوە یانەیا زانكۆیا جیهان مێڤان كەت، نوونەرا چارێ یا پارێزگەهێ د ڕەوشەكا خراب دایە ئەوا حەفت خال كۆمكرین ل رێزا 16ێ و بەری دووماهیێ دهێت ژ ئێك سەركەڤتن، چار وەكهەڤی و چار خوسارەتی، ژلایێ خوەڤە زانكۆیا جیهان ب19 خالان ڕێزا دویێ دهێت.
ژ یاریێن دی یێن ڤێ گەڕێ، كۆیە- بابان، سۆران- ئارارات، چەمچەمال- كفری، شۆرجە- شەقلاوە، یانەیا بەردەڕەش د ڤێ گەڕێ دا دێ یا چاڤەڕێ كری بیت.
