ھاتنا ژمارەکا زۆرا ئاواران رێژا توندوتیژیێ زێدە کریە
ئه‌ڤرۆ نيوز:
ئەنداما لژنا بەرەڤانیێ ژ ماڤێن ئافرەتێ ل پەرلەمانێ کوردستانێ مریەم سەمەد عەبدی بۆ ئەڤرۆ ڕاگەھاند کو، ل ھەموو پارێزگەھێن ھەرێما کوردستانێ توند و تیژی یا ھەی لێ رێژا توند و تیژیێ ژ پارێزگەھەکێ بۆ ئێکا دی جۆداھی ھەیە و ھاتنا ژمارەکا زۆرا ئاوارا ئەگەرێ زێدەبوونا رێژا توند و تیژیێ یە ل ھەرێمێ.
ئەنداما لژنا بەرەڤانیێ ژ مافێن ئافرەتێ ل پەرلەمانێ کوردستانێ مریەم سەمەد عەبدی دا زانین کو، مەزنترین رێژا کچ و ژنان د کارەساتا شنگالێ دا تووشی توند و تیژیێ بووینە ل سەر دەستێن تیرورستان و ھەتا نوکە چوو ئامارێن دروست لبەر دەستێن لژنا بەرەڤانیی ژ ماڤێن ئافرەتێ ل پەرلەمانێ کوردستانێ نینن، لێ پتر ژ دو ھزار کچ و ژن و زارۆیان ژ دەستێن تیرورستێن داعش قورتال بووینە و گۆت: ھیشتا گەلەک کچ و ژن و زارۆیێن رەڤاندی ماینە د دەستێن رێکخراوا تیرورستی یا داعش دا و چارەنڤیسێ وان یێ دیار نێنە و ئەم بەردەوام دووڤچوونا رەوشا ژن و کچێن ژ دەستێن داعش رزگار دبن دکەین.
مریەم زێدەتر دبێژیت: ب ھەموو شیانێن خوە ئەم ھەول ددەین فشارەکا مەزن بێخینە سەر پەرلەمان و حکومەتا عیراقێ دا کو ھاریکاریا وان ژن و کچێن رزگار دبن بھێتە کرن د ھەموو بوارەکێ دا و باشترە کار بھێتە کرن بۆ رزگار کرنا کچ و ژن و زارۆیێن ھەتا نوکە ماینە د دەستێن رێکخراوا تیرورستی یا داعش دا.
ل دووڤ ئامارەکا رێڤەبەریا توند و تیژیا دژی ژنان ل ھەرێما کوردستانێ د پێنچ ھەیڤێن بۆری دا سالا ٢٠١٥ ل ھەرێما کوردستانێ ٢٥ حالەتێن کوشتنێ و ٣٣ حالەتێن خوە کوشتنێ و ٩٦ حالەتین سووتنێ و ٥٦ حالەتێن خوە سووتنی و ٢٩٤٥ سکالایێن قانوونی یێن ھاتینە تۆمارکرن.
مریەم کو ئەنداما لژنا بەرەڤانیێ یە ژ مافێن ئافرەتێ ل پەرلەمانێ کوردستانێ گۆتژی: ژبلی ھاتنا ژمارەیەکا زۆرا ئاوارا بۆ ھەرێما کوردستانێ و دروستبوونا قەیرانان ژی کارتێکرن ل سەر زێدەبوونا رێژا توند و تێژیێ یا ھەی ب تایبەتی ژی قەیرانا ئابۆری کو گەلەک جاران دبیتە ئەگەرێ دروستبوونا توند و تیژیێ دناڤبەرا ژنێ و زەلامی دا.
