ھندەک خێزان ئێزدی ل دەمێ ڤەگەریانا شنگال دھێنە بێ سەرۆشینکرن
ئه‌ڤرۆ نيوز:
سەعدون قاسم حسو برایێ مجدل قاسم حسو یێ دگەل ھەڤژینا خوە (سونیا چەتو علی) و زارۆیەکێ خوە ب ناڤێ (غمدار مجدل قاسم) بەرزەبووین دناڤ سەنتەرێ ناحیا سنۆنێ دا دیارکر کو خێزانا مە ژ قەزا شێخان ناحیا باعەدری بەرەڤ سەنتەرێ قەزا شنگال چووین ل شێخان و شوفێرەکێ یێن گەھاندینە بەدریکێ ل بەردیکێ ترۆمبێلەکا دی ھاتیە پێشیا وان یێن برینە دۆریانا عین شبابیک ل دەڤەرا شنگال ژ دۆریانا عێن شبابیک یێن چووینە ناڤ سەنتەرێ ناحیا سنۆنێ دا ل دۆریانا نێڤەکا سەنتەرێ سنۆنێ دا یێن ھاتینە خاری ژ ترۆمبێلی ھەر سێ کەس یێن بەرزەبووین ژ رۆژا 14/6/2018 ھەتا نوکە بەردەوام ئەم پسیارا وان دکەین لێ ھیشتا دیارنەبووینە.
سەعدون قاسم حسو ئەو ژی بۆ ئەڤرۆ دیار کر، برایێ من مجدل ب مەرەما چێکرنا ناسنامەیێن زارۆیێ خوە غمدان یێن چووینە ناحیا سنۆنێ. ل سالێن بۆرێدا دگەل ھێزا حەیدەر شەشۆ کار دکر، دەمێ بەرزەبووی ئەم چووینە بارەگایێ ھێزا حەیدەر شەشۆ ل شنگال وان تۆمارێن خوە ڤەکرن گۆتن ژ سالا بۆری وەرە ل مەھا ھەشت نەھاتیە دەوامێ و نەھاتیە بارەگای و وی چو ئاریشە ژی نەبوون، ب تنێ ل شێخان بۆ خوە کاری ئاسنی دکر و پێ ژیانا خوە ب رێڤەدبر”.
ئاشکرا کر: “ل بنگەھێ پولیسێن باعەدرێ ل قەزا شێخان مە سکالا تۆمارکریە و سکالا چوویە دادگەھا قەسرۆکێ، ھەر سێ شوفێر ھاتنە گرتن، لێ وان شوفیران دیدەڤان ھەبوون کو وان برایێ من دگەل ھەڤژین و زارۆیێ وێ یێ ب ئەمانەت گەھاندین، لەورا ھەر سێ شوفێر یێن ھاتینە ئازادکرن، لێ حکومەتا عیراقێ و حەشدا شەعبی و پولیسێن فیدرال ل سنۆنێ ھەڤکاریا مە نەکرن و کامیرێن چاڤدێریی ڤە نەکرن و وان داخواز ژ مە کر سکالا ژ دھۆکێ ببەینە سنۆنێ، بۆ مە ژی زەحمەت بوو، ل وێدەرێ ئەم یێ ھەولددەین کامیرە بھێنە ڤەکرن، لێ لەشکەرێ عێراقی رازی نابیت و رێ نادەت کامیرێن جاڤدێریێ بھێنە ڤەکرن”.
زێدەتر گۆت:” ئەم دبێژین ھەکە ھاتبانە کوشتن، نوکە تەرمێ وان ھاتبوو دیتن، مە باوەری نینە د کوشتی بن، مە گومان ھەیە رەڤاندی بن، ھەکە مووسل یان تەلەعفەر ھاتبانە بێ سەورشینکرن دا بێژین تیرۆرستێن داعش یێن رەڤاندیێن، لێ ل سنۆنێ دا تیرۆرستێن داعش نینن، ب تنێ لەشکەری عێراقێ و پەکەکە و حەشدا شەعبی ھەنە”.
مەحما خەلیل قایمقامێ قەزا شنگال دیار کر کو دۆرێن 13 ھزار کەسێن ئێزدی یێن ڤەگەریاینە دەڤەرا شنگال ئەڤ ھژمارا کەسێن زڤرینە قەزا شنگال ھیچ ئەمن و ئاسایش بۆ وان نینە و ژیانا وان بەردەوام د مەترسیێ دایە، ژ بەر حەشدا شەعبی و پەکەکێ ئەگەر رێیا سحێلا بۆ دھۆک ھاتبایە ڤەکرن، رەنگە ئەڤ خێزانێن زڤرینە دەڤەرێ ھەموو دووبارە جارەکا دی ئاوارەیێ ھەرێما کوردستانێ بن و گەلەک جاران مە داخواز ژ دەولەتێن جیھانێ و ئەمریکا کریە پێشمەرگەە ڤەگەرتە شنگال، چونکو ب تنێ پێشمەرگەە دشێت ئەمن و ئاسایشێ بۆ خەلکێ شنگال دابین بکەت.
